ກອງປະຊຸມໃຫຍ່ ຄັ້ງທີ VI ຂອງສະຫະພັນແມ່ຍິງຮາກຖານຫ້ອງວ່າການແຂວງ ຈຳປາສັກ ໄດ້ຈັດຂຶ້ນໃນ ວັນທີ 27 ຕຸລາ 2023 ໂດຍການເຂົ້າຮ່ວມຂອງ ທ່ານ ນາງ ເຕດາວັນ ແກ້ວພິລາວັນ ປະທານສະຫະພັນແມ່ຍິງແຂວງ, ທ່ານ ທອງລີ ສີສຸລິດ ຫົວໜ້າຫ້ອງວ່າການແຂວງ, ທ່ານ ນາງ ວິໄລວັນ ເພັງແສງໃສ ຮັກສາການຫົວໜ້າຂະແໜງຄຸ້ມຄອງບໍລິຫານ, ພິທີການ ແລະ ການເງິນ, ປະທານສະຫະພັນແມ່ຍິງຮາກຖານຫ້ອງວ່າການແຂວງ ພ້ອມດ້ວຍສະມາຊິກ ສະຫະພັນແມ່ຍິງ ແລະພາກສ່ວນທີ່ກ່ຽວຂ້ອງ ເຂົ້າຮ່ວມ.  ໂອກາດນີ້, ທ່ານ ນາງ ວິໄລວັນ ເພັງແສງໃສ ກ່າວວ່າ: ກອງປະຊຸມຄັ້ງນີ້ ໄດ້ສັງເກດຕີລາຄາ ແລະ ທົບທວນຄືນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ V ຂອງສະຫະພັນແມ່ຍິງຮາກຖານຫ້ອງວ່າການແຂວງ ໃນໄລຍະຜ່ານມາ ແລະ ພ້ອມກັນຄົ້ນຄວ້າ, ຮັບຮອງເອົາບົດລາຍງານການ ເມືອງທັງສອງພາກ, ແຜນການໃນຕໍ່ໜ້າ, ພ້ອມກັນນີ້ ຍັງໄດ້ພ້ອມກັນໃຊ້ສິດ ປ່ອນບັດເລືອກຕັ້ງເອົາຄະນະຊຸດໃໝ່ ເພື່ອເຮັດໜ້າທີ່ ນຳພາ-ຊີ້ນຳຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ ໃຫ້ປະກົດຜົນເປັນຈິງ.  ຜ່ານບົດລາຍງານການເມືອງ, ສະຫຼຸບຕີລາຄາຜົນງານການເຄື່ອນໄຫວວຽກງານ ຕະຫຼອດໄລຍະ 5 ປີ ຜ່ານມາ ໄດ້ຍົກໃຫ້ເຫັນເຖິງ ບົດບາດ ການນຳພາຂອງຄະນະຮາກຖານສະຫະພັນຍິງຫ້ອງວ່າການແຂວງ ໂດຍ ເອົາໃຈໃສ່ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VII ຂອງສະຫະພັນແມ່ຍິງແຂວງ ໄປຄຽງຄູ່ກັບການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ V ຂອງຮາກຖານສະຫະພັນແມ່ຍິງຫ້ອງວ່າການແຂວງ ວາງອອກ ເພື່ອຊີ້ນໍາສະຫະພັນແມ່ຍິງເຄື່ອນໄຫວຕາມພາລະບົດບາດໜ້າທີ່ດ້ວຍຄວາມຮັບຜິດຊອບສູງ. ການນໍາພາດ້ານການເມືອງ-ແນວຄິດ, ນໍາພາວຽກງານປັບປຸງ ແລະ ຂະຫຍາຍການຈັດຕັ້ງ, ກໍ່ສ້າງພະນັກງານ ແມ່ນຖືສໍາຄັນ ລະບົບການດໍາເນີນຊີວິດການເມືອງປະຈຳເດືອນ, ການສຳຫລວດກວດກາຕີລາຄາການຈັດຕັ້ງປະຕິບັດວຽກງານຂອງສະມາຊິກ ເພື່ອເຫັນໄດ້ບັນຫາດ້ານດີ, ດ້ານອ່ອນ, ຂໍ້ຄົງຄ້າງ ທີ່ຈະຕ້ອງໄດ້ປັບປຸງແກ້ໄຂໃນຕໍ່ໜ້າ.

