ໃນໂອກາດມາເຄື່ອນໄຫວຕິດຕາມ ຊຸກຍູ້ວຽກງານ ຢູ່ແຂວງຈຳປາສັກ ວັນທີ 31 ສິງຫາ 2023 ນີ້, ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ໄດ້ຕ້ອນຮັບ ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ພ້ອມດ້ວຍຄະນະ ຢູ່ຫ້ອງວ່າການແຂວງ.  ໂອກາດນີ້, ທ່ານ ສົມບູນ ເຮືອງວົງສາ ໄດ້ລາຍງານໃຫ້ຮູ້ເຖິງ ສະພາບການນຳພາ-ຊີ້ນຳຂອງຄະ ນະພັກ-ອົງການປົກຄອງແຂວງ ໂດຍສະເພາະ ແມ່ນຊຸກຍູ້ ແລະ ສົ່ງເສີມ ເພື່ອສ້າງຄວາມເຂັ້ມແຂງໃຫ້ແກ່ວຽກງານຍຸຕິທຳ ແບບມີຈຸດສຸມ ແນໃສ່ຜັນຂະຫຍາຍ ແລະ ຈັດຕັ້ງປະຕິບັດແນວທາງນະໂຍບາຍ, ແຜນພັດທະນາເສດຖະກິດ-ສັງຄົມ, ກົດໝາຍ ແລະ ນິຕິກໍາໃຕ້ກົດໝາຍທີ່ວາງອອກເປັນແຕ່ລະໄລຍະ ໃຫ້ມີປະສິດທິຜົນສູງ.  ພ້ອມກັນນີ້, ທ່ານລັດຖະມົນຕີກະຊວງຍຸຕິທຳ ກໍໄດ້ກ່າວຈຸດປະສົງ ແລະ ແຜນເຄື່ອນໄຫວຢູ່ແຂວງຈຳປາສັກ ເພື່ອຊຸກຍູ້ການຈັດຕັ້ງປະຕິບັດວຽກງານຍຸຕິທໍາຮາກຖານປະຈໍາປີ ແລະ ຕິດຕາມວຽກງານການຈັດຕັ້ງປະຕິບັດຄໍາຕັດສິນຂອງສານ ແລະ ຈະພົບປະໂອ້ລົມພະນັກງານ ໃນຂະແໜງຍຸຕິທໍາທົ່ວແຂວງ ແລະ ສະຖາບັນຍຸຕິທໍາແຫ່ງຊາດ ສາຂາຈໍາປາສັກ ເພື່ອເຮັດໃຫ້ຂະແໜງການຍຸຕິທຳ ໄດ້ຮັບການພັດທະນາ ແລະ ປັບປຸງໃຫ້ດີຂຶ້ນເທື່ອລະກ້າວ.