ກອງປະຊຸມພົບປະແລກປ່ຽນວຽກງານຫ້ອງວ່າການ 5 ແຂວງ (ເຊກອງ, ຈຳປາສັກ, ສາລະວັນ, ອັດຕະປື ແລະ ສະຫວັນນະເຂດ) ໄດ້ຈັດຂື້ນໃນວັນທີ 30 ພະຈິກ ຜ່ານມາ, ທີ່ແຂວງເຊກອງ ເປັນເຈົ້າພາບ. ໂດຍການເປັນປະທານ ຮ່ວມ ຂອງ ທ່ານຫົວໜ້າຫ້ອງວ່າການແຂວງທັງ 5 ແຂວງ. ມີ ຮອງຫົວໜ້າຫ້ອງວ່າການ ພ້ອມດ້ວຍ ພະນັກງານ-ລັດຖະກອນຂອງຫ້ອງວ່າການທັງໝົດ ເຂົ້າຮ່ວມ.  ກອງປະຊຸມຄັ້ງນີ້ ແມ່ນເພື່ອພົບປະແລກປ່ຽນບົດຮຽນ-ປະສົບການຕົວຈິງໃນການປະຕິບັດໜ້າທີ່ວຽກງານເປັນເສນາທິການຂອງຫ້ອງວ່າການ 5 ແຂວງ ແລະ ເພື່ອເສີມສ້າງຄວາມສາມັກຄີຮັກແພງ, ຄວາມໃກ້ຊິດຕິດແທດກັນດີຂຶ້ນກວ່າເກົ່າ; ກອງປະຊຸມດັ່ງກ່າວ ຜູ້ແທນ 5 ແຂວງໄດ້ພ້ອມກັນປຶກສາຫາລື, ແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ຢ່າງກົງໄປກົງມາ, ຊອກທາງອອກ, ວິທີທາງແກ້ໄຂຮ່ວມກັນ, ພ້ອມທັງຖ່າຍຖອດບົດຮຽນທີ່ດີ ເພື່ອເຮັດໃຫ້ການເປັນເສນາທິການແກ່ການນຳແຂວງ ດີຂຶ້ນກວ່າເກົ່າ, ທັງເພື່ອແນໃສ່ສົ່ງເສີມດ້ານດີ ແລະ ແກ້ໄຂດ້ານອ່ອນ-ຄົງຄ້າງ ທັງເປັນການກະກຽມພື້ນຖານໃຫ້ການເປັນເສນາທິການເຂົ້າຮ່ວມການກະກຽມເນື້ອໃນກອງປະຊຸມໃຫຍ່ອົງຄະນະພັກເມືອງ, ອົງຄະນະພັກແຂວງ ທີ່ຈະມາເຖິງໃນມໍ່ໆນີ້,

ໃນກອງປະຊຸມໄດ້ພ້ອມກັນຮັບຟັງການລາຍງານ 5 ຫົວຂໍ້ໃຫຍ່ ແລະ ຈະໄດ້ສຸມໃສ່ຄົ້ນຄວ້າຊາບຊຶມບາງວຽກສຳຄັນເຊັ່ນ: 1.ການຈັດຕັ້ງປະຕິບັດວຽກງານຕິດຕາມ, ຊຸກຍູ້ການຜັນຂະຫຍາຍບັນດາມະຕິ, ຄຳສັ່ງ, ລະບຽບ-ກົດໝາຍ, ນິຕິກໍາໃຕ້ກົດໝາຍ ແລະ ທິດຊີ້ນຳຂອງສູນກາງພັກ, ລັດຖະບານ ແລະ ການນຳແຂວງໄລຍະຜ່ານມາ ແລະ ໃນຕໍ່ໜ້າ; 2.ສະພາບ ແລະ ບົດຮຽນການກະກຽມດໍາເນີນກອງປະຊຸມອົງການປົກຄອງແຂວງ ປະຈຳເດືອນ, 3 ເດືອນ, 6 ເດືອນ ແລະ ປະຈຳປີ ຕິດພັນກັບການລາຍງານຕໍ່ກອງປະຊຸມສະໄໝສາມັນຂອງສະພາປະຊາຊົນແຂວງແຕ່ລະຄັ້ງ; 3.ຍົກສູງປະສິດທິພາບວຽກງານກໍ່ສ້າງຮາກຖານການເມືອງ, ການເອົາຂໍ້ມູນ, ການສັງລວມລາຍງານ, ການວິເຄາະວິໄຈ, ການສະຫຼຸບ, ການລາຍງານຕໍ່ຂັ້ນເທິງ; 4.ສະພາບ ແລະ ບົດຮຽນການຫັນຫ້ອງວ່າການແຂວງ ເປັນທັນສະໄໝ ແລະ 5.ຍົກສູງປະສິດທິພາບການກະກຽມເນື້ອໃນກອງປະຊຸມຄົບຄະນະບໍລິຫານງານພັກແຂວງ ແລະ ກອງປະຊຸມໃຫຍ່ອົງຄະນະພັກແຂວງ. ກອງປະຊຸມແມ່ນດໍາເນີນເປັນເວລາ 1 ຄາບ. ນອກນັ້ນ ໃນຕອນບ່າຍນີ້ ຍັງໄດ້ຮ່ວມກັນສືບຕໍ່ກິດຈະກຳກິລາມິດຕະພາບ ເພື່ອເສີມສ້າງຄວາມສະມັກຄີຮັກແພງລະຫວ່າງຄະນະພັກ-ຄະນະນໍາ ແລະ ພະນັກງານຫ້ອງວ່າການ 5 ແຂວງ ໃຫ້ມີຄວາມສະໜິດສະໜົມ-ມິດຕະພາບ-ຮັກແພງ ແລະ ເຂົ້າອົກເຂົ້າໃຈກັນຫຼາຍຂື້ນ ໄປຄຽງຄູ່ກັບການສົ່ງເສີມສຸຂະພາບ ແລະ ຮ່າງກາຍໃຫ້ແຂງແຮງ ເພື່ອຮັບປະກັນຄວາມພ້ອມໃຫ້ແກ່ພະນັກງານພວກເຮົາສາມາດຈັດຕັ້ງປະບັດ 3 ພາລະບົດບາດໃຫຍ່: ເປັນເສນາທິການທີ່ດີ, ຜູ້ປະສານງານທີ່ດີ ແລະ ບໍລິການຮັບໃຊ້ທີ່ດີໃຫ້ມີຜົນສຳເລັດຕາມຄາດໝາຍ.