ການນຳພາຈັດຕັ້ງປະຕິບັດພາລະບົດບາດເປັນເສນາທິການໃຫ້ແກ່ອົງຄະນະພັກແຂວງ ແລະ ອົງການປົກຄອງແຂວງ
18/12/2022
ການນຳພາຈັດຕັ້ງປະຕິບັດພາລະບົດບາດເປັນເສນາທິການໃຫ້ແກ່ອົງຄະນະພັກແຂວງ ແລະ ອົງການປົກຄອງແຂວງ. ຫ້ອງວ່າການແຂວງ ຍາມໃດກໍ່ຖືວ່າການເຮັດໜ້າທີ່, ພາລະບົດບາດເປັນເສນາທິການທີ່ດີແມ່ນເປັນວຽກງານໃຈກາງທີ່ຕ້ອງໄດ້ເອົາໃຈໃສ່ນຳພາ-ຊີ້ນຳຢ່າງເປັນປະຈຳ, ກ່ອນອື່ນໝົດໄດ້ເປັນເຈົ້າການຊ່ວຍຄະນະພັກແຂວງສ້າງແລະປັບປຸງບັນດາຂໍ້ກຳນົດກ່ຽວກັບລະບອບແບບແຜນວິທີນຳພາ ແລະ ວິທີເຮັດວຽກ; ປະສານສົມທົບກັບບັນ ດາພະແນກການ, ອົງການແລະຮາກຖານພັກທົ່ວແຂວງ ເພື່ອສັງລວມສະໜອງຂໍ້ມູນດ້ານເນື້ອໃນໃຫ້ແກ່ການເປີດກອງປະ ຊຸມຄົບຄະນະບໍລິຫານງານພັກແຂວງ-ອົງການປົກຄອງແຂວງໃນແຕ່ລະຄັ້ງ, ເຮັດໃຫ້ເອກະສານສ່ວນໃຫຍ່ທີ່ສະເໜີຕໍ່ບັນດາກອງປະຊຸມເຫຼົ່ານັ້ນນັບມື້ມີຂໍ້ມູນຄົບຖ້ວນ, ຊັດເຈນ, ສາມາດຮັບປະກັນດ້ານເນື້ອໃນດີຂຶ້ນ; ພ້ອມກັນນັ້ນຍັງເຮັດໜ້າທີ່ຕິດຕາມ, ສັງລວມການຜັນແປຂອງສະພາບການທີ່ພົ້ນເດັ່ນທັງຢູ່ພາຍໃນ ແລະ ຕ່າງປະເທດ ສະໜອງໃຫ້ຄະນະປະພັກແຂວງຢ່າງເປັນປະຈຳ ເພື່ອຊີ້ນຳແຕ່ລະຂົງເຂດໃຫ້ຖືກຕ້ອງ ແລະ ຊັດເຈນກວ່າເກົ່າ;ນອກນັ້ນຍັງເປັນເຈົ້າການເຂົ້າຮ່ວມໃນການກະກຽມສະເຫຼີມສະຫຼອງວັນສຳຄັນຕ່າງໆຂອງພັກ, ຂອງຊາດ.
ການບໍລິການຮັບໃຊ້ການນໍາ ເປັນໜຶ່ງໃນພາລະບົດບາດສໍາຄັນທັງເປັນປັດໄຈທີ່ສົ່ງຜົນໂດຍກົງເຖິງຄຸນນະພາບໃນການເຄື່ອນໄຫວນຳພາຊີ້ນຳຂອງຄະນະພັກແຂວງ ກໍ່ຄືບັນດາສະຫາຍການນຳ ເວົ້າສະເພາະ. ໃນໄລຍະຜ່ານມາ, ຄະນະພັກຮາກຖານຫ້ອງວ່າການ ຍາມໃດກໍ່ໄດ້ເອົາໃຈໃສ່ປັບປຸງຄວາມສາມາດ ແລະ ຍົກສູງຄຸນນະພາບຂອງວຽກງານນີ້, ເພື່ອຮັບ ປະກັນການປະຕິບັດບັນດາລະບອບນະໂຍບາຍຕ່າງໆນັບທັງລະບອບທີ່ມີລັກສະນະສະເພາະ ແລະ ລັກສະນະກວມລວມຢ່າງຖືກຕ້ອງ ແລະ ຄົບຖ້ວນເຊັ່ນ: ການປະກອບພາຫະນະ, ອຸປະກອນເຕັກນິກ, ງົບປະມານ, ເນື້ອໃນ ແລະ ບ່ອນເຮັດວຽກເພື່ອອຳນວຍຄວາມສະດວກໃຫ້ແກ່ການເຄື່ອນໃຫວວຽກຂອງການນຳ ຢູ່ພາຍໃນ ແລະຕ່າງປະເທດ, ພ້ອມທັງຮັບປະ ກັນດ້ານພິທີການໃຫ້ມີຄວາມວ່ອງໄວຂຶ້ນ.
ພວກເຮົາຍັງໄດ້ປະສານສົມທົບກັບພະແນກການຕ່າງປະເທດ, ເພື່ອກະກຽມດ້ານເນື້ອໃນ ແລະ ເງື່ອນໄຂຕ່າງໆໃຫ້ແກ່ການພົບປະເຮັດວຽກຂອງການນຳຂັ້ນສູງຂອງແຂວງ ກັບຄະນະນຳຂອງບັນດາປະເທດເພື່ອນມິດ ແລະ ປະເທດໄກ້ຄຽງ, ເຊິ່ງເຮັດໃຫ້ການພົບປະແຕ່ລະຄັ້ງໄດ້ຮັບຜົນສຳເລັດອັນຈົບງາມ, ເພີ່ມຄວາມເຂົ້າອົກເຂົ້າໃຈ ແລະ ເສີມຂະຫຍາຍການຮ່ວມມືໄດ້ເປັນຢ່າງດີ, ນອກນີ້ຍັງໄດ້ມີການປະສານງານກັບບັນດາພາກສ່ວນທີ່ກ່ຽວຂ້ອງອື່ນໆປະຕິບັດບັນດາມາດຕະການປ້ອງກັນ ແລະຮັບປະກັນຄວາມປອດໄພໃນລະດັບສູງໃຫ້ແກ່ການນຳບໍ່ວ່າຈະແມ່ນການດຳລົງຊີວິດ ແລະ ການໄປເຄື່ອນໄຫວວຽກງານຕ່າງໆ, ການຕິດຕາມກວດກາສຸຂະພາບ ຫຼື ປິ່ນປົວຢູ່ພາຍໃນ ແລະ ຕ່າງປະເທດ ຕາມລະບອບນະໂຍບາຍ ແລະ ຕາມສະພາບຕົວຈິງໄດ້ເປັນຢ່າງດີ.
