ໃນວັນທີ 13 ກໍລະກົດ 2023 ທ່ານ ນາງ ໄຊຍະລິດ ວົງສາລະວັນ ຮອງຫົວໜ້າຫ້ອງວ່າການແຂວງ(ຜູ້ຊີ້ນຳວຽກຄົ້ນຄວ້າ-ສັງລວມ) ໄດ້ໃຫ້ສຳພາດກ່ຽວກັບ ການປະຕິບັດພາລະບົດບາດ ເປັນເສນາທິການ ຂອງຫ້ອງວ່າການແຂວງຈຳປາສັກ ໃຫ້ ຄະນະພັກ-ອົງການປົກຄອງແຂວງ ໄລຍະຜ່ານມາ.  ຫ້ອງວ່າການແຂວງ ເປັນອົງການຈັດຕັ້ງໜຶ່ງ ທີ່ປະຕິບັດໜ້າທີ່ເປັນເສນາທິການໃຫ້ແກ່ຄະນະບໍລິຫານງານພັກແຂວງ, ຄະນະປະຈຳພັກແຂວງ, ເລຂາພັກແຂວງ, ຮອງເລຂາພັກແຂວງ, ອົງການປົກຄອງແຂວງ, ເຈົ້າແຂວງ, ຮອງເຈົ້າແຂວງ ໃນການອຳນວຍ, ຄວບຄຸມ, ຊຸກຍູ້ ແລະ ຕິດຕາມການຈັດຕັ້ງປະຕິບັດມະຕິກອງປະຊຸມໃຫຍ່ຂອງສູນກາງພັກ, ມະຕິກອງປະຊຸມໃຫຍ່ຂອງອົງຄະນະພັກແຂວງ ກໍຄືມະຕິກອງປະຊຸມຄະນະບໍລິຫານງານພັກແຂວງ ແລະອົງການປົກຄອງແຂວງ ໃນແຕ່ລະໄລຍະ, ເປັນໃຈກາງພົວພັນປະສານງານກັບພະແນກການ, ກົມກອງອ້ອມຂ້າງແຂວງ, ນະຄອນ ແລະ 9 ເມືອງ ນັບທັງອົງການຈັດຕັ້ງທັງພາກລັດ ແລະເອກະຊົນ ນັບແຕ່ຂັ້ນສູນກາງ ລົງຮອດທ້ອງຖິ່ນ ແລະ ເປັນຜູ້ບໍລິຫານຮັບໃຊ້ການເຄື່ອນໄຫວວຽກງານຂອງການນຳແຂວງ ຢູ່ພາຍໃນ ແລະຕ່າງປະເທດ.  ຫ້ອງວ່າການແຂວງຈຳປາສັກ ປະກອບມີ 5 ຂະແໜງ ຄື: 1) ຂະແໜງ ຄົ້ນຄ້ວາ - ສັງລວມ; 2) ຂະແໜງຈັດຕັ້ງ ແລະ ກວດກາ; 3) ຂະແໜງກໍ່ສ້າງຮາກຖານການເມືອງ; 4) ຂະແໜງຄຸ້ມຄອງບໍລິຫານ, ພິທີການ ແລະ ການເງິນ; ແລະ 5)ຂະແໜງອະນຸສາວະລີ.

