ເຈົ້າແຂວງຈໍາປາສັກ ຕ້ອນຮັບຫົວໜ້າຄະນະໂຄສະນາອົບຮົມສູນກາງພັກ
30/11/2023
ສະຫາຍ ວິໄລວົງ ບຸດດາຄຳ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ ພ້ອມຄະນະ ໄດ້ຕ້ອນຮັບ ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ ໃນວັນທີ 29 ກັນຍາ ຜ່ານມາ, ໃນໂອກາດມາເຄື່ອນໄຫວວຽກງານ ທີ່ແຂວງຈຳປາສັກ. ໃນໂອກາດນີ້, ເຈົ້າແຂວງຈຳປາສັກ ໄດ້ກ່າວຕ້ອນຮັບ ແລະ ເປັນເອກະພາບສູງ ຕໍ່ແຜນການເຄື່ອນໄຫວວຽກງານ ຂອງ ສະຫາຍ ຄໍາພັນ ເຜີຍຍະວົງ ພ້ອມຄະນະ ຊີ້ນຳການກະກຽມສະເຫຼີມສະຫຼອງວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ ໃນເທື່ອນີ້, ຈາກນັ້ນ ເຈົ້າແຂວງຈຳປາສັກ ໄດ້ລາຍງານ ວຽກງານອັນພົ້ນເດັ່ນ, ສະພາບການພັດທະນາ ເສດຖະກິດ-ສັງຄົມ, ເປັນເຈົ້າການຊຸກຍູ້, ກະກຽມບັນດາໜ້າວຽກ ແລະ ກິດຈະກຳຕ່າງໆ ຂອງວັນດັ່ງກ່າວ ດ້ວຍບັນຍາກາດຟົດຟື້ນ, ໄປຄຽງຄູ່ກັບການກະກຽມ ໃນການຈັດປີທ່ອງທ່ຽວ ລາວ 2024 ທີ່ແຂວງຈໍາປາສັກ. ສະຫາຍ ຄໍາພັນ ເຜີຍຍະວົງ ໄດ້ແຈ້ງແຜນເຄື່ອນໄຫວໃຫ້ຮູ້ວ່າ: ຈະໄດ້ ນຳພາຄະນະລົງເກັບກຳຂໍ້ມູນ ປະຫວັດ, ລົງເບິ່ງສະຖານທີ່ເຄື່ອນໄຫວ ຂອງ ປະທານ ຄຳໄຕ ສີພັນດອນ ເພື່ອເຮັດໃຫ້ການສະເຫຼີມສະຫຼອງວັນເກີດຄົບ 100 ປີ ຂອງເພິ່ນສໍາເລັດໄປຕາມຈຸດປະສົງ ແລະ ແຜນການທີ່ໄດ້ກໍານົດໄວ້, ທັງເປັນເຈົ້າການຊຸກຍູ້, ກະກຽມບັນດາໜ້າວຽກ ແລະ ກິດຈະກຳຕ່າງໆ ທີ່ຢູ່ໃນຄວາມຮັບຜິດຊອບ ຂອງຕົນ ແລະ ປຸກລະດົມ ບັນດາຊັ້ນຄົນໃຫ້ ໄດ້ຮັບຮູ້-ເຂົ້າໃຈ ແລະ ເຂົ້າຮ່ວມການສະເຫຼີມສະຫຼອງວັນດັ່ງກ່າວ ດ້ວຍບັນຍາກາດຟົດຟື້ນ, ເພື່ອເປັນການສັນລະເສີນຜົນງານ, ຄຸນງາມຄວາມດີອັນໃຫຍ່ຫຼວງຂອງ ປະທານ ຄຳໄຕ ສີພັນດອນ ທີ່ມີຕໍ່ພາລະກິດປະຕິວັດ ກໍຄື ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມນັ້ນ ຈະໄດ້ເຜີຍແຜ່ພາລະບົດບາດ ແລະ ຜົນການຄົ້ນຄວ້າ ທາງດ້ານທິດສະດີ ແລະ ພຶດຕິກຳ ຂອງສະພາທິດສະດີສູນກາງພັກ ທີ່ແຂວງຈຳປາສັກ ຕື່ມອີກ.
