26/07/2024
![ກອງປະຊຸມ ຄົບຄະນະບໍລິຫານພັກແຂວງຈໍາປາສັກ ຄັ້ງທີ 13 ສະໄໝທີ VIII](/gweb/backend/web/images/download/Content_2024072606075524.jpg)
ກອງປະຊຸມຄົບຄະນະບໍລິຫານພັກແຂວງຈໍາປາສັກ ຄັ້ງທີ 13 ສະໄໝທີ VIII ໄດ້ຈັດຂື້ນ ໃນວັນທີ 18-20 ກໍລະກົດ 2024, ທີ່ຫ້ອງວ່າການແຂວງຈໍາປາສັກ, ພາຍໃຕ້ການເປັນປະທານ ຂອງ ສະຫາຍ ອາລຸນໄຊ ສູນນະລາດ ກໍາມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ ມີຮອງເລຂາພັກແຂວງ, ບັນດາ ສະຫາຍ ຄະນະປະຈໍາພັກແຂວງ, ກໍາມະການພັກແຂວງ, ເລຂາຄະນະພັກ-ໜ່ວຍພັກ ຮາກຖານ ພະແນກການກົມກອງອ້ອມຂ້າງແຂວງ ເຂົ້າຮ່ວມ. ສະຫາຍ ອາລຸນໄຊ ສູນນະລາດ ໄດ້ກ່າວເປີດກອງປະຊຸມ ບາງຕອນວ່າ: ໂດຍປະຕິບັດຕາມກົດລະບຽບຂອງພັກປະຊາຊົນປະຕິວັດລາວ ສະໄໝທີ XI, ແຜນດຳເນີນງານຂອງຄະນະບໍລິຫານງານພັກແຂວງ ສະໄໝທີ VIII, ການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI, ມະຕິກອງປະຊຸມຄົບຄະນະບໍລິຫານງານພັກແຂວງຄັ້ງທີ 12 ສະໄໝທີ VIII, ການປະຕິບັດ 2 ວາລະແຫ່ງຊາດ, ວາລະຂອງແຂວງ ມະຕິ 04 ຂອງກົມການເມືອງສູນກາງພັກ,ທິດຊີ້ນຳ ແນວຄິດຂອງ ສະຫາຍ ເລຂາ ທິການໃຫຍ່ ທີ່ໄດ້ຮັບຮອງຢູ່ໃນມະຕິຄະນະບໍລິຫານງານສູນກາງພັກ ເລກທີ 04 ກ່ຽວກັບເສດຖະກິດເປັນເອກກະລາດ ເປັນເຈົ້າຕົນເອງ ຫຼື “ສອຈ” ຢ່າງເປັນຂະບວນການຟົດຟື້ນກວ້າງຂວາງ ໃນທົ່ວສັງຄົມ, ມາດຕະການຂອງຄະນະສະເພາະກິດ 19 ກໍ່ຄື ຄະນະແກ້ໄຂບັນຫາເສດຖະກິດ-ການເງິນຂອງປະເທດ, ການຄຸ້ມຄອງແຮງງານ, ຄ່າແຮງຂັ້ນພື້ນຖານ, ຄ່າຄອງຊີບ ໂດຍສະເພາະກໍ່ແມ່ນ ພະນັກງານລັດ, ເລັງໃສ່ການຜະລິດເພື່ອກຸ້ມຕົນເອງ ແລະ ເພື່ອຜະລິດສົ່ງອອກ, ຫຼຸດຜ່ອນການນຳເຂົ້າ, ການຄຸ້ມຄອງເງິນຕາ,ການຄຸ້ມຄອງຖານລາຍຮັບ, ສ້າງຄວາມເຂັ້ມແຂງໃຫ້ແກ່ຜູ້ປະກອບການພາຍໃນ, ດຶງດູດນັກລົງທຶນຕ່າງປະເທດ, ການຄວບຄຸມກະແສເງິນ, ການແລກປ່ຽນໂດຍການຫັນການແລກປ່ຽນເຂົ້າສູ່ລະບົບ, ຫຼຸດຜ່ອນການແລກ ປ່ຽນເງິນຕາທີ່ບໍ່ຈຳເປັນໂດຍຈະໄປຊື້ສິນຄ້າຢູ່ຕ່າງປະເທດ.
ກອງປະຊຸມນີ້ ໄດ້ຮັບຟັງການລາຍງານເຜີຍແຜ່ເອກະສານສໍາຄັນຕ່າງໆ ຄໍາຖາມເຈາະຈີ້ມ ພ້ອມທິດຊີ້ນໍາຂອງປະທານ ເຊິ່ງຈະໄດ້ເຜີຍແຜ່ ຜົນສໍາເລັດກອງປະຊຸມລັດຖະບານເປີດກວ້າງຄັ້ງທີ 1 ປີ 2024, ຜົນສໍາເລັດກອງປະຊູມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX, ຜ່ານຄໍາສັ່ງຂອງຄະນະເລຂາທິການສູນກາງພັກ ສະບັບເລກທີ 173/ພລສພ,ວ່າດ້ວຍການຄາດຄະເນຄວາມຮັບຜິດຊອບຂອງຄະນະປະຈໍາພັກແຂວງ ແຕ່ລະຂັ້ນ, ການສະຫຼຸບຕີລາຄາການນໍາພາ - ຊີ້ນໍາວຽກງານຮອບດ້ານຂອງຄະນະບໍລິຫານງານພັກແຂວງ ໃນເດືອນ 6 ຕົ້ນປີ ແລະ ທິດທາງແຜນການນໍາພາ 6 ເດືອນ ທ້າຍປີ 2024, ລາຍງານການຈັດຕັ້ງປະຕິບັດ ມະຕິກອງປະຊຸມໃຫ່ຍຄັ້ງທີ VIII ຂອງອົງຄະນະພັກແຂວງ ແລະ ທິດທາງວຽກງານຈຸດສຸມນໍາພາ ແຕ່ນີ້ຮອດກອງປະຊຸມໃຫ່ຍ IX, ການກະກຽມດໍາເນີນກອງປະຊຸມໃຫ່ຍ 3 ຂັ້ນຂອງພັກ, ການກະກຽມດໍາເນີນກອງປະຊຸມ ສະພາປະຊາຊົນແຂວງ ສະໄໝສາມັນເທື່ອທີ 7 ຊຸດທີ II, ລາຍງານວຽກງານ ໃນບາງຂົງເຂດ ແລະ ວຽກງານຈຸດສຸມຕ່າງໆ, ສືບຕໍ່ ປັບປຸງກໍ່ສ້າງກໍາລັງປ້ອງກັນຄວາມສະຫງົບ ຕິດພັນກັບການນໍາພາ ສະກັດກັ້ນ ແລະ ແກ້ໄຂບັນດາປະກົດການຫຍໍ້ທໍ້ໃນສັງຄົມ, ການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ.