ໃນວັນທີ 20 ທັນວາ 2023, ແຂວງຈຳປາສັກ ໄດ້ຈັດພິທີ ປະກາດແຕ່ງຕັ້ງກຳມະການ ຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບແຂວງ ແລະ ຫົວໜ້າຫ້ອງການຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບແຂວງ, ໂດຍການເປັນປະທານ ຂອງ ສະຫາຍ ສະນັ່ນ ສີພາພົມມະຈັນ ຮອງເລຂາພັກແຂວງ, ຮອງປະທານ ຄະນະກໍາມະການ ປ້ອງກັນຊາດ-ປ້ອງກັນຄວາມສະຫງົບແຂວງ, ຫົວໜ້າຄະນະຈັດຕັ້ງແຂວງ, ມີ ສະຫາຍ ພົນຕີ ສະຫວ່າງໄຊ ສິນນະວົງ ກຳມະການຄະນະພັກກະຊວງປ້ອງກັນປະເທດ, ຫົວໜ້າຫ້ອງການຄະນະກໍາມະການ ປກຊ-ປກສ ສູນກາງ, ສະຫາຍ ພົນຈັດຕະວາ ສຸໄກ ພິມມະສານ ຮອງປະທານ, ຜູ້ປະຈໍາການຄະນະກໍາມະການ ປກຊ-ປກສ ແຂວງ, ຫົວໜ້າການທະຫານກອງບັນຊາການທະຫານແຂວງຈໍາປາສັກ, ມີ ຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບແຂວງ, ບັນດາເລຂາພັກເມືອງ, ເຈົ້າເມືອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.  ໃນພິທີ, ສະຫາຍ ພົນຈັດຕະວາ ສຸໄກ ພິມມະສານ ຮອງປະທານ, ຜູ້ປະຈໍາການຄະນະກໍາມະການ ປກຊ-ປກສ ແຂວງ, ຫົວໜ້າການທະຫານກອງບັນຊາການທະຫານແຂວງຈໍາປາສັກ ໄດ້ຜ່ານບົດຕີລາຄາສະພາບການເຄື່ອນໄຫວ ວຽກງານ ປກຊ-ປກສ ໃນໄລຍະຜ່ານມາ ໂດຍພາຍໃຕ້ການຊີ້ນຳ-ນຳພາຂອງພັກ, ລັດຖະບານກໍ່ຄື ຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບ ແຕ່ລະຂັ້ນ; ຈາກນັ້ນ, ສະຫາຍ ພົນຕີ ສະຫວ່າງໄຊ ສິນນະວົງ ຫົວໜ້າຫ້ອງການຄະນະກໍາມະການ ປກຊ-ປກສ ສູນກາງ ໄດ້ຜ່ານ ມະຕິຕົກລົງ ຄະນະເລຂາທິການສູນກາງພັກສະບັບ, ສະບັບເລກທີ 499/ຄລສພ, ລົງວັນທີ 1 ທັນວາ 2023, ວ່າດ້ວຍການແຕ່ງຕັ້ງ ກຳມະການ ຄະນະກຳມະການ ປ້ອງການຊາດ-ປ້ອງກັນຄວາມສະຫງົບແຂວງ ແລະ   ຂໍ້ຕົກລົງ ຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບ ສູນກາງ, ສະບັບເລກທີ 27/ຄ.ປກຊ-ປກສ, ລົງວັນທີ 20 ພະຈິກ 2023, ວ່າດ້ວຍການແຕ່ງຕັ້ງ ຫົວໜ້າຫ້ອງການຄະນະກຳມະການ ປກຊ-ປກສ ແຂວງ, ໃນນັ້ນໄດ້ຕົກລົງ ແຕ່ງຕັ້ງ ສະຫາຍ ພັນເອກ ທອງສະໄໜ  ສຸກປະເສີດ, ສະຫາຍ ທອງລີ ສີສຸລິດ ເປັນກຳມະການ ຄ.ປກຊ-ປກສ ແຂວງ ແລະ ແຕ່ງຕັ້ງ ສະຫາຍ  ພັນໂທ ພູເວີນ ສຸນນີວົງ ເປັນຫົວໜ້າຫ້ອງການ ຄະນະກຳມະການ ປກຊ-ປກສ ແຂວງຈຳປາສັກ.  ໂອກາດນີ້ ສະຫາຍ ສະນັ່ນ ສີພາພົມມະຈັນ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ກໍາລັງ ປກຊ-ປກສ ແຂວງ ທີ່ສາມາດຍາດໄດ້ຜົນງານຫຼາຍດ້ານໃນໄລຍະທີ່ຜ່ານມາ ສາມາດເຮັດໃຫ້ພາຍໃນແຂວງມີຄວາມສະຫງົບໂດຍພື້ນຖານ, ເສດຖະກິດ-ສັງຄົມມີການຂະຫຍາຍຕົວຢ່າງຕໍ່ເນື່ອງ, ພ້ອມທັງໄດ້ເນັ້ນໃຫ້ບັນດາສະຫາຍທີ່ຖືກແຕ່ງຕັ້ງໜ້າທີ່ ກຳມະການ ແລະ ຄະນະກໍາມະການ ປກຊ-ປກສ ແຂວງ ຕ້ອງເປັນເຈົ້າການ ນຳພາ-ຊີ້ນຳໃນທຸກຂະແໜງການທີ່ກ່ຽວຂ້ອງຈັດຕັ້ງຜັນຂະຫຍາຍແນວທາງ ປກຊ-ປກສ ທົ່ວປວງຊົນຮອບດ້ານຂອງພັກ ສອດຫ້ອຍເຂົ້າໃນຂະບວນການຕົວຈິງໃຫ້ກວ້າງຂວາງ ແລະ ເລິກເຊິງ, ພ້ອມທັງເປັນໃຈກາງປະສານສົມທົບ ສຸມທຸກກໍາລັງແຮງເຮັດໃຫ້ແຂວງມີສະຖຽນລະພາບທາງດ້ານການເມືອງ, ມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍໃນສັງຄົມ, ເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ, ຮັບປະກັນການນໍາພາເດັດຂາດ, ໂດຍກົງຮອດດ້ານຂອງພັກ, ປັບປຸງກໍ່ສ້າງກໍາລັງໃຫ້ມີຄວາມໜັກແໜ້ນ, ເຂັ້ມແຂງ, ມີແບບແຜນທັນສະໄໝ, ຍົກສູງສະຕິກຽມພ້ອມສູ້ຮົບໃນທຸກພາວະ, ພົວພັນຮ່ວມມື ແລະ ຄຽງຄູ່ກັບການພັດທະນາເສດຖະກິດ-ສັງຄົມໃຫ້ມີການພັດທະນາຂຶ້ນໄປເລື້ອຍໆ.