ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ຕ້ອນຮັບ ທ່ານ ສຸພະສິດ ກໍຈະເລີນ ຜູ້ວ່າຣາຊະການຈັງຫວັດອຸບົນຣາຊະທານີ ແຫ່ງ ຣາຊະອານາຈັກໄທ ພ້ອມດ້ວຍຄະນະ ໃນວັນທີ 28 ກຸມພາ 2024 ຜ່ານມານີ້, ທີ່ຫ້ອງວ່າການແຂວງຈຳປາສັກ, ໃນໂອກາດຢ້ຽມຢາມ, ຮ່ວມກອງປະຊຸມ ປຶກສາຫາລື ລະຫວ່າງພາກລັດ ກັບ ພາກທຸລະກິດ ຂອງສອງຝ່າຍ.

ໂອກາດນີ້, ທ່ານເຈົ້າແຂວງຈໍາປາສັກ ໄດ້ກ່າວຕ້ອນຮັບ ແລະ ຂອບໃຈມາຍັງທ່ານຜູ້ວ່າຣາຊະການຈັງຫວັດອຸບົນຣາຊະທານີ ແຫ່ງ ຣາຊະອານາຈັກໄທ ແລະຄະນະ ຕໍ່ກັບການຮ່ວມມື ທັງສອງຝ່າຍ, ໂດຍສະເພາະແມ່ນການຮັກສາຄວາມເປັນລະບຽບຮຽບຮ້ອຍ, ເຮັດໃຫ້ກາຍເປັນຊາຍແດນສັນຕິພາບ ແລະ ການຮ່ວມມື, ເປັນປະຕູເຊື່ອມໂຍງ ເສັ້ນທາງເຊື່ອມຈອດຕາເວັນອອກ - ຕາເວັນຕົກ , ການຊຸກຍູ້ສົ່ງເສີມການຄ້າ - ການລົງທຶນ, ການສົ່ງອອກສິນຄ້າ, ການທ່ອງທ່ຽວ ທາງທໍາມະຊາດ ແລະ ສົ່ງເສີມການແລກປ່ຽນດ້ານວັດທະນະທໍາ ຂອງພີ່ນ້ອງລາວ-ໄທ ກໍ່ຄື ຈັງຫວັດອຸບົນຣາຊະທານີ ແລະ ແຂວງຈໍາປາສັກຂອງພວກເຮົາ.  ໃນໂອກາດດຽວກັນນີ້, ທ່ານຜູ້ວ່າຣາຊະການຈັງຫວັດອຸບົນຣາຊະທານີ ກໍ່ໄດ້ກ່າວຂອບໃຈ ຕໍ່ການຕ້ອນຮັບຂອງທ່ານເຈົ້າແຂວງ ຈໍາປາສັກ ພ້ອມຄະນະ, ຊຶ່ງ ການພົບປະປຶກສາຫາລື ລະຫວ່າງ ພາກລັດ ກັບ ພາກທຸລະກິດ, ສະພາການຄ້າ ຂອງສອງຝ່າຍ ຈະ ເປັນການ ຄົ້ນຄວ້າຮ່ວມກັນ ເພື່ອການສານຕໍ່ຄວາມຮ່ວມມືລະຫວ່າງ ຈັງຫວັດອຸບົນຣາຊະທານີ ກັບ ແຂວງຈຳປາສັດ ໂດຍສອດຄ່ອງກັບນະໂຍບາຍ BCG Model ແລະ ຄາບອນ ເຄດິດ ( carbon Credit ) ຂອງປະເທດໄທ.