ກົງສູນໃຫຍ່ກໍາປູເຈຍ ປະຈໍານະຄອນປາກເຊ ເຂົ້າອວຍພອນການນຳແຂວງຈຳປາສັກ
11/12/2024
ທ່ານ ກີ ໂມນີຣ໋ວດ ກົງສຸນໃຫຍ່ແຫ່ງ ຣາຊະອານາຈັກກໍາປູເຈຍ ປະຈໍາ ນະຄອນປາກເຊ ແຂວງຈຳປາສັກ ໄດ້ເຂົ້າອວຍພອນການນຳແຂວງຈໍາປາສັກ ເນື່ອງໃນໂອກາດວັນຊາດ ວັນທີ 2 ທັນວາ ຄົບຮອບ 49 ປີ. ໂດຍການຕ້ອນຮັບຂອງ ທ່ານ ອາລຸນໄຊ ສູນນະລາດ ເຈົ້າແຂວງຈຳປາສັກ ພ້ອມດ້ວຍຄະນະ ໃນວັນທີ 6 ທັນວາຜ່ານມາ ທີ່ຫ້ອງວ່າການແຂວງ. ໂອກາດນີ້, ທ່ານ ກົງສູນໃຫຍ່ ໄດ້ສະແດງຄວາມຂອບໃຈຢ່າງສູງຕໍ່ທ່ານ ເຈົ້າແຂວງທີໃຫ້ກຽດຕ້ອນຮັບໃນຄັ້ງນີ້ ແລະ ໃນໂອກາດສົ່ງທ້າຍປີເກົ່າ2024, ຕ້ອນຮັບປີໃໝ່ 2025 ທີ່ຈະມາເຖິງນີ້ ຂໍອວຍພອນໄຊໃຫ້ບັນດາການນຳຂັ້ນແຂວງ ຕະຫລອດຮອດປະຊາຊາຊົນບັນດາເຜົ່າແຂວງຈຳປາສັກ ຈົ່ງມີຄວາມສຸກ ຄວາມຈະເລີນ ມີສຸຂະພາບເຂັ້ມແຂງແຮງ ແລະ ມີຜົນສຳເລັດໃນໜ້າທີ່ທຸກໆດ້ານ. ໂອກາດດຽວກັນນີ້, ທ່ານ ອາລຸນໄຊ ສູນນະລາດ ກໍໄດ້ສະແດງຄວາມຂອບໃຈ, ຊົມເຊີຍ ຕໍ່ທ່ານ ກີ ໂມນີຣ໋ວດ ພ້ອມທັງຕີລາຄາສູງ ໃນຜົນງານການປະສານງານ ຮັດແໜ້ນຄວາມສາມັກຄີ, ຜັນຂະຫຍາຍການຮ່ວມມື ມິດຕະພາບອັນເປັນມູນເຊື້ອ ລະຫວ່າງປະຊາຊົນສອງຊາດ ເວົ້າລວມ, ເວົ້າສະເພາະ ບັນດາແຂວງພາກໃຕ້ ຂອງ ສປປ ລາວ ກັບບັນດາແຂວງທີ່ຮ່ວມມື ຂອງຣາຊະອານາຈັກ ກຳປູເຈຍ ແລະ ຂໍໃຫ້ສືບຕໍ່ເພີ່ມທະວີ ປະສານງານ ຊຸກຍູ້ ຮັດແໜ້ນຄວາມສາມັກຄີ, ຜັນຂະຫຍາຍການຮ່ວມມືມິດຕະພາບ ອັນເປັນມູນເຊື້ອດັ່ງກ່າວນັ້ນ ໃຫ້ນັບມື້ແໜ້ນແຟ້ນຂຶ້ນເລື້ອຍໆ.
