ປະກາດແຂວງຈຳປາສັກ ເປັນຫົວໜ່ວຍຍຸດທະສາດ ປີ 2016-2020
30/11/2023
ພິທີປະກາດ ແລະ ມອບໃບຢັ້ງຢືນ ແຂວງຈຳປາສັກ ເປັນຫົວໜ່ວຍຍຸດທະສາດ ປີ 2016-2020 ໄດ້ຈັດຂຶ້ນໃນວັນທີ 3 ຕຸລາ ນີ້ ທີ່ສະໂມສອນແຂວງ ໃຫ້ກຽດເປັນປະທານຂອງ ທ່ານ ກິແກ້ວ ໄຂຄຳພິທູນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ຜູ້ຊີ້ນຳຂົງເຂດວຽກງານການປົກຄອງ ແລະ ວັດທະນະທຳ-ສັງຄົມ, ມີທ່ານ ວິໄລວົງ ບຸດດາຄຳ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ, ທ່ານ ນິສິດ ແກ້ວປັນຍາ ຮອງລັດຖະມົນຕີກະຊວງພາຍໃນ, ມີການນຳຂັ້ນສູນກາງ, ຂັ້ນແຂວງ, ພະແນກການກົມກອງອ້ອມຂ້າງ, ນະຄອນ, ເມືອງ, ອົງການຈັດຕັ້ງສັງຄົມຕ່າງໆ ພະນັກງານ-ລັດຖະກອນ ແລະ ນັກສຶກສາເຂົ້າຮ່ວມ. ໃນພີີທີ, ທ່ານ ວິໄລວົງ ບຸດດາຄຳ ໄດ້ກ່າວວ່າ: ປະຕິບັດຕາມທິດນຳ, ມະຕິຂອງສູນກາງພັກ, ບົດແນະນຳກ່ຽວກັບການປະເມີນຜົນການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມ ແຂງຮອບດ້ານ, ສ້າງບ້ານເປັນຫົວໜ່ວຍພັດທະນາ, ສະເພາະຂັ້ນແຂວງກໍໄດ້ອອກຂໍ້ຕົກລົງ ວ່າດ້ວຍການແຕ່ງຕັ້ງຄະນະກຳມະການປະເມີນ ແລະ ບົດແນະນໍາວ່າດ້ວຍທິດທາງ, ເປົ້າໝາຍ, ມາດຕະການ ເພື່ອເປັນທິດທາງໃຫ້ແກ່ການຈັດຕັ້ງປະຕິບັດ, ສິ່ງສຳຄັນແມ່ນໄດ້ຈັດຕັ້ງເຜີຍແຜ່, ເຊື່ອມຊຶມ ແລະ ຈັດຕັ້ງການປະເມີນຕາມພາລະບົດບາດ, ຄວາມຮັບຜິດຊອບຂອງບັນດາຂະແໜງການ, ກົມກອງ, ເມືອງ-ນະຄອນ, ຕາມເນື້ອໃນສ້າງແຂວງເປັນຫົວໜ່ວຍຍຸດທະສາດໃນ 7 ດ້ານ, 66 ຕົວຊີ້ວັດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ຕາມເນື້ອໃນ 5 ດ້ານ, 47 ຕົວຊີ້ວັດ ແລະ ສ້າງບ້ານເປັນຫົວໜ່ວຍພັດທະນາໃນ 4 ດ້ານ, 30 ຕົວຊີ້ວັດ ຊຶ່ງສະແດງອອກດັ່ງນີ້: 1. ດ້ານກໍ່ສ້າງພັກ-ພະນັກງານ: ທົ່ວແຂວງມີສະມາຊິກພັກ: 29.066 ສະຫາຍ ຍິງ 7.553 ສະຫາຍ (ທຽບໃສ່ປີ 2020: ເພີ່ມຂຶ້ນ 298 ສະຫາຍ ເທົ່າກັບ 3,17%) ໃນນັ້ນສຳຮອງ 2.053 ສະຫາຍ, ປີ 2021 