ເຈົ້າແຂວງຈຳປາສັກ ຕ້ອນຮັບ ຄະນະຊ່ຽວຊານ ຈາກສູນມໍຣະດົກໂລກ ອົງການອຸຍແນັສໂກ
06/12/2023
ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ຕ້ອນຮັບ ການເຂົ້າຢ້ຽມຂ່ຳນັບ ຂອງ ຄະນະຊ່ຽວຊານ ຈາກສູນມໍລະດົກໂລກ ອົງການອຸຍແນັສໂກ, ນຳໂດຍ ທ່ານ ນາງ ນາໂອະ ຮາຢ່າຊິ (Nao HAYASHI) ຊ່ຽວຊານສະເພາະດ້ານວັດທະນະທຳ (ຂົງເຂດປະເທດອາຊີ-ປາຊີຟິກ ແລະ ປະເທດລຸ່ມແມ່ນ້ຳຂອງ), ສູນມໍລະດົກໂລກ ອົງການອຸຍແນັສໂກ ໃນວັນທີ 5 ທັນວາ 2023 ນີ້ ທີີ່ຫ້ອງວ່າການແຂວງ. ໃນໂອກາດມາຕິດຕາມກວດກາ ການຈັດຕັ້ງປະຕິບັດບັນດາໂຄງການຮ່ວມມື ທີ່ແຂວງຈຳປາສັກ. ທ່ານ ນາງ ນາໂອະ ຮາຢ່າຊິ ໄດ້ກ່າວຄວາມຂອບໃຈທີ່ໃຫ້ການຕ້ອນຮັບ, ພ້ອມທັງ ໄດ້ຍົກໃຫ້ເຫັນເຖິງຄວາມເປັນມາ ແລະ ບົດບາດອັນໂດດເດັ່ນຂອງໂຄງການຮ່ວມມືສາກົນ, ການອະນຸລັກແຫຼ່ງມໍລະດົກໂລກວັດພູຈໍາປາສັກ ຊຶ່ງໄດ້ຖືກຈົດທະບຽນເຂົ້າເປັນ ແຫຼ່ງມໍລະດົກໂລກ ຂອງອົງການອຸຍແນັສໂກ ໃນປີ 2001 ແລະ ການມາເຄື່ອນໄຫວຄັ້ງນີ້ ຈະໄດ້ຕິດຕາມກວດກາ ການຈັດຕັ້ງປະຕິບັດບັນດາໂຄງການຮ່ວມມືສາກົນ ແລະ ຕິດຕາມສະພາບການອະນຸລັກແຫຼ່ງມໍລະດົກໂລກວັດພູຈໍາປາສັກ ເປັນຕົ້ນຢ້ຽມຢາມໂຄງການ ຮ່ວມມືລາວ-ອີນເດຍ, ຢ້ຽມຢາມໂຄງການຮ່ວມມືລາວ - ສ ເກົາຫຼີ ການປະຕິສັງຂອນໂຮງນາງສີດາ,ໂຄງການຮ່ວມມືລາວ-ຝຣັ່ງ (ໂຄງການຈໍາປາ), ລົງຕິດຕາມ ໂຄງການການວາງທໍ່ນໍ້າປະປາໆ ຈາກວັດພູເຂົ້າສູ່ຕົວເມືອງຈໍາປາສັກ. ນອກຈາກນັ້ນ ຍັງຈະໄດ້ລົງຢ້ຽມຢາມຫໍພິພິທະພັນວັດພູ, ຢ້ຽມຢາມເບິ່ງໂຄງການປູກຕົ້ນ ຈໍາປາ. ໂອກາດນີ້, ທ່ານ ວິໄລວົງ ບຸດດາຄຳ ໄດ້ສະແດງການຕ້ອນຮັບ ແລະ ເອກະພາບຕໍ່ຄຳເຫັນ ແລະ ແຜນເຄື່ອນໄຫວຂອງທ່ານ ນາງ ນາໂອະ ຮາຢ່າຊິ ພ້ອມດ້ວຍຄະນະຊ່ຽວຊານ ຈາກສູນມໍລະດົກໂລກ ອົງການອຸຍແນັສໂກ ໃນຄັ້ງນີ້, ພ້ອມນັ້ນ ກໍຊົມເຊີຍມາຍັງ ກົມມໍຣະດົກ, ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ສູນມໍລະດົກໂລກ ອົງການອຸຍແນັສໂກ ທີ່ໄດ້ຍາດແຍ່ງທຶນຮອນ ແລະ ຊ່ວຍຊຸກຍູ້ໃຫ້ການສະໜັບສະໜູນປະກອນສ່ວນເຂົ້າໃນການພັດທະນາການທ່ອງທ່ຽວໃຫ້ມີຄວາມຍືນຍົງຕາມທິດ ສົ່ງເສີມການທ່ອງທ່ຽວທຳມະຊາດ, ວັດທະນະທຳ ແລະ ປະຫວັດສາດ ທີ່ສຳຄັນຂອງແຂວງ. ພ້ອມກັນນັ້ນ, ທ່ານເຈົ້າແຂວງຈຳປາສັກ ຍັງມີບາງຂໍ້ສະເໜີ ຕໍ່ສູນມໍຣະດົກໂລກ ອົງການອຸຍແນັສໂກ ໃນການປົກປັກຮັກສາ ແລະ ພັດທະນາ ແຫຼ່ງມໍຣະດົກໂລກວັດພູຈໍາປາສັກ ເຊັ່ນ: ເອກະພາບໃນການກຳນົດຂອບເຂດເນື້ອທີ່ປົກປັກຮັກສາ, ພັດທະນາ ແລະ ສ້າງສິ່ງອຳນວຍຄວາມສະດວກຕ່າງໆໃຫ້ແກ່ນັກທ່ອງທ່ຽວ.
