26/07/2024
![ຜູ້ແທນຂັ້ນແຂວງກອນຕູມ ສສ ຫວຽດນາມ ຢ້ຽມຢາມແຂວງຈໍາປາສັກ](/gweb/backend/web/images/download/Content_2024072606071731.jpg)
ວັນທີ 18 ກໍລະກົດ, ທ່ານ ເຢືອງ ວັນ ຈາງ ກໍາມະການສູນກາງພັກ ເລຂາຄະນະພັກແຂວງ ປະທານສະພາປະຊາຊົນແຂວງກອນຕູມ ໄດ້ນໍາພາ ຄະນະຜູ້ແທນຂອງແຂວງ ເຄື່ອນໄຫວຢ້ຽມຢາມ ເຮັດວຽກ ຢູ່ ແຂວງຈໍາປາສັກ ໂດຍການຕ້ອນຮັບ ຢ່າງອົບອຸ່ນ ຂອງ ທ່ານ ອາລຸນໄຊ ສູນນະລາດ ກໍາມະການສູນກາງພັກ ເລຂາພັກແຂວງ ເຈົ້າແຂວງ ຈໍາປາສັກ ພ້ອມຄະນະ. ໂອກາດນີ້, ທ່ານ ເຈົ້າແຂວງຈໍາປາສັກ ໄດ້ກ່າວຕ້ອນຮັບ ພ້ອມທັງ ຕີລາຄາສູງ ຕໍ່ການເຄື່ອນໄຫວອັນມີເນື້ອໃນອັນສໍາຄັນນີ້, ເຊິ່ງ ໃນໄລຍະນີ້ ແຂວງຈໍາປາສັກ ກໍາລັງເລັ່ງສຸມໃສ່ວຽກ ການກະກຽມກອງປະຊຸມໃຫ່ຍ 3 ຂັ້ນ, ວາລະແຫ່ງຊາດໃນການແກ້ໄຂ ເສດຖະກິດ - ການເງິນ ຕິດພັນກັບ ການປະຕິບັດແຜນ ເສດຖະກິດ ເອກະລາດ ເປັນເຈົ້າຕົນເອງ, ວຽກງານກໍ່ສ້າງຮາກຖານ ການເມືອງອັນເປັນວຽກສໍາຄັນຂອງພັກ, ກໍ່ຄື ວຽກຂອງສະພາໃນການຮັບຟັງຂໍ້ສະເໜີ ຄໍາຄິດເຫັນ ຂອງປະຊາຊົນ ເຮັດວຽກເພື່ອປະຊາຊົນ, ຂະບວນແຂ່ງການຮັກຊາດ ແລະ ພັດທະນາ. ໃນໂອກາດດຽວກັນນັ້ນ, ສະຫາຍ ເຢືອງ ວັນ ຈາງ ກໍາມະການສູນກາງພັກ ເລຂາຄະນະພັກແຂວງ ປະທານສະພາປະຊາຊົນແຂວງ ໄດ້ສະແດງຄວາມຂອບໃຈ ຕໍ່ ການຕ້ອນຮັບ ອັນມີຄວາມໝາຍນີ້, ພ້ອມທັງແຈ້ງ ຈຸດປະສົງ ໃນການມາ ຢ້ຽມຢາມ ແລະ ເຮັດວຽກ ຢູ່ແຂວງຈໍາປາສັກ ໃນຄັ້ງນີ້ ເພື່ອການເຮັດວຽກຮ່ວມ ແລກປ່ຽນບົດຮຽນ ລະຫວ່າງ ສະພາປະຊາຊົນກອນຕູມ ແລະ ສະພາປະຊາຊົນ ໃນບັນດາແຂວງພາກໃຕ້ຂອງລາວ ກໍ່ຄື ສາລະວັນ, ເຊກອງ, ອັດຕະປື. ທັງສອງຝ່າຍຕີລາຄາສູງຕໍ່ ການພົວພັນຮ່ວມມືກັນ ຂອງ ສອງກົມການເມືອງ ສອງປະເທດ ລາວ-ຫວຽດນາມ ກໍ່ຄື ແຂວງຈໍາປາສັກ ແລະ ແຂວງ ກອນຕູມ, ພ້ອມກັນ ຊຸກຍູ້ ສົ່ງເສີມ ສາຍພົວພັນແບບພິເສດ ທີ່ບັນພະບຸລຸດຂອງສອງປະເທດ ໄດ້ສ້າງໄວ້ຢ່າງ ໝັ້ນຄົງ ແລະ ງົດງາມ , ຫັວງຍ່າງຫຍິ່ງວ່າ ຄວາມສາມັກຄີຂອງ ພວກເຮົາ ທັງສອງຝ່າຍ ຈະນັບມື້ພັດທະນາ ຢ່າງກ້າວກະໂດດ ແລະ ໄປສູ່ລວງເລິກ.