ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ຕ້ອນຮັບ ທ່ານ ປຣາຊານ ອາກຣາວາລ (Prashant Agrawal) ເອກອັກຄະລັດຖະທູດອິນເດຍ ປະຈຳ ສປປ ລາວ, ໃນໂອກາດມາຢ້ຽມຢາມ ແຂວງຈຳປາສັກ ໃນວັນທີ 21 ກຸມພາ 2024, ທີ່ຫ້ອງວ່າການແຂວງ ຈຳປາສັກ. ໂອກາດນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ສະແດງການຕ້ອນຮັບ  ທ່ານ ປຣາຊານ ອາກຣາວາລ ເອກອັກຄະລັດຖະທູດອິນເດຍ ປະຈໍາລາວ ໃນການມາຢ້ຽມຢາມ ແຂວງຈຳປາສັກໃນເທື່ອນີ້, ພ້ອມທັງ ຕີລາຄາສູງ ຕໍ່ ການພົວພັນຮ່ວມມືລະຫວ່າງ ສປປ ລາວ ແລະ ອິນເດຍ ໃນໄລຍະຜ່ານມາ ແລະ ຈະພ້ອມກັນສືບຕໍ່ປະກອບສ່ວນຊຸກຍູ້ການພົວພັນຮ່ວມມືສອງຝ່າຍ ລາວ-ອິນເດຍ ໃຫ້ຂະຫຍາຍຕົວ ແລະ ແໜ້ນແຟ້ນຍິ່ງໆຂຶ້ນ.

ເຊິ່ງຜ່ານມາ ແຂວງຈຳປາສັກ ແມ່ນໄດ້ມີການຮ່ວມມື ກັບ ປະເທດ ອິນເດຍ ໂດຍສະເພາະແມ່ນ ການລົງທຶນ ໃນຂົງເຂດກະສິກໍາ - ປ່າໄມ້ ໃນກິດຈະການລົງທຶນ ປູກກະເຟ, ພິກໄທ , ໂຄງການຮ່ວມມື ລາວ-ອິນເດຍ ການຊ່ວຍເຫຼືອ ດ້ານວິຊາການ ຊ່ຽວຊານ ຫ້ອງການມໍລະດົກໂລກ - ວັດພູຈໍາປາສັກ ໃນການບູລະນະ ເຊິ່ງເປັນສະຖານທີ່ສໍາຄັນທາງວັດທະນະທໍາທີ່ມີເອກະລັກ ແລະ ເປັນສັນຍາລັກຂອງມໍລະດົກທາງວັດທະນະທໍາ ແລະ ໃນໂອກາດດຽວກັນນີ້,ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ເຊື້ອເຊີນທ່ານເອກອັກຄະລັດຖະທູດ ພ້ອມຄະນະເຂົ້າຮ່ວມທ່ຽວຊົມກິດຈະກໍາສັບປະດາທ່ອງທ່ຽວແຂວງຈໍາປາສັກ ປີ2024 ນຳອີກ.