ກອງປະຊຸມທາບທາມ ຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນຄະນະບໍລິຫານງານພັກແຂວງຈຳປາສັກ ກາງສະໄໝທີ VIII ຈັດຂຶ້ນໃນວັນທີ 16-20 ພຶດສະພາ 2023 ໂດຍໃຫ້ກຽດເຂົ້າຮ່ວມຂອງ ສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ຮອງປະທານປະ ເທດ, ສະຫາຍ ວິໄລວົງ ບຸດດາຄຳ ກຳມະການສູນກາງພັກ, ເລຂາພັກແຂວງ, ເຈົ້າແຂວງຈຳປາສັກ, ມີບັນດາຮອງເລຂາພັກແຂວງ, ຄະນະປະຈຳພັກແຂວງ, ກຳມະການພັກແຂວງ, ຄະນະຮັບຜິດຊອບຂັ້ນສູນກາງ-ຂັ້ນແຂວງ, ຜູ້ແທນທີ່ມາຈາກພາກສ່ວນອ້ອມຂ້າງແຂວງ, ເມືອງ ແລະ ນະຄອນ ເຂົ້າຮ່ວມ.  ສະຫາຍ ວິໄລວົງ ບຸດດາຄຳ ໄດ້ກ່າວເປີດກອງປະຊຸມ ບາງຕອນສຳຄັນວ່າ: ການດຳເນີນກອງປະຊຸມຄົບຄະນະບໍລິຫານງານພັກແຂວງ ກາງສະໄໝທີ VIII ໂດຍສະເພາະ ໃນວາລະທີ 1 ຊຶ່ງແມ່ນກອງປະຊຸມທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນຄະນະບໍລິຫານງານພັກແຂວງ ກາງສະໄໝ ໃນຄັ້ງນີ້ ແມ່ນການຈັດຕັ້ງປະຕິບັດຕາມກົດລະບຽບຂອງພັກ ກໍຄື ຄຳສັ່ງ, ຄຳແນະນຳຂອງສູນກາງພັກ ແລະ ແມ່ນການກວດກາຕີລາຄາ ແລະ ທົດທວນຄືນໝາກຜົນແຫ່ງການຊີ້ນຳ-ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ກົດລະບຽບພັກ, ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ, ແຜນພັດທະນາເສດຖະກິດສັງຄົມ 5 ປີ ຂອງອົງຄະນະພັກແຂວງຕະ ຫລອດໄລຍະແຫ່ງການນຳພາຈັດຕັ້ງປະຕິບັດເນື້ອໃນດັ່ງກ່າວ ໃນ 2 ປີເຄິ່ງຜ່ານມາ ຢ່າງຮອບດ້ານ, ຖືກ ຕ້ອງ ແລະ ພາວະວິໄສ, ຊອກໃຫ້ເຫັນດ້ານຜົນສຳເລັດທີ່ຕັ້ງໜ້າໃນແຕ່ລະຂົງເຂດວຽກງານ ເພື່ອສືບຕໍ່ເສີມຂະຫຍາຍ ແລະ ຍົກລະດັບ, ດັດປັບບັນດາເນື້ອໃນ, ວິທີການ, ມາດຕະການຈັດຕັ້ງປະຕິບັດໃນຕໍ່ໜ້າໃຫ້ມີປະສິດທິຜົນສູງຂຶ້ນກວ່າເກົ່າ, ພ້ອມທັງຕີລາຄາຊອກໃຫ້ເຫັນບັນດາບັນຫາຈຸດອ່ອນ, ສາເຫດ, ທັງຊອກໃຫ້ເຫັນຢ່າງເລິກເຊິ່ງ ປັດໄຈທີ່ພົວພັນເຖິງບັນຫາດັ່ງກ່າວ ເພື່ອມີວິທີແກ້ໄຂຢ່າງຖືກຕ້ອງ, ສອດຄ່ອງ ແລະ ທັນການ. ອີກດ້ານໜຶ່ງການດຳເນີນກອງປະຊຸມກາງສະໄໝ ແມ່ນການສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອບົດຮຽນການນຳພາອັນດີງາມຂອງພັກໃນໄລຍະຜ່ານມາ ໃຫ້ມີການຫັນປ່ຽນທີ່ຕັ້ງໜ້າເສີມຂະຫຍາຍມູນເຊື້ອ ແລະ ຜົນງານດ້ານດີ ໃນການຈັດຕັ້ງປະຕິບັດໃນໄລຍະຜ່ານມາ. ພ້ອມກັນນັ້ນ, ກໍເພື່ອປັບປຸງແກ້ໄຂຈຸດອ່ອນ, ຂໍ້ບົກຜ່ອງ ແລະ ສິ່ງທ້າທາຍທົດສອບທີ່ເປັນໄພອັນ ຕະລາຍຕໍ່ພັກເຮົາໃຫ້ມີການຫັນປ່ຽນທີ່ຕັ້ງໜ້າດ້ວຍຈິດໃຈບຸກທະລຸ ແນໃສ່ເພື່ອສ້າງ ແລະ ຍົກສູງຄວາມສາມາດນຳພາຂອງພັກ, ຄວາມເປັນແບບຢ່າງນຳໜ້າຂອງ ບັນດາສະຫາຍຄະນະບໍລິຫານງານພັກແຂວງແຕ່ລະສະຫາຍ, ສ້າງຄວາມເອກະພາບ ແລະ ຄວາມຕັດສິນໃຈສູງໃນທົ່ວອົງຄະນະພັກແຂວງ, ເຮັດໃຫ້ພັກມີຄວາມປອດໃສ, ໜັກແໜ້ນ, ເຂັ້ມແຂງ ທັງເປັນການຍົກສູງພາລະບົດບາດຄວາມສາມາດນຳພາຂອງຄະນະພັກ ໃຫ້ສົມຄູ່ກັບການເລັ່ງທວງຂອງໜ້າທີ່ການເມືອງໃນໄລຍະໃໝ່, ສ້າງໄດ້ຄວາມສາມັກຄີເປັນປຶກແຜ່ນພາຍໃນພັກ, ຄວາມເປັນແບບຢ່າງນຳໜ້າຂອງຄະນະພັກ ພ້ອມທັງຕີຖອຍປະກົດການເຊື່ອມຄຸນປ່ຽນທາດ, ການຫັນປ່ຽນດ້ວຍຕົນເອງ, ກຳຈັດປັດເປົ່າໄກ່ເກ່ຍບັນດາຂໍ້ຂາດຕົກບົກຜ່ອງ, ປະ ກົດການຫຍໍ້ທໍ້ພາຍໃນພັກໃຫ້ຫລຸດລົງ.  ກອງປະຊຸມນີ້, ໄດ້ຮັບຟັງການຜ່ານຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 268/ຄລສພ, ລົງວັນທີ 20 ມັງກອນ 2023 ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ແຕ່ລະຂັ້ນ, ຜ່ານມາດຕະຖານຄະນະບໍລິຫານງານພັກແຂວງ, ສິດ ແລະ ໜ້າທີ່ຂອງຄະນະພັກດັ່ງກ່າວ, ຂໍ້ຫ້າມສຳລັບສະມາຊິກພັກ ແລະ ມີການປ່ອນບັດທາບທາມລົງຄະແນນສຽງຄວາມໄວ້ວາງໃຈ ການນຳພາລວມ, ບຸກຄົນ ແລະ ພ້ອມທັງໄດ້ຮັບຟັງ ຄຳເຫັນຊີ້ນຳຈາກ ສະຫາຍ ນາງ ປານີ ຢາທໍ່ຕູ້ ຊຶ່ງຄະນະພັກທຸກສະຫາຍ ຕ້ອງເປັນເຈົ້າການຍົກສູງຄວາມຮັບຜິດຊອບການເມືອງຂອງຕົນ, ເຮັດໃຫ້ກອງປະຊຸມໃນຄັ້ງນີ້ ດໍາເນີນໄປຕາມວາລະ, ລະບຽບການທີ່ວາງໄວ້, ເປັນເຈົ້າການຄົ້ນຄວ້າຕີລາຄາທຸກບັນຫາໃຫ້ເລິກເຊິ່ງຈະແຈ້ງ ແລະ ຊອກໃຫ້ເຫັນດ້ານຕັ້ງໜ້າເພື່ອເສີມຂະຫຍາຍໃຫ້ດີຂຶ້ນເປັນກ້າວໆ.