ວັນທີ 30 ກັນຍາ ຜ່ານມາ, ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ, ຜູ້ຊີ້ນໍາວຽກງານເສດຖະກິດ ໄດ້ລົງຕິດຕາມ ຊຸກຍູ້ວຽກງານຢູ່ເຂດເສດຖະກິດໃໝ່ ສີທັນດອນ ເມືອງໂຂງ ໂດຍສະເພາະ ຊຸກຍູ້ ການສືບຕໍ່ພັດທະນາໂຄງການອຸທິຍານ ແຫລ່ງທ່ອງທ່ຽວ ນ້ຳຕົກຕາດຄອນພະເພັງ ແລະ ນ້ຳຕົກຕາດສົມພະມິດ ໃຫ້ມີໃບໜ້າໃໝ່ ໂດຍມີ ທ່ານ ນາງ ຄຳພູ ລິດທິສັກ ເຈົ້າເມືອງໂຂງ, ທ່ານ ລີຊຽງ (LI XIANG) ປະທານ ບໍລິສັດຮ່ວມພັດທະນາສີທັນດອນ ຈຳກັດ ແລະ ພະແນກການທີ່ກ່ຽວຂ້ອງ ຂອງແຂວງຈໍາປາສັກ ເຂົ້າຮ່ວມ.  ການລົງຕິດຕາມຄັ້ງນີ້, ກໍໄດ້ມີກອງປະຊຸມປຶກສາຫາລື ຮ່ວມກັນ ລະຫວ່າງ ອົງການປົກຄອງແຂວງ ແລະ ເມືອງໂຂງ ກໍຄື ພາກລັດ ກັບບໍລິສັດດັ່ງກ່າວ ແລະ ໄດ້ຮັບຟັງການລາຍງານຈາກ ຄະນະຄຸ້ມຄອງເຂດເສດຖະກິດພິເສດແຂວງຈໍາປາສັກ ກ່ຽວກັບຜົນການລົງສຳຫລວດ ແລະ ເກັບກຳຂໍ້ມູນທາງດ້ານສິ່ງແວດລ້ອມ ແລະ ສັງຄົມໃນເນື້ອທີ່ດິນ 1.000 ເຮັກຕາ, ສໍາລັບວຽກການຊົດເຊີຍ ໂຄງການອຸທິຍານນໍ້າຕົກຕາດຄອນພະເພັງ ແລະ ອຸທິ ຍານນໍ້າຕົກຕາດສົມພະມິດ (ໃຫ້ຜູ້ສຳປະທານ ຜູ້ເກົ່າ) ໃນມູນຄ່າ 18 ຕື້ກວ່າກີບ ແລະ ການຈັດຕັ້ງປະຕິບັດ ໂຄງການພັດທະນາເສດຖະກິດໃໝ່ສີທັນດອນ ຊຶ່ງປະກອບມີບັນດາໜ້າວຽກຈຸດສຸມຕ່າງໆ ແລະ ແຜນການພັດທະນາ 4 ໄລຍະໃນຕໍ່ໜ້າ ໂດຍສະເພາະ ໂຄງ ການອຸທິຍານນໍ້າຕົກຕາດຄອນພະເພັງ ແລະ ອຸທິຍານນໍ້າຕົກຕາດສົມພະມິດ, ແນວທາງການປັບປຸງປົວແປງ ສິ່ງອຳນວຍຄວາມສະດວກ ໃນເຂດວັດທະນະທຳ, ເຂດຊົມວິວທາງທຳມະຊາດ ແລະ ພື້ນທີ່ສີຟ້າ ໃນຈຳນວນ 51 ເຮັກຕາ ເພື່ອກຽມພ້ອມສຳລັບຕ້ອນຮັບນັກທ່ອງທ່ຽວ ມື້ໜຶ່ງໃຫ້ຮອງຮັບໄດ້ຫລາຍກວ່າ 5 ພັນຄົນ ແລະ ວາງແຜນການກໍ່ສ້າງ ສ້ອມແປງ ໄລຍະທຳອິດ. ຄາດວ່າຈະໃຊ້ຕົ້ນທຶນສ້ອມແປງ ປະມານ 500.000 ໂດລາສະຫະລັດ.  ຈາກນັ້ນ, ທ່ານຮອງເຈົ້າແຂວງ ແລະ ຄະນະ ກໍໄດ້ລົງສຳຫລວດພາກສະໜາມ ໃນແຕ່ລະກິດຈະກຳ ແລະ ເບິ່ງຈຸດທີ່ຈະກະກຽມວາງສີລາລຶກໃນ 2 ໂຄງການ ກໍຄື ໂຄງການໂຮງແຮມແຄນຄູ່ ເຊິ່ງເປັນສິ່ງກໍ່ສ້າງທີ່ສຳຄັນ ມີຄວາມສູງ 238.98 ແມັດ ແລະ ໂຄງການສາງຄ່ຽນຖ່າຍສິນຄ້າ ທີ່ເຂດພັດທະນາເສດຖະກິດໃໝ່ສີທັນດອນ ໄດ້ເປີດ 2 ໂຄງການໃໝ່ຢ່າງເປັນທາງການ ເມື່ອບໍ່ດົນຜ່ານມານີ້.