ຂະແໜງຄົ້ນຄວ້າ-ສັງລວມ ຂອງຫ້ອງວ່າການແຂວງ, ມີພາລະບົດບາດເປັນເສນາທິການຊ່ວຍ ຫ້ອງວ່າການແຂວງ,  ກໍ່ຄືຊ່ວຍການນຳຂອງແຂວງ ໃນການຄົ້ນຄວ້າຫັນແນວທາງນະໂຍບາຍ, ມະຕິ, ຄຳສັ່ງຂອງສູນກາງພັກ ມາເປັນແຜນດຳເນີນງານຂອງອົງຄະນະພັກ-ອົງການປົກຄອງແຂວງ; ຊ່ວຍການນຳຄົ້ນຄວ້າແນວທາງຜັນຂະຫຍາຍ ແລະຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງລັດຖະບານ, ຂອງແຂວງ ມາເປັນແຜນວຽກຈຸດສຸມ ແລະໂຄງການລະອຽດຂອງອົງການປົກຄອງແຂວງ. ເປັນໃຈກາງພົວພັນປະສານງານ ກັບພາກສ່ວນກ່ຽວຂ້ອງ ເພື່ອຄົ້ນຄວ້າ-ສັງລວມເກັບກໍາສະພາບການຕ່າງໆ ກໍຄືການຕິດຕາມ, ຊຸກຍູ້ ແລະ ສັງລວມການຈັດຕັ້ງປະຕິບັດມະຕິກອງປະຊຸມ ຄົບຄະນະບໍລິຫານງານພັກແຂວງ ແລະອົງການປົກຄອງແຂວງ ໃນແຕ່ລະໄລຍະ ຈາກຂົງເຂດການເມືອງ, ຂົງເຂດປ້ອງກັນຊາດ-ປ້ອງກັນຄວາມສະຫງົບ, ຂົງເຂດເສດຖະກິດ, ວັດທະນະທໍາ-ສັງຄົມ ແລະ ການປົກຄອງ, ຂົງເຂດນິຕິບັນຍັດ-ຕຸລາການ, ນະຄອນປາກເຊ ແລະ 9 ເມືອງ ເພື່ອສະໜອງຂໍ້ມູນຂ່າວສານ ລາຍງານໃຫ້ຄະນະພັກ-ອົງການປົກຄອງແຂວງ ຢ່າງເປັນປົກກະຕິ. ວຽກງານເປັນເສນາທິການ: ແມ່ນວຽກໜື່ງທີ່ສຳຄັນ ແລະ ເປັນໃຈກາງຂອງຄະນະພັກ-ອົງການປົກຄອງແຂວງ; ຫ້ອງວ່າການແຂວງ ພວກເຮົາຖືສຳຄັນວຽກງານສ້າງ ແລະ ປັບປຸງຍົກລະດັບຄວາມຮູ້, ຄວາມສາມາດໃນການຄົ້ນຄວ້າ-ສັງລວມ, ການວິເຄາະວິໄຈບັນຫາ ແລະ ການສ້າງແຜນ, ໂຄງການຕ່າງໆຊ່ວຍການນຳແຂວງ ຊື່ງເຮັດໃຫ້ຫ້ອງວ່າການແຂວງສາມາດປະຕິບັດພາລະບົດບາດ, ໜ້າທີ່ຂອງຕົນໄດ້ເປັນຢ່າງດີ, ເຊີ່ງໄລຍະຜ່ານມາ ນອກຈາກການລົງຕິດຕາມ, ຊຸກຍູ້ວຽກງານຮອບດ້ານ ຢູ່ຫ້ອງວ່າການນະຄອນ ແລະ 9 ເມືອງ ໃນແຕ່ລະປີແລ້ວ, ພວກເຮົາຍັງໄດ້ ຈັດກອງປະຊຸມຝຶກອົບຮົມ ການສ້າງຄວາມເຂັ້ມແຂງໃຫ້ແກ່ວຽກງານຄົ້ນຄວ້າ-ສັງລວມ ໃຫ້ ຫ້ອງວ່າການນະຄອນ, ຫ້ອງວ່າການ 09 ເມືອງ ແລະ ຫ້ອງການ ຂອງບັນດາພະແນກການ, ກົມກອງອ້ອມຂ້າງແຂວງ ແລະ ຈັດກອງປະຊຸມແລກປ່ຽນ, ຖອດຖອນບົດຮຽນກັບ ຫ້ອງວ່າການ 4 ແຂວງພາກໃຕ້ ເຊິ່ງໃນປີ 2023 ນີ້ ຫ້ອງວ່າການແຂວງ ພວກເຮົາຈະໄດ້ເປັນເຈົ້າພາບ. ນອກຈາກນັ້ນ ການຈັດກອງປະຊຸມຝຶກອົບຮົມ ການຍົກສູງຄຸນນະພາບການເປັນເສນາທິການວຽກງານຄົ້ນຄວ້າ-ສັງລວມວຽກພັກ ແລະ ວຽກກໍ່ສ້າງຮາກຖານການເມືອງ ໃນຄັ້ງນີ້ ກໍແມ່ນໜຶ່ງໃນແຜນງານການສ້າງຄວາມເຂັ້ມແຂງໃຫ້ການເປັນເສນາທິການ.

ສຳລັບການປະຕິບັດພາລະບົດບາດເປັນເສນາທິການ ໄລຍະຜ່ານມາ ມີຜົນສຳເລັດດັ່ງນີ້:

1)  ໄດ້ເປັນເຈົ້າການ ກະກຽມດ້ານເນື້ອໃນ, ລະບຽບວາລະ, ບົດບັນທຶກ, ມະຕິກອງປະຊຸມ ແລະ ແຈ້ງຜົນກອງປະຊຸມຂັ້ນຕ່າງໆຂອງແຂວງ ໂດຍສະເພາະແມ່ນການກະກຽມກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຂວງ ສະໄໝທີ VIII, ກອງປະຊຸມຄົບຄະນະພັກແຂວງ ໃນແຕ່ລະຄັ້ງ, ກອງປະຊຸມຄະນະປະຈຳພັກແຂວງສະໄໝສາມັນ / ວິສາມັນ ແລະ ກອງປະຊຸມເລຂາ - ຮອງເລຂາພັກແຂວງ, ກອງປະຊຸມອົງການປົກຄອງແຂວງ, ກອງປະຊຸມເຈົ້າແຂວງ-ຮອງເຈົ້າແຂວງ, ກອງປະຊຸມສ່ອງແສງປະຈຳເດືອນ ແລະ ກອງປະຊຸມຕ່າງໆທີ່ຈັດຂື້ນໃນແຕ່ລະຄັ້ງ ຢ່າງມີຜົນສຳເລັດຕາມລະດັບຄາດໝາຍ;

