02/07/2024
![ກອງປະຊຸມອົງການປົກຄອງແຂວງເປີດກ້ວາງ ຄັ້ງທີ I ປະຈໍາປີ 2024](/gweb/backend/web/images/download/Content_2024070213075323.jpg)
ກອງປະຊຸມອົງການປົກຄອງແຂວງ ເປີດກ້ວາງ ຄັ້ງທີ I ປະຈໍາປີ 2024 ໄດ້ຈັດຂື້ນໃນວັນທີ 27-28 ມີຖຸນາ ທີ່ສໍານັກງານຫ້ອງວ່າການແຂວງ, ພາຍໃຕ້ການເປັນປະທານ ຂອງ ທ່ານ ອາລຸນໄຊ ສູນນະລາດ ເຈົ້າແຂວງຈໍາສັກ, ມີບັນດາ ຮອງເຈົ້າແຂວງ, ຫົວໜ້າພະແນກການ-ກົມກອງອ້ອມຂ້າງ, ອົງການທຽບເທົ່າຂັ້ນແຂວງ, ເຈົ້ານະຄອນປາກເຊ ແລະ ເຈົ້າເມືອງ ເຂົ້າຮ່ວມ. ທ່ານ ອາລຸນໄຊ ສຸນນະລາດ ກ່າວບາງຕອນວ່າ: ກອງປະຊຸມຄັ້ງນີ້ ພວກເຮົາຈະໄດ້ສະຫຼຸບ-ຕີລາຄາຄືນ ຜົນການຈັດຕັ້ງປະຕິບັດວຽກງານຂອງອົງການປົກຄອງແຂວງ ແລະ ລົງເລິກຄົ້ນຄວ້າປຶກສາຫາລື ທິດທາງແຜນການຕໍ່ໜ້າ ໃນຂົງເຂດວຽກງານ ຕາມຫົວຂໍ້ທີ່ກໍານົດໃນວາລະຂອງກອງປະຊຸມທີ່ພະແນກການ, ກົມກອງ, ນະຄອນ ແລະ ບັນດາເມືອງ ໄດ້ກະກຽມເນື້ອໃນລາຍງານ ຕໍ່ກອງປະຊຸມ ສະນັ້ນ ຜູ້ແທນກອງປະຊຸມ ຈົ່ງໄດ້ເອົາໃຈໃສ່ຕິດຕາມ ແລະ ສຸມໃສ່ການປະກອບຄຳເຫັນ ດ້ວຍຄວາມຮັບຜິດຊອບສູງ. ກອງປະຊຸມຄັ້ງນີ້, ຈະໄດ້ລົງເລິກຄົ້ນຄວ້າປຶກສາຫາລື , ພິຈາລະນາ, ຮັບຮອງ ແລະ ຕົກລົງບັນຫາ ສໍາຄັນ , ບັນດາຄໍາຖາມເຈາະຈີ້ມ ຕໍ່ ການລາຍງານການຈັດຕັ້ງປະຕິບັດ ໃນໄລຍະ 6 ເດືອນຕົ້ນປີ ແລະ ທິດທາງ ຈຸດສຸມ 6 ເດືອນທ້າຍປີ 2024 ຂອງບັນດາຂະແໜງການຕ່າງໆ, ເພື່ອລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຕິດພັນກັບ ການປະຕິບັດວາລະແຫ່ງຊາດ, ການປະຕິບັດຄໍາສັ່ງ 13/ນຍ ການເພີ່ມທະວີ ແກ້ໄຂບັນຫາເຄັ່ງຮ້ອນເສດຖະກິດການເງິນ, ການຈັດຕັ້ງປະຕິບັດ ມະຕິວ່າດ້ວຍ ສ້າງເສດຖະກິດ ເອກະລາດ ເປັນເຈົ້າຕົນເອງ, ການແກ້ໄຂ ບັນຫາໜີ້ສິນຂອງເເຂວງ (ໜີ້ຕ້ອງຮັບ-ໜີ້ຕ້ອງສົ່ງ), ຈັດເກັບລາຍຮັບ-ຄຸ້ມຄອງລາຍຈ່າຍ ເປັນທັນສະໄໝ ,ການຄຸ້ມຄອງລົດລັດ, ມາດຕະການ ຕ້ານການຟຸຍເຟືອຍ,ການຄຸ້ມຄອງເງິນຕາ, ອັດຕາແລກປ່ຽນເງິນເຟີ້ ແລະ ການສໍາລະຜ່ານລະບົບທະນາຄານ, ຈັດຕັ້ງປະຕິບັດການປັບປຸງ ລັດວິສາຫະກິດ, ການຜະລິດ ເປັນສິນຄ້າແທນ ການນໍາເຂົ້າ ແລະ ສົ່ງອອກ, ການຄຸ້ມຄອງການສົ່ງອອກ-ນໍາເຂົ້າ, ລາຄາສິນຄ້າ ແລະ ຄ່າບໍລິການພາຍໃນແຂວງ, ການຄຸ້ມຄອງ ການຈໍາໜ່າຍນໍ້າມັນເຊື້ອໄຟ, ການຈັດຕັ້ງປະຕິບັດຂໍ້ຕົກລົງຂອງນາຍົກລັດຖະມົນຕີ ເລກທີ 93/ນຍ ວ່າດ້ວຍນະໂຍບາຍສິນເຊື່ອເພື່ອກະຕຸ້ນເສດຖະກິດ, ນະໂຍບາຍສິນເຊື່ອເພື່ອກະຈາຍແຫຼ່ງທຶນຢູ່ທ້ອງຖິ່ນ ຂັ້ນແຂວງ, ການຈັດຕັ້ງປະຕິບັດ ຄໍາສັ່ງ 11/ນຍ ການເພີ່ມທະວີຄວາມເຂັ້ມງວດ ການຄຸ້ມຄອງປົກປັກຮັກສາປ່າໄມ້ ພັດທະນາ ແລະ ນໍາໃຊ້ປ່າໄມ້, ທີ່ດິນປ່າໄມ້, ປະຕິບັດການຄຸ້ມຄອງການນໍາໃຊ້ທີ່ດິນ ( ການເຊົ່າສໍາປະທານດິນລັດ ) ແລະ ການຂື້ນທະບຽນທີ່ດິນ, ການປະຕິບັດ ແລະ ຄຸ້ມຄອງ ກວດກາ, ການປະເມີນໂຄງການບໍ່ແຮ່, ບັນດາໂຄງການພັດທະນາພະລັງງານໄຟຟ້າ, ຕິດຕາມຄຸ້ມຄອງໂຄງການກໍ່ສ້າງດ່ານສາກົນວັງເຕົ່າ, ການບໍລິການ ດ່ານທ່າບົກວັງເຕົ່າ, ການແກ້ໄຂບັນຫາ ແຮງງານ,ການສົ່ງເສີມ ຈັດຫາ ອາຊີບໃຫ້ ປະຊາຊົນ , ການປະຕິບັດບັນດາຄາດໝາຍບູລິມະສິດຂອງ ຂະແໜງການສຶກສາ ແລະ ກິລາ, ບັນດາຄາດໝາຍຕົວຊີ້ວັດດ້ານສາທາລະນະສຸກ,ຜົນການຈັດຕັ້ງປະຕິບັດຂອງສະພາປະຊາຊົນແຂວງ ໃນການຈັດຕັ້ງປະຕິບັດກວດກາຜົນການກວດສອບ. ນອກຈາກການລາຍງານແລ້ວ, ຜູ້ແທນກອງປະຊຸມກໍໄດ້ປະກອບຄຳເຫັນດ້ວຍຄວາມຮັບຜິດຊອບເພື່ອປັບປຸງແຜນພັດທະນາຮອບດ້ານເພື່ອນຳໄປຈັດຕັ້ງປະຕິບັດໃນຕໍ່ໜ້າໃຫ້ໄດ້ຮັບຜົນດີ.