ປັດຈຸບັນ ຈຳນວນສະມາຊິກແມ່ຍິງຮາກຖານຫ້ອງວ່າການແຂວງ ມີທັງໝົດ 34 ສະຫາຍ ແລະ ໄດ້ເອົາໃຈໃສ່ ໃຫ້ເອື້ອຍນ້ອງແມ່ຍິງໄດ້ຍົກລະດັບດ້ານວິຊາສະເພາະ ແລະ ລະດັບທິດສະດີການເມືອງ ໂດຍ ຈົບ ປະລິນຍາໂທ 3 ສະຫາຍ, ປະລິນຍາຕີ 26 ສະຫາຍ, ຊັ້ນສູງ ຈຳນວນ 4 ສະຫາຍ; ລະດັບທິດສະດີການເມືອງ ຂັ້ນກາງ 1 ສະຫາຍ, ຂັ້ນຕົ້ນ 6 ສະຫາຍ ແລະ ບໍາລຸງ 5 ສະຫາຍ. ສຳລັບການກໍ່ສ້າງພະນັກງານເພດຍິງ, ສະມາຊິກສະຫະພັນແມ່ຍິງ ມີລັດຖະກອນເພດຍິງ 30 ສະຫາຍ, ກວມເອົາ 40% ຂອງລັດຖະກອນໃນຫ້ອງວ່າການແຂວງ ໂດຍຄະນະສະຫະພັນແມ່ຍິງທີ່ຢູ່ໃນຕຳແໜ່ງນຳພາ-ຄຸ້ມຄອງ 4 ສະຫາຍ.  ໃນກອງປະຊຸມ ຍັງໄດ້ມີການປ່ອນບັດ ເລືອກເອົາຄະນະສະຫະພັນແມ່ຍິງຮາກຖານຫ້ອງວ່າການແຂວງ ຊຸດໃໝ່ ໂດຍເຫັນດີເປັນເອກະພາບເລືອກເອົາ ທ່ານ ນາງ ວິໄລວັນ ເພັງແສງໃສ ເປັນປະທານສະຫະພັນແມ່ຍິງຮາກຖານ, ທ່ານ ນາງ ແກ້ວມະນີ ແກ້ວມະນີວົງ ເປັນຮອງປະທານ, ທ່ານ ນາງ ສຸກສະໃໝ ໄຊຄູນຄຳ ເປັນຮອງປະທານ ທັງເປັນປະທານກວດກາ, ທ່ານ ນາງ ພອນທິບ ວັງກອນວິໄລ ແລະ ທ່ານ ນາງ ລຸນນີ ໄຊດຳລົງ ເປັນຄະນະ. ພ້ອມດຽວກັນນີ້ ໃນກອປະຊຸມ ຍັງໄດ້ວາງທິດທາງແຜນການເຄື່ອນໄຫວໃນໄລຍະ 5 ປີຕໍ່ໜ້າ (2023-2027) ໂດຍ ມີຄາດໝາຍສູ້ຊົນ ຈະໄດ້ກໍ່ສ້າງອົງການຈັດຕັ້ງສະຫະພັນແມ່ຍິງໃຫ້ມີຄວາມເຂັ້ມແຂງໜັກແໜ້ນ ເພື່ອເປັນເສນາທິການໃຫ້ແກ່ຄະນະພັກ, ຮັບປະກັນໃຫ້ໄດ້ໜ່ວຍ 3 ດີ ແລະ ສ້າງໜ່ວຍພັກໃຫ້ເປັນໜ່ວຍພັກປອດໃສ ເຂັ້ມແຂງ ໜັກແໜ້ນ, ປັບປຸງ ແລະ ຂະຫຍາຍການຈັດຕັ້ງສະຫະພັນແມ່ຍິງ, ກໍ່ສ້າງພະນັກງານເພດຍິງໃຫ້ມີຄວາມໜັກແໜ້ນເຂັ້ມແຂງທາງດ້ານປະລິມານ ແລະ ຄຸນນະພາບ.