2) ເປັນເຈົ້າການໃນການຄົ້ນຄວ້າ, ວິເຄາະ, ວິໄຈ, ກວດຜ່ານທາງດ້ານເຕັກນິກ ແລະ ຮຽບຮຽງເອກະສານໃຫ້ຖືກຕ້ອງຕາມຮູບແບບເອກະສານທາງລັດຖະການ ກ່ອນຈະນຳສະເໜີ, ລາຍງານ, ຂໍຄຳເຫັນ ແລະ ຂໍລາຍເຊັນຈາກຄະນະພັກ-ອົງການປົກຄອງແຂວງ, ຈາກນັ້ນຍັງໄດ້ຊ່ວຍການນໍາຮ່າງມະຕິຕົກລົງ, ຂໍ້ຕົກລົງ, ຄຳສັ່ງ, ຄໍາແນະນຳ, ບົດລາຍງານ, ໜັງສືທາງລັດຖະການ,  ສະໂນດ, ແຈ້ງການ ແລະ ນິຕິກຳອື່ນໆ ແລະແຈ້ງໃຫ້ພະແນກການກົມກອງອ້ອມຂ້າງແຂວງ, 9 ເມືອງ, ນະຄອນປາກເຊ ແລະ ພາກສ່ວນກ່ຽວຂ້ອງຈັດຕັ້ງປະຕິບັດ, ພ້ອມທັງສຳເນົາ ແລະປົກປັກຮັກສາບັນດາຂໍ້ມູນ ແລະເອກະສານຕ່າງໆ ໃຫ້ມີຄວາມປອດໄພ ແລະບໍ່ໃຫ້ເສຍຄວາມລັບ. ໂດຍໃນປີ 2022 ທີ່ຜ່ານມານີ້ ພວກເຮົາໄດ້ຮັບຜິດຊອບຄົ້ນຄວ້າເອກະສານ ທັງໝົດ 2.073 ສະບັບ ແລະ ຮ່າງເປັນນິຕິກຳ ແລະເອກະສານອື່ນ ຂອງ ເລຂາພັກແຂວງ, ເຈົ້າແຂວງ ແລະ ຫ້ອງວ່າການແຂວງ ໄດ້ 1.864 ສະບັບ.

3) ຮັບຜິດຊອບກະກຽມບົດສະຫລຸບຕີລາຄາການນຳພາ-ຊີ້ນຳວຽກງານຮອບດ້ານ ຂອງຄະນະບໍລິຫານງານພັກແຂວງ, ຄະນະປະຈຳພັກແຂວງ, ອົງການປົກຄອງແຂວງ ປະຈຳອາທິດ, ເດືອນ, 3 ເດືອນ, 6 ເດືອນ, 9 ເດືອນ ແລະປະຈຳປີ ລາຍງານຕໍ່ຫ້ອງວ່າການສຳນັກງານນາຍົກລັດຖະມົນຕີ ແລະຫ້ອງວ່າການສູນກາງພັກ ຢ່າງເປັນປົກກະຕິ. ພ້ອມນັ້ນ ກໍ່ຮັບຜິດຊອບກະກຽມ ບົດລາຍງານການຈັດຕັ້ງປະຕິບັດວຽກງານຮອບດ້ານ ຂອງອົງການປົກຄອງແຂວງ ເພື່ອລາຍງານຕໍ່ກອງປະຊຸມສະພາປະຊາຊົນແຂວງ ສະໄໝສາມັນ ໃນແຕ່ລະຄັ້ງ.

4) ເປັນໃຈກາງພົວພັນປະສານງານ ກັບພາກສ່ວນກ່ຽວຂ້ອງ ເພື່ອຄົ້ນຄວ້າ-ສັງລວມ, ເກັບກໍາຂໍ້ມູນຂ່າວສານ, ສະພາບພົ້ນເດັ່ນຕ່າງໆ ໃນຂົງເຂດການເມືອງ, ຂົງເຂດປ້ອງກັນຊາດ-ປ້ອງກັນຄວາມສະຫງົບ, ຂົງເຂດເສດຖະກິດ, ວັດທະນະທໍາ - ສັງຄົມ ແລະ ການປົກຄອງ, ຂົງເຂດນິຕິບັນຍັດ-ຕຸລາການ ແລະ ວຽກງານຮອບດ້ານ ຂອງນະຄອນ ແລະ 9 ເມືອງ ເພື່ອສະໜອງຂໍ້ມູນຂ່າວສານ ລາຍງານໃຫ້ຄະນະພັກ-ອົງການປົກຄອງແຂວງ ຢ່າງເປັນປົກກະຕິ.

