ກອງປະຊຸມ ພົບປະ ເພື່ອຕີລາຄາສະພາບການຈັດຕັ້ງປະຕິບັດ ບົດບັນທຶກການຮ່ວມມື ລະຫວ່າງ ນະຄອນຫລວງວຽງຈັນ(ນວ) ແລະ ແຂວງຈໍາປາສັກ ທີ່ໄດ້ລົງນາມ ໃນປີ 2022 ຜ່ານມາ, ໄດ້ຈັດຂື້ນວັນທີ 6 ກັນຍາ 2023 ທີ່ແຂວງຈຳປາສັກ ໂດຍມີ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ, ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ແລະ ຄະນະຜູ້ແທນຂອງສອງທ້ອງຖິ່ນ ເຂົ້າຮ່ວມ.  ໃນການພົບປະນີ້, ສອງຝ່າຍຕີລາຄາສະພາບການຈັດຕັ້ງປະຕິບັດ ແຜນການຮ່ວມມື ທີ່ໄດ້ເຊັນບົດບັນທຶກຮ່ວມມືກັນ ໃນ 4 ຂົງເຂດຄື: ຂົງເຂດອຸດສາຫະກໍາ ແລະ ການຄ້າ, ຂົງເຂດກະສິກໍາ ແລະ ປ່າໄມ້, ຂົງເຂດຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແລະ ຂົງເຂດໂຍທາທິການ ແລະ ຂົນສົ່ງ. ຜ່ານການຈັດຕັ້ງປະຕິບັດ ໃນໄລຍະ 1 ປີກວ່າຜ່ານມາ ເຫັນວ່າ ຂົງເຂດອຸດສາຫະກໍາ ແລະ ການຄ້າ ໄດ້ປະຕິບັດວຽກງານລະອຽດຮ່ວມກັນ, ໂດຍມີພົບປະແລກປ່ຽນບົດຮຽນໃນການສ້າງຕະຫລາດຈໍາໜ່າຍສິນຄ້າ, ການຂົນສົ່ງ ແລະ ດັດສົມສິນຄ້າລະຫວ່າງ ແຂວງຈໍາປາສັກ ແລະ ນະຄອນຫລວງວຽງຈັນ. ໃນນີ້, ສິນຄ້າທີ່ ນະຄອນຫລວງວຽງຈັນ ສົ່ງເຂົ້າຕະຫລາດ ແຂວງຈໍາສັກ ມີສິນຄ້າອຸດສາຫະກໍາ ແລະ ກະສິກໍາ; ການຮ່ວມມື ຂົງເຂດກະສິກໍາ ແລະ ປ່າໄມ້ ແມ່ນ ເປັນເອກະພາບກັນ ຊຸກຍູ້ສົ່ງເສີມການຜະລິດກະສິກໍາ ເພື່ອເປັນສິນຄ້າ ໂດຍສະເພາະ ສິນຄ້າທີ່ນະຄອນຫລວງຕ້ອງການ, ນະຄອນ ຫລວງວຽງຈັນ ໄດ້ສ້າງແຜນສົ່ງເສີມການຜະລິດ ເພື່ອສະໜອງໃຫ້ຕະຫລາດແຂວງຈໍາປາສັກ ຕາມການຕົກລົງ ຂອງສອງຝ່າຍ ໄດ້ວາງຄາດໝາຍການຜະລິດໄຂ່ ເພື່ອສົ່ງມາຕະຫລາດແຂວງຈໍາປາສັກ 144.000 ແຕະຕໍ່ປີ, ຜ່ານການຈັດຕັ້ງປະຕິບັດຕົວຈິງ ເຫັນວ່າ ສະໜອງໄດ້ 186.100 ແຕະຕໍ່ປີ ລື່ນແຜນທີ່ວາງໄວ້ 29%. ສໍາລັບການຮ່ວມມື ລະຫວ່າງ ຂົງເຂດຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແລະ ຂົງເຂດໂຍທາທິການ ແລະ ຂົນສົ່ງ ກໍໄດ້ຜັນຂະຫຍາຍ ແຕ່ກໍຍັງບໍ່ທັນໄດ້ມີການແລກປ່ຽນ ເພື່ອປຶກສາຫາລື ສ້າງແຜນການຈັດຕັ້ງປະຕິບັດວຽກຮ່ວມກັນ.  ເພື່ອບັນລຸບົດບັນທຶກການຮ່ວມມື ໃນປີ 2022, ທັງສອງທ້ອງຖິ່ນ ເຫັນດີເປັນເອກະພາບສືບຕໍ່ການຮ່ວມມື ໃນ 4 ຂົງເຂດ; ສໍາລັບ ການຮ່ວມມື ໃນຂົງເຂດໂຍທາທິການ ແລະ ຂົນສົ່ງ ໃຫ້ເພີ່ມການແລກປ່ຽນບົດຮຽນເຊິ່ງກັນ ແລະ ກັນ ໃນການວາງແຜນ-ຄຸ້ມຄອງຜັງເມືອງ, ການພັດທະນາໂຄງລ່າງພື້ນຖານ, ລວມທັງການຄຸ້ມຄອງລະບົບຂົນສົ່ງ ຢູ່ໃນຕົວເມືອງ. ພ້ອມນີ້, ຫົວໜ້າຄະນະຜູ້ແທນ ສອງຝ່າຍ ໄດ້ລົງນາມບົດບັນທຶກ ແລະ ເຫັນດີ ໃຫ້ມີການຮ່ວມມື ຕື່ມອີກ 2 ຂົງເຂດຄື: ຂົງເຂດການເງິນ ແລະ ຂົງເຂດເຂດເສດຖະກິດພິເສດ, ເຫັນດີ ໃຫ້ມີການແລກປ່ຽນ ແລະ ສ້າງຄວາມເຂັ້ມແຂງ ວຽກງານການຈັດເກັບລາຍຮັບ, ຈະແລກປ່ຽນຂໍ້ມູນ, ການກວດກາ ແລະ ຄົ້ນຄວ້າ ການເກັບລາຍຮັບ ຈາກຫົວໜ່ວຍທຸລະກິດ; ໃຫ້ມີການແລກປ່ຽນບົດຮຽນ ໃນການຄຸ້ມຄອງ ແລະ ພັດທະນາເຂດເສດຖະກິດພິເສດ ເປັນຕົ້ນ ການສົ່ງເສີມການລົງທຶນ, ກົນໄກການບໍລິການປະຕູດຽວ, ການຄຸ້ມຄອງສິ່ງແວດລ້ອມ ແລະ ການສະໜອງ-ຄຸ້ມຄອງແຮງງານ ໃຫ້ທຸລະກິດ ທີ່ເຄື່ອນໄຫວໃນເຂດເສດຖະກິດພິເສດ.  ໃນໂອກາດທີ່ມາຢ້ຽມຢາມ ແລະ ເຮັດວຽກຢູ່ແຂວງຈຳປາສັກ ໃນຄັ້ງນີ້, ອົງການປົກຄອງນະຄອນຫລວງວຽງຈັນ ຮ່ວມກັບ ຄະນະກຳມະການໂອແລມປິກແຫ່ງຊາດ ມອບເງິນປະກອບສ່ວນໃຫ້ເມືອງໂຂງ ຈຳນວນ 150 ລ້ານກີບ ເພື່ອກະກຽມພິທີສະຫລອງວັນໂອແລມປິກແຫ່ງຊາດລາວ ຄົບຮອບ 45 ປີ ຕື່ມອີກ.