ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ພ້ອມຄະນະ ໄດ້ຕ້ອນຮັບ ທ່ານ ຢູ ບ່ຽງຊອກ (Byungseok Yoo) ອັກຄະລັດຖະທູດ ທີ່ປຶກສາ ສ.ເກົາຫຼີ ປະຈຳ ສປປ ລາວ  ແລະ ທ່ານ ຄິມ ພິວ ຊອງ(Kim Pil Seong) ຫົວໜ້າອົງການສົ່ງເສີມການຄ້າ-ການລົງທຶນ ສ.ເກົາຫຼີ (KOTRA) ປະຈຳ ນະຄອນຫຼວງວຽງຈັນ ພ້ອມຄະນະ ໃນວັນທີ 19 ທັນວາ 2023, ທີ່ຫ້ອງວ່າການແຂວງ. ໃນໂອກາດມາເຄື່ອນໄຫວຢ້ຽມຢາມ ແຂວງຈຳປາສັກ. ທ່ານ ຢູ ບ່ຽງຊອກ ອັກຄະລັດຖະທູດ ທີ່ປຶກສາ ສ.ເກົາຫຼີ ປະຈຳລາວ ໄດ້ສະແດງຄວາມຂອບໃຈຕໍ່ການຕ້ອນຮັບ ແລະ ການມາຢ້ຽມຢາມໃນເທື່ອນີ້ແມ່ນ ເພື່ອ ຊຸກຍູ້ການຮ່ວມມື, ລະຫວ່າງ  ສ.ເກົາຫຼີ ກັບ ແຂວງຈຳປາສັກ, ໂດຍສະເພາະ ດ້ານການຄ້າ-ການລົງທຶນ, ການຜະລິດກະສິກຳ, ເພື່ອການພັດທະນາ ກະສິກຳທັນສະໄໝ, ພ້ອມທັງ ປຶກສາຫາລື ການປັບປຸງການລົງທຶນ ຈາກ ສ.ເກົາຫຼີ ຢູ່ແຂວງຈຳປາສັກ ເພື່ອຊຸກຍູ້ການລົງທຶນໃນລາວ ໃຫ້ນັບມື້ ນັບຫຼາຍຂື້ນ. ໂອກາດນີ້, ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ໄດ້ສະແດງການຕ້ອນຮັບ ແລະ ຕີລາຄາສູງ ຕໍ່ການມາຢ້ຽມຢາມ ແຂວງຈຳປາສັກ ຂອງທ່ານອັກຄະລັດຖະທູດ ທີ່ປຶກສາ ສ.ເກົາຫຼີ ປະຈຳລາວ ພ້ອມຄະນະ ໃນຄັ້ງນີ້, ເຊິ່ງເປັນການຢັ້ງຢືນການຮ່ວມມືດ້ວຍໄມຕີຈິດ, ມິດຕະພາບ ລະຫວ່າງສອງຊາດ ສປປ ລາວ-ສ.ເກົາຫຼີ ຍາມໃດກໍ່ໃຫ້ການຊຸກຍູ້ ແລະ ຊ່ວຍເຫຼືອແກ່ ສປປ ລາວ ເວົ້າລວມ, ເວົ້າສະເພາະແຂວງຈຳປາສັກ, ພ້ອມນັ້ນທ່ານຮອງເຈົ້າແຂວງຈຳປາສັກ ກໍ່ໄດ້ນຳສະເໜີໃຫ້ຮູ້ສະພາບລວມຂອງແຂວງຈຳປາສັກ, ທ່າແຮງ ແລະ ການຂະຫຍາຍຕົວທາງດ້ານເສດຖະກິດຂອງແຂວງ; ສໍາລັບວຽກງານການລົງທຶນ ແມ່ນມີນັກລົງທຶນເອກະຊົນ ເຂົ້າມາລົງທຶນຢູ່ແຂວງຈຳປາສັກ ທັງໝົດຈຳນວນ 663 ໂຄງການ, ມູນຄ່າຕາມການອະນຸຍາດທັງໝົດ 49.667 ຕື້ກີບ ຫຼື ເທົ່າ 5.479 ລ້ານ ໂດລາສະຫາລັດ; ສະເພາະ ການລົງທຶນຂອງ ສ.ເກົາຫຼີ ມີທັງໝົດ 18 ໂຄງການ, ມູນຄ່າອະນຸຍາດ 103 ລ້ານ ກວ່າໂດລາສະຫາລັດ ກວມໃນຂົງເຂດກະສິກຳ, ອຸດສາຫະກໍາ ແລະ ຂົງເຂດບໍລິການ ແລະ ການທ່ອງທ່ຽວ. ນອກຈາກການລົງທຶນຂອງພາກເອກະຊົນ ຂອງ ສ.ເກົາຫຼີແລ້ວ, ລັດຖະບານ ກໍຄືປະຊາຊົນ ສ. ເກົາຫຼີ ຍັງໃຫ້ການສະໜັບສະໜູນ ສປປ ລາວ ກໍຄືແຂວງຈຳປາສັກ ເປັນຕົ້ນ: ໂຄງການກັນເຈື່ອນແຄມຂອງ, ໂຄງການສ້າງຄວາມອາດສາມາດບໍາບັດນໍ້າເປື້ອນ ແລະ ຂີ່ເຫຍື່ອ ເພື່ອປັບປຸງສິ່ງແວດລ້ອມໃນນະຄອນປາກເຊ, ໂຄງການນໍ້າປະປາພາກໃຕ້, ໂຄງການສຶກສາການກໍ່ສ້າງໂຮງໝໍທັນສະໄໝ, ໂຄງການສຶກສາການພັດທະນາໂຄງລ່າງຢູ່ບັນດາແຂວງພາກໃຕ້ ແລະ ອີກຫຼາຍໆ ໂຄງການ.