5) ຮັບຜິດຊອບສ້າງແຜນເຄື່ອນໄຫວປະຈຳອາທິດ ຂອງ ຄະນະປະຈຳພັກແຂວງ ເພື່ອສະ   ເໜີຂັ້ນເທິງພິຈາລະນາ, ພ້ອມທັງປະສານງານ, ຊຸກຍູ້, ຕິດຕາມ ບັນດາອົງການຈັດຕັ້ງທີ່ຂຶ້ນກັບອົງຄະນະພັກ ໃນການຈັດຕັ້ງປະຕິບັດແຜນດັ່ງກ່າວ. ພ້ອມທັງ ເຂົ້າຮ່ວມຕິດຕາມການເຄື່ອນໄຫວຊີ້ນຳວຽກງານຮອບດ້ານ ຂອງການນຳແຂວງ ຢູ່ພາຍໃນ ແລະຕ່າງປະເທດ.

6) ໄດ້ເປັນເຈົ້າການກະກຽມເນື້ອໃນໂດຍສະເພາະ ບົດລາຍງານສະພາບການຈັດຕັ້ງປະຕິບັດວຽກງານຮອບດ້ານຂອງແຂວງ ໃນແຕ່ລະໄລຍະ ເພື່ອລາຍງານຕໍ່ ກົມການເມືອງສູນກາງພັກ ແລະ ຄະນະຜູ້ແທນຕ່າງໆ ຈາກສູນກາງ ທີ່ມາເຄື່ອນໄຫວຊີ້ນຳວຽກງານ ຢູ່ແຂວງຈຳປາສັກ.

7) ຄົ້ນຄວ້າ ແລະ ປະສານສົມທົບກັບພາກສ່ວນທີ່ກ່ຽວຂ້ອງ ກະກຽມບົດປາໃສ, ບົດໂອ້ລົມ, ບົດຄວາມເຫັນຊີ້ນຳ, ບົດກ່າວເປີດ-ປິດກອງປະຊຸມ, ບົດສຳພາດຂ່າວ ຕໍ່ພາຍໃນ ແລະຕ່າງປະເທດໃຫ້ ການນຳແຂວງ ໄດ້ທັງໝົດ 48 ບົດ.

ການລາຍງານໂດຍຫຍໍ້ ຂອງຂ້າພະເຈົ້າທັງໝົດນັ້ນ ເປັນສ່ວນໜຶ່ງ ຂອງການປະຕິບັດພາລະບົດບາດເປັນເສນາທິການ ໃຫ້ ຄະນະພັກ-ອົງການປົກຄອງແຂວງ ຂອງຫ້ອງວ່າການແຂວງ ໂດຍສະເພາະ ໃນວຽກຄົ້ນຄວ້າ-ສັງລວມ ຕາມຄຳຂວັນທີ່ວ່າ: “ ເປັນເສນາທິການທີ່ດີ, ເປັນຜູ້ປະສານງານທີ່ດີ ແລະ ຜູ້ບໍລິການທີ່ດີ” ເຊິ່ງສອດຄ່ອງກັບແນວທາງນະໂຍບາຍຂອງພັກ ແລະ ການບໍລິຫານຂອງລັດ ທີ່ເນັ້ນປະສິດທິພາບ ແລະ ປະສິດທິຜົນ ດັ່ງນັ້ນ ຫ້ອງວ່າການແຂວງ ຈຶ່ງໄດ້ສ້າງແຜນການຈັດຝຶກອົບຮົມ ເພື່ອເພີ່ມຄວາມຮູ້, ທັກສະ ໃຫ້ພະນັກງານທີ່ຮັບຜິດຊອບວຽກດັ່ງກ່າວ ພ້ອມທັງຖືເປັນການຖອດຖອນເອົາບົດຮຽນທີ່ດີເລີດ ຈາກຫ້ອງວ່າການສູນກາງພັກ ເພື່ອຜັນຂະຫຍາຍໄປສູ່ຫ້ອງວ່າການນະຄອນ ແລະ ບັນດາເມືອງ  ແນໃສ່ເປັນການສ້າງຄວາມເຂັ້ມແຂງ ໃຫ້ລະບົບການບໍລິຫານລັດຂັ້ນທ້ອງຖິ່ນໃຫ້ມີຜົນສຳເລັດສູງກວ່າເກົ່າ.