ກອງປະຊຸມສະຫຼຸບການການຈັດຕັ້ງປະຕິບັດວຽກງານຫ້ອງວ່າການແຂວງ ປະຈໍາປີ 2023 ແລະ ທິດທາງແຜນການ ປີ 2024
05/06/2024
ກອງປະຊຸມສະຫຼຸບການການຈັດຕັ້ງປະຕິບັດວຽກງານຫ້ອງວ່າການແຂວງ ປະຈໍາປີ 2023 ແລະ ທິດທາງແຜນການ ປະຈາປີ 2024, ໄດ້ຈັດຂຶ້ນໃນວັນທີ 4 ມິຖຸນາ 2024 ທີ່ຫ້ອງວ່າການແຂວງຈຳປາສັກ ໂດຍເປັນປະທານຂອງທ່ານ ອາລຸນໄຊ ສູນນະລາດ ເລຂາຄະນະບໍລິຫານງານພັກແຂວງ ເຈົ້າແຂວງຈຳປາສັກ,ເຂົ້າຮ່ວມມີຄະນະປະຈຳພັກແຂວງ,ກຳມະການພັກແຂວງ, ຫົວໜ້າຫ້ອງວ່າການແຂວງ ພ້ອມດ້ວຍຄະນະ,ມີພະແນກການອອມຂ້າງແຂວງ,ຫົວໜ້າ ແລະ ຮອງຫ້ອງວ່າການເມືອງ,ນະຄອນ,ຫົວໜ້າ ແລະ ຮອງຂະແໜງ, ແລະ ພະນັກງານຫ້ອງ ວ່າການແຂວງ ເຂົ້າຮ່ວມ. ໃນວາລະດຳນີນກອງປະຊຸມ ທ່ານ ທອງລີ ສີສຸລິດ ກຳມະການພັກແຂວງ,ຫົວໜ້າຫ້ອງວ່າການແຂວງ ໄດ້ກ່າວເປີດກອງປະຊຸມຢ່າງເປັນທາງການ ໂດຍກ່າວວ່າ: ກອງປະຊຸມໃນຄັ້ງນີ້ ມີຄວາມໝາຍສໍາຄັນຢ່າງຍິ່ງ ຕິດພັນກັບການສະຫລຸບຕີລາຄາຄືນການຈັດຕັ້ງປະຕິບັດວຽກງານຫ້ອງວ່າການແຂວງ ປະຈໍາປີ 2023 ຖືເປັນການທົບທວນການປະຕິບັດບົດບາດການເປັນເສນາທິການ, ການປະສານງານ ແລະ ການບໍລິການຮັບໃຊ້ຂອງຫ້ອງວ່າການ ແລະ ກຳນົດທິດທາງແຜນການປະຈຳປີ 2024; ຈະໄດ້ຮັບຟັງການປະກອບຄຳເຫັນກ່ຽວກັບການເປັນເສນາທິການ, ການປະສານງານ ແລະ ການບໍລິການຮັບໃຊ້ ຈາກບັນດາທ່ານຜູ້ແທນກອງປະຊຸມທີ່ມາຈາກພະແນກການ, ອົງການທຽບເທົ່າ,ພະແນກການຂັ້ນແຂວງ, 9 ເມືອງ, 1 ນະຄອນ. ດັ່ງນັ້ນ ການປະຕິບັດໜ້າທີ່ ໃນຖານະເປັນເສນາທິການຮັບໃຊ້ການນໍາ ຈຶ່ງບໍ່ແມ່ນວຽກສະເພາະແຕ່ຂອງຫ້ອງວ່າການແຂວງ, ຫ້ອງວ່າການເມືອງ/ນະຄອນ,ອົງການດຽວເທົ່ານັ້ນ ແຕ່ຫາກເປັນພາລະກິດລວມ ຂອງອົງການຈັດຕັ້ງພັກ-ລັດ ແລະ ກົມກອງອ້ອມຂ້າງແຂວງ ໂດຍສະເພາະການຍົກສູງຄຸນນະພາບການເປັນເສນາທິການທີ່ດີ, ການປະສານງານທີ່ດີ ແລະ ການບໍລິການຮັບໃຊ້ທີ່ດີ.ພິເສດ ເປັນໂອກາດທີ່ດີທີ່ສຸດກອງປະຊຸມໄດ້ຮັບຟັງການໂອ້ລົມຂອງ ທ່ານເລຂາພັກແຂວງ, ເຈົ້າແຂວງ ທີ່ເພີ່ນເປັນຜູ້ທີ່ມີປະສົບການ, ມີຜົນງານໃນຫຼາຍຂົງເຂດວຽກງານ ແລະ ໜື່ງໃນນັ້ນກໍ່ຄືການປະຕິບັດໜ້າທີ່ເປັນ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ. ເຊິ່ງພວກເຮົາຈະໄດ້ຮຽນຮູ້ບົດຮຽນທີ່ສຳຄັນ ແລະ ພົ້ນເດັ່ນໃນ 3 ວຽກຫຼັກ ຂອງຫ້ອງວ່າການ ຈາກຂັ້ນສູນກາງ ແລະ ທັງເປັນການສ້າງຂວັນກຳລັງໃຈໃຫ້ຄອບຄົວຫ້ອງວ່າການໃນທົ່ວແຂວງ ເພື່ອສືບຕໍ່ປັບປຸງຍົກລະດັບການປະຕິບັດຫນ້າທີ່ຂອງຕົນ. ເພື່ອຕອບສະໜອງ ບັນດາຄາດໝາຍດັ່ງກ່າວ ໃຫ້ສໍາເລັດຜົນ ພວກເຮົາຕ້ອງມີ ຄວາມເຂົ້າໃຈ, ເປັນເອກະພາບກັນທາງດ້ານແນວຄິດ ແລະ ການກະທຳ, ມີຄວາມສະດຸ້ງໄວ, ຕັ້ງໜ້າປະສານສົມທົບຢ່າງແໜ້ນແຟ້ນກົມກຽວ, ຊ່ວຍເຫລືອເຊິ່ງກັນ ແລະ ກັນ ເພື່ອພ້ອມກັນສໍາເລັດພາລະກິດລວມ, ກໍ່ຄືໜ້າທີ່ການເມືອງຂອງຕົນເປັນຢ່າງດີ. ຈາກນີ້ ທ່ານ ທອງຄູນ ເຮືອງວົງສ່າ ຮອງຫົວໜ້າຫ້ອງວ່າການແຂວງ, ກໍໄດ້ຜ່ານບົດສະຫຼຸບການການຈັດຕັ້ງປະຕິບັດວຽກງານຫ້ອງວ່າການແຂວງ ປະຈໍາປີ 2023 ແລະ ທິດທາງແຜນການ ປະຈໍາປີ 2024,ມີການແລກປ່ຽນ ປະກອບຄຳຄິດຄຳເຫັນ ເພື່ອປັບປຸງວຽກງານຫ້ອງວ່າການໃຫ້ມີການພັດທະນາຂື້ນໄປເລື້ອຍໆ.ໂອກາດດຳເນີນກອງປະຊຸມ,ຍັງໄດ້ມີການມອບໃບຍ້ອງຍໍ ໃຫ້ພະນັກງານ ແລະ ກົມກອງ ທີ່ມີຜົນງານດີເດັ່ນ, ພິເສດຫ້ອງວ່າການແຂວງກໍຍັງໄດ້ມອບຄອມພິວເຕີ ແລະ ປິນເຕີເພຶອຊຸກຍູ້ວຽກງານ ໃຫ້ຫ້ອງວ່າການເມືອງ ແລະ ນະຄອນຕື່ມອີກ.