ປະເມີນຜົນສຳເລັດ 100%, ໄດ້ອອກບັດສະມາຊິກພັກສົມບູນເພີ່ມ 318 ສະຫາຍ ຍິງ 130 ສະຫາຍ, ໄດ້ຈັດສົ່ງພະນັກງານໄປຍົກລະດັບ ທັງບຳລຸງ ແລະ ກໍ່ສ້າງພາຍໃນ-ຕ່າງປະເທດ 215 ຄົນ ຍິງ 38 ຄົນ, ຈຳນວນລັດຖະກອນ 12.791 ຄົນ; 2. ດ້ານການປົກຄອງ ແລະ ບໍລິຫານໄດ້ປັບປຸງໂຄງປະກອບກົງຈັກຕາມທິດກະທັດຮັດ ແລະ ສອດຄ່ອງຕາມພາລະບົດບາດ, ແຂວງຈຳປາສັກ ມີ 15 ພະແນກ, ຫ້ອງການທຽບເທົ່າ 11 ຫ້ອງການ, 3 ຫ້ອງການຂຶ້ນກັບຫ້ອງວ່າການ, ມີ 1 ສູນຂຶ້ນກັບພະແນກ ແລະ 1 ສູນຂຶ້ນ ກັບກົມ, ປະກອບມີ 256 ຂະແໜງ, ຕຳແໜ່ງບໍລິຫານ 675 ຕຳ ແໜ່ງ, ມີກົມກອງ ພັດທະນາ 201 ກົມກອງ (ທຽບໃສ່ປີ 2015 ເພີ່ມຂຶ້ນ 37 ກົມກອງ). ປັບປຸງລະບົບການເມືອງ-ການນຳພາຂັ້ນທ້ອງຖິ່ນ (ບ້ານ) ທົ່ວແຂວງ 641 ບ້ານ, ແບ່ງເປັນ 68 ກຸ່ມຂອງການນໍາພາ, ໄດ້ເອົາໃຈໃສ່ປັບປຸງໜ່ວຍງານຂັ້ນບ້ານ, ຈັດວາງພະນັກງານ-ກຳລັງປະກອບອາວຸດ ເປັນເລຂາພັກບ້ານ, ນາຍບ້ານ ຈຳນວນ 10 ບ້ານ, ໃນນັ້ນກໍາມະການພັກເມືອງ 6 ບ້ານ, ວຽກນີ້ແມ່ນໄດ້ສຸມໃສ່ບ້ານຊາຍແດນຕິດຈອດກັບໄທ, ກຳປູເຈຍ, ໄດ້ກຳນົດຈຸດສຸມພັດທະນາຂອງແຂວງ 21 ບ້ານ ແລະ ໄດ້ປະເມີນ ປະກາດຮັບຮອງ 6 ບ້ານ (ຍຸດທະສາດການປົກຄອງ ແລະ ບໍລິຫານລັດລວມມີ 10 ດ້ານຊີ້ວັດ ບັນລຸ 100%). ໃນພິທີ, ທ່ານ ນິສິດ ແກ້ວປັນຍາ ຮອງລັດຖະມົນຕີກະຊວງພາຍໃນ ໄດ້ຜ່ານຂໍ້ຕົກລົງຂອງນາຍົກລັດຖະມົນຕີວ່າດ້ວຍການຮັບຮອງ ມອບໃບຢັ້ງຢືນ ໃຫ້ແຂວງຈຳປາສັກເປັນຫົວໜ່ວຍຍຸດທະສາດ ປີ 2016-2020. ຈາກນັ້ນ, ທ່ານ ກິແກ້ວ ໄຂຄຳພິທູນ ໄດ້ເປັນກຽດມອບໃບຢັ້ງຢືນແຂວງຈຳປາສັກເປັນຫົວໜ່ວຍຍຸດທະສາດ ປີ 2016-2020 ແລະ ໄດ້ໂອ້ລົມ ໂດຍຕີລາຄາສູງ ແລະ ຍ້ອງຍໍຊົມເຊີຍຕໍ່ຄະນະພັກອົງການປົກຄອງແຂວງ ແລະ ປະຊາຊົນຊາວແຂວງຈຳປາສັກ ທີ່ຍາດມາໄດ້. ຈາກນັ້ນ, ທ່ານຮອງນາຍົກ ລັດຖະມົນຕີ ແລະ ການນຳແຂວງ ກໍໄດ້ຮ່ວມພິທີຕັດແຖບຜ້າ, ເປີດປ້າຍແຂວງຈຳປາສັກເປັນຫົວໜ່ວຍຍຸດທະສາດ ປີ 2016-2020 ຢ່າງເປັນທາງການ.
