ເຈົ້າແຂວງຈຳປາສັກ ຕ້ອນຮັບ ປະທານສູນກາງສະຫະພັນແມ່ຍິງລາວ ແລະ ອົງການຈັດຕັ້ງສາກົນ
14/12/2023
ທ່ານ ວິໄລວົງ ບຸດດາຄໍາ ເຈົ້າແຂວງຈຳປາສັກ ຕ້ອນຮັບ ທ່ານ ນາງ ອາລີ ວົງໜໍ່ບຸນທໍາ ປະທານສູນກາງສະຫະພັນແມ່ຍິງລາວ ພ້ອມດ້ວຍ ທ່ານ ເຄນອິຈິ ໂຄບະຢະຊິ ເອກອັກຄະລັດຖະທູດ ຍີ່ປຸ່ນ ປະຈໍາລາວ ແລະ ທ່ານ ບັກຕິອໍ ຄາດິໂຣບ ຕາງໜ້າອົງການສະຫະປະຊາຊາດ ກອງທຶນສໍາລັບປະຊາກອນ (UNFPA) ປະຈຳ ສປປ ລາວ ໃນວັນທີ 13 ທັນວາ 2023 ທີ່ຫ້ອງວ່າການແຂວງຈຳປາສັກ ໃນໂອກາດມາເຄື່ອນໄຫວວຽກງານທີ່ແຂວງຈຳປາສັກ. ໂອກາດນີ້, ທ່ານ ວິໄລວົງ ບຸດດາຄໍາ ເຈົ້າແຂວງຈຳປາສັກ ໄດ້ສະແດງການຕ້ອນຮັບ ແລະ ສະແດງຄວາມຂອບໃຈ ຕໍ່ປະທານສູນກາງສະຫະພັນແມ່ຍິງລາວ ທີ່ໄດ້ເປັນຫ່ວງເປັນໃຍ ໃນການຊີ້ນໍາຢ່າງໃກ້ຊິດ ຕໍ່ແຂວງຈຳປາສັກ ກໍຄືສະຫະພັນແມ່ຍິງແຂວງຈໍາປາສັກ ເວົ້າສະເພາະການຍາດແຍ່ງເອົາການຊ່ວຍເຫລືອດ້ານທຶນຮອນຈາກຕ່າງປະເທດ, ສ້າງສູນຊ່ວຍເຫລືອແມ່ຍິງ ແລະ ເດັກນ້ອຍ ເພື່ອໃຫ້ເປັນສະຖານທີ່ສະເພາະ ບໍລິການໃຫ້ຄໍາປຶກສາແກ່ແມ່ຍິງ ແລະ ເດັກນ້ອຍ ທີ່ໄດ້ຮັບຜົນກະທົບຈາກການໃຊ້ຄວາມຮຸນແຮງ ແນໃສ່ສ້າງຄວາມເຂັ້ມແຂງໃຫ້ເຂົາເຈົ້າ ສາມາດປະກອບອາຊີບ ແລະ ສ້າງຄວາມເຂັ້ມແຂງທາງດ້ານເສດຖະກິດດ້ວຍຕົນເອງ ແລະ ເພິ່ງຕົນເອງໄດ້. ພ້ອມທັງ ສະແດງຄວາມຂອບໃຈ ຕໍ່ເອກອັກຄະລັດຖະທູດ ຍີ່ປຸ່ນ ປະຈໍາລາວ ແລະ ຕາງໜ້າອົງການ UNFPA ປະຈຳ ສປປ ລາວ ທີ່ໄດ້ໃຫ້ການຊ່ວຍເຫລືອ ແຂວງຈຳປາສັກ ແລະ ເຮັດໃຫ້ເກີດມີສູນຊ່ວຍເຫລືອແມ່ຍິງ ແລະ ເດັກ ຢູ່ແຫ່ງນີ້. ໂອກາດນີ້, ທ່ານ ນາງ ອາລີ ວົງໜໍ່ບຸນທໍາ ໄດ້ສະແດງຄວາມຂອບໃຈຕໍ່ການຕ້ອນຮັບ, ພ້ອມທັງ ກ່າວຈຸດປະສົງການລົງເຄື່ອນໄຫວວຽກງານ ທີ່ແຂວງຈໍາປາສັກ ໃນເທື່ອນີ້ ແມ່ນຈະໄດ້ຮ່ວມໃນພິທີເປີດການນໍາໃຊ້ສູນຊ່ວຍຊ່ວຍເຫລືອແມ່ຍິງ ແລະ ເດັກນ້ອຍ ທີ່ຖືກເຄາະຮ້າຍ ຈາກການໃຊ້ຄວາມຮຸນແຮງ ແຂວງຈໍາປາສັກ ໂດຍການສະໜັບສະໜູນ ຈາກ UNFPA ແລະ ລັດຖະບານຍີ່ປຸ່ນ ໃນມູນຄ່າການກໍ່ສ້າງທັງໝົດ 80 ພັນໂດລາສະຫະລັດ. ສູນດັ່ງກ່າວ ສ້າງຂຶ້ນເພື່ອໃຫ້ເປັນສະຖານທີ່ສະເພາະ ບໍລິການໃຫ້ຄໍາປຶກສາແກ່ແມ່ຍິງ ແລະ ເດັກນ້ອຍ ທີ່ໄດ້ຮັບຜົນກະທົບຈາກການໃຊ້ຄວາມຮຸນແຮງ ໄດ້ພັກເຊົາຊົ່ວຄາວ, ໄດ້ຮັບການປົກປ້ອງຊ່ວຍເຫລືອທີ່ຈໍາເປັນທາງດ້ານສັງຄົມ ແລະ ຂະບວນການຍຸຕິທຳ ແນໃສ່ສ້າງຄວາມເຂັ້ມແຂງທາງດ້ານຈິດໃຈໃຫ້ເຂົາເຈົ້າ ສາມາດປະກອບອາຊີບ ແລະ ສ້າງຄວາມເຂັ້ມແຂງທາງດ້ານເສດຖະກິດ ດ້ວຍຕົນເອງ ແລະ ເພິ່ງຕົນເອງໄດ້. ພ້ອມກັນນັ້ນ, ປະທານສູນກາງສະຫະພັນແມ່ຍິງລາວ ຍັງໄດ້ສະແດງຄວາມຂອບໃຈມາຍັງທ່ານເຈົ້າແຂວງ ແລະ ການນຳແຂວງຈຳປາສັກ ທີ່ໄດ້ຊຸກຍູ້ຊີ້ນຳວຽກງານສະຫະພັນແມ່ຍິງລາວ ແລະ ສະໜັບສະໜູນ ການສະໜອງເນື້ອທີ່ດິນປຸກສ້າງ ແລະ ເອື້ອຍອໍານວຍຄວາມສະດວກໃຫ້ໂຄງການດັ່ງກ່າວເປັນຢ່າງດີ.
