ການນຳແຂວງຈຳປາສັກ ຢ້ຽມຢາມ ສະຖານທີ່ທ່າແຮງດ້ານພະລັງງານທົດແທນ ແລະ ທ່ອງທ່ຽວ ແຂວງກວາງຈິ
01/12/2023
ໃນໂອກາດເຄື່ອນໄຫວຢ້ຽມຢາມແຂວງກວາງຈິ ສສ ຫວຽດນາມ, ໃນວັນທີ 27 ມິຖຸນາ ຜ່ານມາ, ທ່ານ ວິໄລວົງ ບຸດດາຄໍາ ເຈົ້າແຂວງຈຳປາສັກ ພ້ອມຄະນະໄດ້ເຄື່ອນໄຫວຢ້ຽມຢາມ ສະຖານທີ່ທ່າແຮງດ້ານພະລັງງານ, ໂຮງງານໄຟຟ້າພະລັງງານແສງຕາເວັນຢໍແທ່ງ (Gio Thành 2, ເມືອງຢໍລິງ (Gio Linh) ຕາແສງຢໍຮ້າຍ (Gio Hải) ແຂວງກວາງຈິ, ໂດຍການຕິດຕາມ ນຳພາເຄື່ອນໄຫວຂອງ ທ່ານ ເລ ກວາງ ຕຸ່ງ ເລຂາຄະນະພັກແຂວງ ຫົວໜ້າຄະນະຜູ້ແທນສະພາແຫ່ງຊາດແຂວງ ພ້ອມຄະນະ. ຕາງໜ້າຜູ້ບໍລິຫານໂຮງງານແຫ່ງນີ້ ລາຍງານວ່າ: ໂຮງງານໄຟຟ້າພະລັງງານແສງຕາເວັນ ຢໍແທ່ງ 2, ລົງທຶນກໍ່ສ້າງຢູ່ ເມືອງຢໍລິງ, ຫ່າງຈາກໃຈກາງນະຄອນດົ່ງຮ່າ ປະມານ 15 ກິໂລແມັດ ເປັນທີ່ຕັ້ງທີ່ມີຄວາມສາມາດບົ່ມຊ້ອນດ້ານພະລັງງານແສງຕາເວັນ ຂອງແຂວງກວາງຈິ ຊຶ່ງແມ່ນການລົງທຶນໂດຍ ບໍລິສັດ ຫຸ້ນສ່ວນ SECO, ສະມາຊິກຂອງກຸ່ມບໍລິສັດ BB (BB Group), ໄຟຟ້າທີ່ຜະລິດຈາກໂຮງງານດັ່ງກ່າວຈະເຊື່ອມຕໍ່ເຂົ້າກັບຕາຂ່າຍໄຟຟ້າແຫ່ງຊາດ ໂດຍຜ່ານຕາຂ່າຍໄຟຟ້າທ້ອງຖິ່ນ ທີ່ມີກໍາລັງການຜະລິດ 50 MWp, ສະເລ່ຍຜົນຜະລິດໄຟຟ້າຂອງໂຮງງານແມ່ນ 69 ລ້ານກິໂລວັດໂມງ. ຄະນະກຳມະການປະຊາຊົນແຂວງກວາງຈິ ໄດ້ຮັບຮອງເອົານະໂຍບາຍການລົງທຶນ, ໂຄງການດັ່ງກ່າວໄດ້ເລີ່ມລົງມືກໍ່ສ້າງມາແຕ່ເດືອນມິຖຸນາ ປີ 2019, ດ້ວຍການລົງທຶນ 1.110 ຕື້ດົງ ແລະ ໄດ້ສຳເລັດການບຸກເບີກ ແລະ ດຳເນີນທຸລະກິດຢ່າງເປັນທາງການນັບແຕ່ວັນທີ 10 ທັນວາ 2020 ເປັນຕົ້ນມາ. ການຫັນເປັນອຸດສາຫະກຳ ແລະ ທັນສະໄໝຂອງປະເທດ ຮຽກຮ້ອງໃຫ້ມີການພັດທະນາອຸດສາຫະກຳພະລັງງານ, ສ້າງພື້ນຖານໃຫ້ແກ່ອຸດສາຫະກຳອື່ນພັດທະນາ, ເຮັດໃຫ້ຄວາມຕ້ອງການພະລັງງານເພີ່ມຂຶ້ນ. ນອກນີ້, ໂຮງງານໄດ້ປະຕິບັດນະໂຍບາຍພັດທະນາເສດຖະກິດຢູ່ພາກພື້ນ, ປະກອບສ່ວນພັດທະນາອຸດສາຫະກຳພະລັງງານສະອາດຂອງແຂວງ ແລະ ສ້າງວຽກເຮັດງານທຳໃຫ້ຫຼາຍຄົນໃນທ້ອງຖິ່ນ. ປະກອບສ່ວນພັດທະນາເສດຖະກິດ-ສັງຄົມຂອງ ແຂວງກວາງຈີ ໃຫ້ດີຂື້ນ. ໂອກາດດັ່ງກ່າວ, ທ່ານ ວິໄລວົງ ບຸດດາຄໍາ ຕາງໜ້າໃຫ້ຄະນະ ໄດ້ສະແດງຄວາມຂອບໃຈ ແລະ ຍິນດີເປັນຢ່າງຍິ່ງທີ່ໄດ້ມາຢ້ຽມຢາມທັດສະນະ ໂຮງງານໄຟຟ້າພະລັງງານແສງຕາເວັນແຫ່ງນີ້ ທີ່ເປັນທ່າແຮງ ທາງດ້ານພະລັງງານທົດແທນຂອງແຂວງກວາງຈິ, ພ້ອມນັ້ນ ຄະນະການນຳແຂວງຈຳປາສັກ ກໍໄດ້ມີຄຳເຫັນແລກປ່ຽນ ທີ່ເປັນບົດຮຽນປັດໄຈພຶ້ນຖານຂອງກົນໄກການຄຸ້ມຄອງ, ນະໂຍບາຍຊຸກຍູ້ສົ່ງເສີມການລົງທຶນການພັດທະນາດ້ານພະລັງງານທົດແທນ ແລະ ອື່ນໆ, ເພື່ອນຳເອົາບົດຮຽນກັບໄປດັດປັບຈັດຕັ້ງປະຕິບັດຄຸ້ມຄອງໃຫ້ດີຂຶ້ນ. ປັດຈຸບັນ ອົງການປົກຄອງແຂວງຈຳປາສັກ ໄດ້ສົ່ງເສີມໂຄງການພະລັງງານໄຟຟ້າທີ່ມີປະສິດທິຜົນ ໂດຍການຊຸກຍູ້ການຈັດຕັ້ງປະຕິບັດ ໂຄງການພັດທະນາພະລັງງານນໍ້າ, ໄຟຟ້າພະລັງງານລົມ, ໄຟຟ້າແສງອາທິດ, ໄຟຟ້າຊີວະພາບ ມີທັງໝົດ 31 ໂຄງການ ແລະ ໂຄງການດ້ານພະລັງງານທົດແທນ ທີ່ມີສັນຍາກັບລັດຖະບານທັງໝົດ 5 ໂຄງການ ໃນນັ້ນກໍມີໂຄງການພັດທະນາໄຟຟ້າແສງຕາເວັນຢູ່ 3 ໂຄງການ. ຈາກນັ້ນ, ຄະນະການນຳແຂວງຈຳປາສັກຍັງໄດ້ຢ້ຽມຢາມທ່ຽວຊົມ ແຫຼ່ງທ່ອງທ່ຽວທາງປະຫວັດສາດ ຂອງແຂວງກວາງຈິ ຕື່ມອີກ.
