ທ່ານ ໂສມ ບຸດຕະກຸນ ຮອງເຈົ້າແຂວງຈຳປາສັກ ໄດ້ຕ້ອນຮັບ ທ່ານ ເລ ວັນ ຕັວນ ຫົວໜ້າພະແນກຍຸຕິທຳແຂວງ ບິ່ງດິ້ງ ສສ ຫວຽດນາມ ພ້ອມຄະນະ ໃນວັນທີ 11 ຕຸລາ 2023 ຢູ່ຫ້ອງວ່າການແຂວງ. ໃນໂອກາດມາຢ້ຽມຢາມ ແລະ ເຮັດວຽກຢູ່ ແຂວງຈຳປາສັກ ເພື່ອເພີ່ມທະວີສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງແຂວງ ຈຳປາສັກ-ບິ່ງດິ້ງ ໂດຍສະເພາະ ການຮ່ວມມືໃນຂົງເຂດວຽກງານຍຸຕິທຳ ຂອງສອງຝ່າຍ.  ໂອກາດນີ້, ທ່ານ ໂສມ ບຸດຕະກຸນ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທ່ານ ເລ ວັນ ຕັວນ ພ້ອມຄ້ວຍຄະນະ ທີ່ໄດ້ມາເຄື່ອນໄຫວ ແລະ ເຮັດວຽກທີ່ແຂວງຈຳປາສັກ ໃນຄັ້ງນີ້ ເຊິ່ງເປັນການເພີ່ມທະວີສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງແຂວງ ຈຳປາສັກ-ບິ່ງດິ້ງ ໂດຍສະເພາະ ການຮ່ວມມື ແລກປ່ຽນບົດຮຽນ ແລະ ປະສົບການ ໃນຂົງເຂດວຽກງານຍຸຕິທຳ ຂອງສອງຝ່າຍໃຫ້ດີຍິ່ງໆຂຶ້ນ, ພ້ອມນັ້ນ, ທ່ານຮອງເຈົ້າແຂວງຈຳປາສັກ ຍັງໄດ້ອວຍພອນໃຫ້ ຄະນະຜູ້ແທນພະແນກຍຸຕິທຳແຂວງ ບິ່ງດິ້ງ ແລະ ແຂວງຈຳປາສັກ ບັນລຸຕາມຈຸດປະສົງ ແລະ ລະດັບຄາດໝາຍທີ່ວາງໄວ້.  ພ້ອມກັນນີ້, ທ່ານ ເລ ວັນ ຕັວນ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ, ພ້ອມທັງແຈ້ງໃຫ້ຮູ້ວ່າ ການຢ້ຽມຢາມແຂວງຈຳປາສັກ ໃນຄັ້ງນີ້ ຈະໄດ້ມີການແລກປ່ຽນບົດຮຽນ ແລະ ປະສົບການຮ່ວມກັນ ລະຫວ່າງ ພະແນກຍຸຕິທຳແຂວງ ບິ່ງດິ້ງ ສສ ຫວຽດນາມ ແລະ ພະແນກຍຸຕິທຳແຂວງຈຳປາສັກ ສປປ ລາວ ໂດຍຈະລົງເລິກບາງວຽກງານເປັນຕົ້ນ ວຽກງານໂຄສະນາເຜີຍແຜ່ທາງດ້ານກົດໜາຍ, ວຽກຊ່ວຍເຫລືອທາງດ້ານກົດໝາຍ, ວຽກງານທະບຽນສານ, ການຢັ້ງຢືນແຈ້ງເກີດ-ການແຕ່ງດອງ ຂອງຊາວຫວຽດນາມ ແລະ ອື່ນໆ ແນໃສ່ການເພີ່ມທະວີສາຍພົວ ພັນມິດຕະພາບຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງແຂວງ ຈຳປາສັກ-ບິ່ງດິ້ງ ໂດຍສະເພາະ ແມ່ນວຽກງານຍຸຕິທຳ ໃຫ້ໄດ້ຮັບການພັດທະນາດີຍິ່ງໆຂຶ້ນ.