ຫຼາຍພາກສ່ວນມອບ ວັດຖຸ ແລະ ເງິນສົດ ອຸປະຖຳກອງປະຊຸມໃຫຍ່ຂອງອົງຄະນະພັກແຂວງຈຳປາສັກ ຄັ້ງທີ IX
01/09/2025
ບໍລິສັດ ຫົວຫຼົງການຄ້າ ແລະ ການລົງທຶນ ຈຳກັດຜູ້ດຽວ, ບໍລິສັດ ທ່ອງທ່ຽວ SK Travel ແລະ ສູນພາສາຈີນ - ລາວ ປາກເຊ - ຄິວຊີ ໄດ້ຮ່ວມກັນມອບຖັງຂີ້ເຫຍື້ອ ຈຳນວນ 100 ໜ່ວຍ, ຄິດເປັນມູນຄ່າ 100 ລ້ານກີບ ແລະ ສະມາຄົມນັກທຸລະກິດໜຸ່ມແຫ່ງຊາດລາວ ມອບເງິນ 100 ລ້ານກີບ ເພື່ອປະກອບສ່ວນ ຊຸກຍູ້ກອງປະຊຸມໃຫຍ່ ຂອງຜູ້ແທນອົງຄະນະພັກແຂວງ ຈຳປາສັກ ຄັ້ງທີ IX ທີ່ຈະໄຂຂຶ້ນ ໃນທ້າຍເດືອນກັນຍາ 2025 ນີ້. ພິທີມອບ - ຮັບ ເງິນຊຸກຍູ້ກອງປະຊຸມດັ່ງກ່າວ ຈັດຂຶ້ນໃນວັນທີ 29 ສິງຫາ 2025 ຢູ່ຫ້ອງວ່າການແຂວງ,
ຕາງໜ້າມອບໂດຍ ທ່ານ ເຫີ ໝາວ ຫຼົງ ປະທານບໍລິສັດຫົວຫຼົງການຄ້າ ແລະການລົງທຶນ ຈຳກັດຜູ້ດຽວ , ທ່ານ ນາງ ແສງຈັນ ວົງໄຊຄຳ ຜູ້ອຳນວຍການບໍລິສັດ ທ່ອງທ່ຽວ SK Travel, ທ່ານ ນາງ ແກ້ວມຸກດາ ຜັນບົວສາ ຜູ້ອຳນວຍການສູນພາສາຈີນ - ລາວ ປາກເຊ - ຄິວຊີ ແລະ ທ່ານ ນາງ ສຸວາລີ ຄໍາຜຸຍ ປະທານ ສະມາຄົມນັກທຸລະກິດໜຸ່ມ ແຫ່ງຊາດລາວ ແລະ ຕາງໜ້າກ່າວຮັບໂດຍ ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຈຳປາສັກ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ໂອກາດນີ້, ທ່ານ ອາລຸນໄຊ ສູນນະລາດ ກໍໄດ້ສະແດງຄວາມຂອບໃຈເປັນຢ່າງສູງ ມາຍັງທຸກພາກສ່ວນທີ່ໄດ້ໃຫ້ການອຸປະຖຳໃນຄັ້ງນີ້ ເຊິ່ງເປັນການປະກອນສ່ວນອັນສຳຄັນຂອງຜູ້ປະກອບການ, ພາກເອກະຊົນ ຊຸກຍູ້ດ້ານວັດຖຸ ປັບປຸງພື້ນຖານໂຄງລ່າງ, ໂດຍສະເພາະ ໃນການຮັກສາສິ່ງແວດລ້ອມ ຄວາມສະອາດຈົບງາມ ໃນຕົວເມືອງ ແລະ ທຶນຮອນ ໃນການຊຸກຍູ້ ກອງປະຊຸມໃຫຍ່ຂອງອົງຄະນະພັກແຂວງ; ຄະນະພັກ ອົງການປົກຄອງແຂວງຈຳປາສັກ ຈະນຳໃຊ້ວັດຖຸ ແລະ ທຶນດັ່ງກ່າວ ໃຫ້ເກີດປະໂຫຍດສູງສຸດ ເພື່ອເຮັດໃຫ້ການດຳເນີນ ກອງປະຊຸມໃຫຍ່ຄັ້ງທີ IX ຂອງອົງຄະນະພັກ ແຂວງຈຳປາສັກ ໃຫ້ໄປບັນລຸຕາມຈຸດປະສົງ ແລະ ລະດັບຄາດໝາຍ ດ້ວຍຜົນສຳເລັດອັນຈົບງາມ. ໃນວັນດຽວກັນ, ກອງບັນຊາການທະຫານອາກາດ ໄດ້ໃຫ້ ອຸປະຖຳ ເງິນ ຈຳນວນ 20 ລ້ານ ເພື່ອຊຸກຍຸ້ກອງປະຊຸມດັ່ງກ່າວ ນຳອີກ
