ໃນວັນທີ 27 ສິງຫາ ຜ່ານມານີ້ ທີ່ແຂວງດົ່ງຖັບ ສສ ຫວຽດນາມ ໄດ້ມີກອງປະຊຸມພົບປະ ແລະພິທີລົງນາມບົດບັນທຶກຊ່ວຍຈຳການຮ່ວມມື ລະຫ່ວາງ ແຂວງຈຳປາສັກ ແຫ່ງ ສປປ ລາວ ແລະ ແຂວງດົ່ງຖັບ ແຫ່ງ ສສ ຫວຽດນາມ ໄລຍະສົກປີ 2022-2025 ຊຶ່ງຝ່າຍແຂວງຈຳປາສັກຂອງລາວ ນຳໂດຍ ສະຫາຍ ວິໄລວົງ ບຸດດາຄຳ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ ແລະ ຝ່າຍແຂວງດົ່ງຖັບ ຂອງຫວຽດນາມ ນຳໂດຍ ສະຫາຍ ເລ ກວັກ ຟອງ ກຳມະການສູນກາງພັກກອມມູນິດຫວຽດນາມ ເລຂາພັກແຂວງ ຫົວໜ້າຄະນະກໍາມະການສະພາແຫ່ງຊາດແຂວງດົ່ງຖັບ ພ້ອມດ້ວຍຄະນະຜູ້ແທນຂອງສອງຝ່າຍເຂົ້າຮ່ວມ.

ໃນກອງປະຊຸມ, ຫົວໜ້າຄະນະຜູ້ແທນສອງຝ່າຍ ໄດ້ລາຍງານສະພາບເສດຖະກິດ-ສັງຄົມ ຂອງແຕ່ລະແຂວງ ແລະ ພ້ອມກັນຕີລາຄາໝາກຜົນການຮ່ວມມື ລະຫວ່າງສອງຝ່າຍ ໃນໄລຍະສົກປີຜ່ານມາ ແລະ ເພື່ອສືບຕໍ່ຮັດແໜ້ນ ແລະ ເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະ ແຂວງຈຳປາສັກ ແລະ ແຂວງດົ່ງຖັບ. ບົນພື້ນຖານລະບຽບ ກົດໝາຍຂອງສອງປະເທດ, ພາລະບົດບາດ ໜ້າທີ່ ສິດ ຂອບເຂດຂອງແຕ່ລະຝ່າຍ. ພາຍຫຼັງໄດ້ຄົ້ນຄວ້າປຶກສາຫາລື, ສອງຝ່າຍໄດ້ເຫັນດີເປັນເອກະພາບກັນ ສືບຕໍ່ຜັນຂະຫຍາຍເນື້ອໃນການຮ່ວມມືໃນໄລຍະສົກປີຕໍ່ໜ້າດ້ານການເມືອງ ສອງຝ່າຍເຫັນດີສືບຕໍ່ຮັກສາການຜັດປ່ຽນການຢ້ຽມຢາມ ແລກປ່ຽນຄະນະຜູ້ແທນແນໃສ່ການຢ້ຽມຢາມພົບປະ, ແລກປ່ຽນບົດຮຽນ, ເສີມຂະຫຍາຍຄວາມເຂົ້າໃຈຊຶ່ງກັນ ແລະກັນ, ເພີ່ມທະວີຄວາມສາມັກຄີແບບພິເສດ ແລະ ຊຸກຍູ້ການຮ່ວມມືໃນແຕ່ລະຂົງເຂດ. ດ້ານເສດຖະກິດ ສືບຕໍ່ຊຸກຍູ້ສົ່ງເສີມ ແລະ ສ້າງເງື່ອນໄຂ ອຳນວຍຄວາມສະດວກໃຫ້ແກ່ບັນດານັກທຸລະກິດຂອງສອງຝ່າຍ; ສອງຝ່າຍເປັນເອກະພາບກັນຄົ້ນຄວ້າ, ສ້າງແຜນການຮ່ວມມືພັດທະນາບັນດາການລົງທຶນ, ການຄ້າ ການບໍລິການ ການທ່ອງທ່ຽວ, ກະສິກຳ ຊຶ່ງໃນນັ້ນສຸມໃສ່ດ້ານເຕັກນິກກະສິກຳການປູກຝັງ, ລ້ຽງສັດ ແລະ ປູກດອກໄມ້ປະດັບ; ການກໍ່ສ້າງຊັບພະຍາກອນມະນຸດ ແຂວງດົ່ງຖັບ ເຫັນດີໃຫ້ການສະໜັບສະໜູນທຶນການສຶກສາຊັ້ນສູງ ຈຳນວນ 10 ທຶນ ໃຫ້ແຂວງຈຳປາສັກ ແລະ ແຂວງຈຳປາສັກ ເຫັນດີສືບຕໍ່ມອບທຶນກໍ່ສ້າງພາສາລາວໃຫ້ແກ່ພະນັກງານ, ນັກສຶກສາຂອງແຂວງດົ່ງຖັບ ຈຳນວນ 2 ທຶນ/ປີ ຫຼື ກໍ່ສ້າງພາສາລາວ ຂັ້ນປະລິນຍາຕີ ຢູ່ທີ່ມະຫາວິທະຍາໄລຈຳປາສັກ ຈຳນວນ 2 ທຶນ. ນອກນັ້ນກໍມີການຮ່ວມມືມິດຕະ ພາບ ແລະ ສະຫວັດດີການສັງຄົມ ແລະ ສືບຕໍ່ຍົກສູງປະສິດທິຜົນການເຄື່ອນໄຫວການທູດປະຊາຊົນໃນການຈັດຕັ້ງຄະນະເຄື່ອນໄຫວພົບປະແລກປ່ຽນມິດຕະພາບການຮ່ວມມື; ພິທີລົງນາມບົດບັນທຶກຊ່ວຍຈຳ ການຮ່ວມມືເທື່ອນີ້, ຕາງໜ້າອົງການປົກຄອງແຂວງຈຳປາສັກ ລົງນາມໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈໍາປາສັກ ແລະ ຕາງໜ້າຄະນະກຳມະການປະຊາຊົນແຂວງດົ່ງຖັບ ລົງນາມໂດຍ ທ່ານ ຟ້າມ ທ໊ຽນ ເຫງ໋ຍ ປະທານຄະນະກໍາມະການປະຊາຊົນແຂວງດົ່ງຖັບ.

(ຂ່າວ-ພາບ: ທັດຊະນະ)