ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ພ້ອມຄະນະ ໄດ້ຕ້ອນຮັບ ທ່ານ ໂຣເບິດ ປາແກ່ງ ອຸປະທູດການາດາ ປະຈໍາ ສປປ ລາວ ພ້ອມດ້ວຍຄະນະ, ໃນວັນທີ 11 ມີນາ 2024 ທີ່ຫ້ອງວ່າການແຂວງຈໍາປາສັກ.  ໂອກາດນີ້, ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ໄດ້ສະແດງການຕ້ອນຮັບ ທ່ານອຸປະທູດການາດາ ປະຈໍາ ສປປ ລາວ ພ້ອມດ້ວຍຄະນະ ພ້ອມທັງ ຕີລາຄາສູງ ຕໍ່ ການພົວພັນຮ່ວມມື ລະຫວ່າງ ລາວ ກັບ ການາດາ ບໍ່ວ່າຈະເປັນ ດ້ານການເມືອງ, ການຄ້າ ການລົງທຶນ ແລະ ການຊ່ວຍເຫຼືອ ຂອງການາດາ ຢູ່ ສ ປປ ລາວ ແລະ ທ່ານຮອງເຈົ້າແຂວງຈໍາປາສັກ ຍັງໃຫ້ຮູ້ສະພາບລວມຂອງແຂວງຈໍາປາສັກ ທ່າແຮງ ແລະ ການຂະຫຍາຍຕົວທາງດ້ານເສດຖະກິດ-ສັງຄົມ ຂອງແຂວງ ເປັນຕົ້ນແມ່ນ ໃນຂົງເຂດກະສິກໍາ, ອຸດສະຫະກໍາປຸ່ງແຕ່ງ, ອຸດສະຫະກໍາໄຟຟ້າ,  ດ້ານການບໍລິການ ແລະ ການທ່ອງທ່ຽວ.  ທ່ານ ໂຣເບິດ ປາແກ່ງ ອຸປະທູດການາດາ ປະຈໍາ ສປປ ລາວ ໄດ້ສະແດງຄວາມຂອບໃຈຕໍ່ການຕ້ອນຮັບ ແລະ ການມາຢ້ຽມຢາມໃນເທື່ອນີ້  ເຊິ່ງທັງສອງປະເທດກໍ່ໄດ້ສຶບຕໍ່ຮັກສາສາຍພົວພັນແຫ່ງມິດຕະພາບ ການຮ່ວມມື, ເພີ່ມທະວີສາຍພົວພັນທາງດ້ານການທູດ ຊ່ວຍເຫຼືອສະໜັບສະໜຸນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ, ປະເທດ ການາດາ ໄດ້ສຶບຕໍ່ສົ່ງເສີມບັນດາໂຄງການ ການ ຊ່ວຍເຫຼືອຢູ່ໃນລາວ, ວຽກງານການແກ້ໄຂບັນຫາລະເບີດບໍ່ທັນແຕກ (UXO), ການສຶກສາ ແລະ ສາທາລະນະສຸກ, ການຄ້າ ແລະ ການລົງທຶນ ດ້ານພະລັງງານໄຟຟ້າ ແລະ ບໍ່ແຮ່.