ກອງປະຊຸມສະຫຼຸບວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກງານ 3 ສ້າງ  ທົ່ວແຂວງຈໍາປາສັກ ປະຈຳປີ 2023 ໄດ້ຈັດຂຶ້ນ ໃນວັນທີ 18 ມີນາ 2024 ທີ່ສະໂມສອນແຂວງ, ໂດຍພາຍໃຕ້ການເປັນປະຂອງ ທ່ານ ວິໄລວົງ ບຸດດາຄຳ  ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ, ມີ ບັນດາຮອງເລຂາພັກແຂວງ, ຮອງເຈົ້າແຂວງ, ບັນດາການນຳແຂວງ, ນະຄອນ-ເມືອງ, ຄະນະກໍ່ສ້າງຮາກຖານຂັ້ນແຂວງ ປະຈຳແຕ່ລະເມືອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.  ທ່ານ ວິໄລວົງ ບຸດດາຄຳ  ເລຂາພັກແຂວງ ເຈົ້າແຂວງຈຳປາສັກ ໄດ້ກ່າວເປີດກອງປະຊຸມວ່າ: ວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດຮອບດ້ານ-ແກ້ໄຂຄວາມ ທຸກຍາກ ແລະ ວຽກງານ 3 ສ້າງ ແມ່ນບັນຫາພື້ນຖານທີ່ເປັນແນວຮົບຍຸດທະສາດສຳຄັນຂອງພັກເຮົາ ທັງສະເພາະໜ້າ ແລະ ຍາວນານ; ວຽກງານທັງ 3 ຢ່າງນີ້ ບໍ່ສາມາດຕັດແຍກຈາກກັນໄດ້ໃນຂະ ບວນການແຂ່ງຂັນ “ຮັກຊາດ ແລະ ພັດທະນາ”; ເປັນພື້ນຖານໃຫ້ແກ່ການສ້າງຄວາມໝັ້ນຄົງ ແກ່ລັດປະຊາທິປະໄຕປະຊາຊົນ, ສ້າງປະຖົມປັດໄຈກ້າວຂຶ້ນສັງຄົມນິຍົມເທື່ອລະກ້າວ.ທຸກຮາກຖານໃນລະບົບການເມືອງ ຂອງລະບອບປະຊາຕິປະໄຕປະຊາຊົນ ຂອງພວກເຮົາ ມີຜົນກະທົບເຊິ່ງກັນ ແລະ ກັນ; ຮາກຖານການເມືອງ ບໍ່ພຽງແຕ່ຢູ່ຂັ້ນຮາກຖານບ້ານເທົ່ານັ້ນ ຫາກ ລວມໄປເຖິງຮາກຖານຂອງສຳນັກງານ, ອົງການ, ສະຖາບັນການສຶກສາ, ໂຮງຮຽນ, ໂຮງໝໍ, ລັດວິສາຫະກິດ, ຮາກຖານໃນກຳລັງ ປກສ-ປກຊ, ບັນດາຫົວໜ່ວຍການຜະລິດ, ທຸລະກິດ, ໂຮງຈັກ, ໂຮງງານ ແລະ ການຈັດຕັ້ງສັງຄົມອື່ນໆ; ຖ້າຫາກຮາກຖານເຫຼົ່ານັ້ນ ມີຄວາມປອດໃສ, ເຂັ້ມແຂງ ແລະ ໜັກແໜ້ນ ຈະສ້າງໄດ້ກຳລັງແຮງປະຕິວັດ ທີ່ຮັບປະກັນ ໃນການປະຕິບັດໜ້າທີ່ການເມືອງ ໃຫ້ສຳເລັດຜົນຕາມລະດັບຄາດໝາຍ.  ການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ເປັນຕົວຊີ້ບອກທີ່ສຳຄັນ, ຖ້າຊົນນະບົດບໍ່ມີການພັດທະນາ, ບໍ່ມີການຫັນປ່ຽນ ຢ່າງເປັນຮູບປະທຳ, ປະຊາຊົນບໍ່ຫຼຸດພົ້ນຈາກຄວາມທຸກຍາກ ແມ່ນບົ່ງບອກເຖິງຄຸນນະພາບການນຳພາ-ຊີ້ນຳຂອງຄະນະພັກ ຢູ່ບ່ອນນັ້ນອ່ອນແອ, ສ່ອງແສງໃຫ້ເຫັນຄວາມຮັບຜິດຊອບຂອງຜູ້ນຳພາຢູ່ບ່ອນນັ້ນ ບໍ່ທັນສູງເທົ່າທີ່ຄວນ, ນີ້ແມ່ນຄວາມຮັບຜິດຊອບການເມືອງຂອງພວກເຮົາ ທີ່ມີຕໍ່ປະຊາຊົນ ເຊິ່ງຕ້ອງກວດກາ ແລະ ລົງເລິກແຕ່ລະຂົງເຂດວຽກງານ, ແຕ່ລະຂະແໜງການຢ່າງລະອຽດຖີ່ຖ້ວນ. ວຽກງານ 3 ສ້າງ ແມ່ນການປະຕິວັດອັນເລິກເຊິ່ງເຖິງຖອງໃນເງື່ອນໄຂໃໝ່, ສືບຕໍ່ບູລະນະລະບອບປະຊາທິປະໄຕປະຊາຊົນເຮົາ ໃຫ້ສົມບູນຍິ່ງຂຶ້ນ, ສ້າງຄວາມເຂັ້ມແຂງ, ໜັກແໜ້ນແຕ່ຮາກຖານຂຶ້ນມາ; ການຜັນຂະຫຍາຍວຽກງານ 3 ສ້າງ ແມ່ນການເສີມຂະຫຍາຍສິດເປັນເຈົ້າໃຫ້ແກ່ບັນ ດາຮາກຖານ, ແມ່ນການແບ່ງຂັ້ນຄຸ້ມຄອງລະຫວ່າງແຂວງ, ເມືອງ, ບ້ານ ທີ່ຈະແຈ້ງ, ຂາດຕົວ ບົນພື້ນຖານຄວາມຮັບຜິດຊອບ ຕິດພັນກັບການແບ່ງຜົນປະໂຫຍດອັນສົມຄູ່ ໃຫ້ແຕ່ລະຮາກຖານ.  ສະນັ້ນ, ກອງປະຊຸມຄັ້ງນີ້ ໄດ້ພ້ອມກັນສະຫຼຸບຕີລາຄາເຖິງບັນດາໝາກຜົນຂອງການນຳພາຈັດຕັ້ງປະຕິບັດມະຕິ, ຄຳສັ່ງ ຂອງພັກ-ລັດ ໃນ 1 ປີ  ຜ່ານມາ ເປັນຕົ້ນ: ມະຕິຂອງຄະນະບໍລິຫານງານສູນກາງພັກ ສະບັບເລກທີ 056/ຄບສພ (ປີ 2018) ວ່າດ້ວຍການປັບປຸງຮາກຖານການເມືອງ ຂອງລະບອບປະຊາທິປະໄຕປະຊາຊົນໃຫ້ເຂັ້ມແຂງ ແລະ ໜັກແໜ້ນ; ຄຳສັ່ງຂອງກົມການເມືອງສູນກາງພັກ ສະບັບເລກທີ 097/ກມສພ (ປີ 2020) ວ່າດ້ວຍການເພີ່ມທະວີການນຳ ພາ-ຊີ້ນຳຕໍ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ແລະ ມະຕິວ່າດ້ວຍການປັບປຸງການແບ່ງຂັ້ນຄຸ້ມຄອງ ເພື່ອສ້າງຄວາມເຂັ້ມແຂງຂອງລະບົບບໍລິຫານລັດໃນໄລຍະ ໃໝ່ ສະບັບເລກທີ 076/ກມສພ (ປີ 2019) ແລະ ເປັນການຈັດຕັ້ງປະຕິບັດຜັນຂະຫຍາຍເນື້ອໃນຈິດໃຈ ແລະ ການຊີ້ນຳຂອງກອງປະຊຸມ ສະຫຼຸບຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກງານ 3 ສ້າງ ທົ່ວປະເທດ ຄັ້ງວັນທີ 14-15 ກັນຍາ 2022 ໃນປີຜ່ານມາ. ໄປພ້ອມກັນນັ້ນ, ພວກເຮົາຈະໄດ້ຄົ້ນຄວ້າຄວາມເປັນເອກະພາບ ຕໍ່ການກໍານົດບັນດາທິດທາງ, ແຜນການ ທີ່ຕ້ອງສູ້ຊົນຈັດຕັ້ງປະຕິບັດທັງ 3 ວຽກດັ່ງກ່າວ ໃນປີ 2024 ໃຫ້ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ.