02/07/2024
![ແຂວງຈຳປາສັກ ຈັດກິດຈະກຳຂີ່ລົດຖີບສົ່ງເສີມການທ່ອງທ່ຽວ ທີ່ດອນເດດ-ດອນຄອນ ເມືອງໂຂງ](/gweb/backend/web/images/download/Content_2024070213073940.jpeg)
ກິດຈະກຳຂີ່ລົດຖີບເພື່ອສົ່ງເສີມການທ່ອງທ່ຽວໃຫ້ມີບັນຍາກາດຄຶກຄື້ນຢູ່ເຂດດອນເດດ-ດອນຄອນ ເມືອງໂຂງ ທີ່ເປັນສະຖານທີ່ທ່ອງທ່ຽວໄດ້ຮັບຄວາມນິຍົມຂອງແຂກພາຍໃນ ແລະ ຕ່າງປະເທດສົນໃຈເຂົ້າມາທ່ຽວຊົມໃນປັດຈຸບັນ. ກິດຈະກຳດັ່ງກ່າວມີຂຶ້ນໃນຕອນເຊົ້າຂອງວັນທີ 2 ກໍລະກົດ 2024 ນີ້ໃຫ້ກຽດເຂົ້າຮ່ວມກິດຈະກໍາຂອງທ່ານ ອາລຸນໄຊ ສູນນະລາດ ເລຂາພັກແຂວງ ເຈົ້າແຂວງຈໍາປາສັກ, ທ່ານ ສະນັ່ນ ສີພາພົມມະຈັນ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ພ້ອມຄະນະນໍາຂອງແຂວງ, ມີທ່ານ ວັນນະໄຊ ຊາດຕະກຸນ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ທ່ານ ນາງ ຄໍາພູ ລິດທິສັກ ເຈົ້າເມືອງໆໂຂງ, ມີຂະແໜງການກ່ຽວຂ້ອງ ແລະ ມວນຊົນເຂົ້າຮ່ວມ. ກິດຈະກຳຂີ່ລົດຖີບເພື່ອສົ່ງເສີມການທ່ອງທ່ຽວເລີ່ມຕົ້ນຈາກດອນເດດ ຂີ່ອ້ອມຮອບ ໄປຫາດອນຄອນ. ຈາກນັ້ນທ່ານ ເຈົ້າແຂວງຈໍາປາສັກ, ພ້ອມດ້ວຍຄະນະນໍາຂອງແຂວງ, ຄະນະນໍາຂອງເມືອງໂຂງ ໄດ້ສືບຕໍ່ຂີ່ລົດໄຟຟ້າ ທ່ຽວຊົມຈຸດທ່ອງທ່ຽວອ້ອມຮອບດອນເດດ ແລະ ດອນຄອນ, ໂດຍໃນໄລຍະທ່ຽວຊົມແມ່ນໄດ້ລົງເບິ່ງ, ພ້ອມຖ່າຍຮູບເປັນທີ່ລະນຶກຕາມສະຖານທີ່ທ່ອງທ່ຽວ ເຊັ່ນ: ທ່າກໍາປັ່ນ, ຫົວລົດໄຟ້ເກົ່າ, ຊົມທິວທັດທໍາມະຊາດອ້ອມດອນ, ຊົມນໍ້າຕົກຕາດສົມພະມິດ ໂດຍຢູ່ທີ່ນໍ້າຕົກຕາດສົມພະມິດມີບໍລິການຂີ່ສະລິງ, ຍ່າງຂົວອູ່ຜ່ານໜ້າຜານໍ້າຕົກຕາດທີ່ມີຄວາມສູງ. ໃນໂອກາດມາສະຖານທີ່ແຫຼ່ງທ່ອງທ່ຽວນໍ້າຕົກຕາດສົມພະມິດທ່ານ ເຈົ້າແຂວງຈໍາປາສັກ, ໄດ້ນໍາພາການນໍາຂອງແຂວງ, ພ້ອມທຸກທ່ານທີ່ເຂົ້າຮ່ວມກິດຈະກຳ ຍ່າງຜ່ານຂົວອູ່ຈໍານວນ 5 ເສັ້ນ, ທີ່ມີຄວາມທາທ້າຍດ້ານຄວາມສູງຂອງໜ້າຜາ, ແຕ່ມີຄວາມຮັບປະກັນເລື່ອງຄວາມປອດໄພ.