ທ່ານ ວິໄລວົງ ບຸດດາຄໍາ ເຈົ້າແຂວງຈຳປາສັກ ໄດ້ຕ້ອນຮັບ ທ່ານ ບຸນທັນ ບຸນທະວິໄລ ຮອງຫົວໜ້າອົງການ ໄອຍະການປະຊາຊົນສູງສຸດ (ອອປສ) ພ້ອມຄະນະ, ໃນຕອນເຊົ້າວັນທີ 21 ກໍລະກົດ 2023 ໃນໂອກາດມາເຄື່ອນໄຫວວຽກງານ ຢູ່ແຂວງຈຳປາສັກ.  ໂອກາດນີ້, ທ່ານເຈົ້າແຂວງຈຳປາສັກ ໄດ້ສະແດງຄວາມຍິນຕ້ອນຮັບ ທ່ານ ບຸນທັນ ບຸນທະວິໄລ ຮອງຫົວໜ້າອົງການ ໄອຍະການປະຊາຊົນສູງສຸດ ພ້ອມຄະນະ ທີ່ມາເຄື່ອນໄຫວວຽກງານ ຢູ່ແຂວງຈຳປາສັກ ໃນຄັ້ງນີ້, ໂດຍສະເພາະ ແມ່ນການປັບປຸງວຽກງານ ຂອງອົງການໄອຍະການປະຊາຊົນ ແຂວງ ຈຳປາສັກ, ພ້ອມທັງ ເຜີຍແຜ່ເນື້ອໃນນິຕິກຳທີ່ສຳຄັນ ເພື່ອສ້າງຄວາມເຂົ້າໃຈໃນການກຳນົດຫລັກການ, ລະບຽບການ ແລະ ມາດຕະການກ່ຽວກັບການຈັດຕັ້ງ ແລະ ການເຄື່ອນໄຫວວຽກງານໃຫ້ມີປະສິດທິພາບ, ພ້ອມນັ້ນ ທ່ານເຈົ້າແຂວງຈຳປາສັກ ໄດ້ອວຍພອນໃຫ້ທ່ານຮອງຫົວໜ້າອົງການ ໄອຍະການປະຊາຊົນສູງສຸດ ພ້ອມຄະນະ ເຄື່ອນໄຫວວຽກງານ ຢ່າງມີປະສິດທິຜົນ ແລະ ສຳເລັດຕາມຈຸດປະສົງຕາມຄາດໝາຍທີ່ວາງໄວ້.  ໂອກາດດຽວກັນນີ້, ທ່ານ ບຸນທັນ ບຸນທະວິໄລ ໄດ້ສະແດງຄວາມຂອບໃຈ ຕໍ່ການຕ້ອນຮັບໃນຄັ້ງນິ້, ພ້ອມທັງລາຍງານໃຫ້ຊາບເຖິງຈຸດປະສົງ ຂອງການລົງເຄື່ອນໄຫວວຽກງານໃນຄັ້ງນີ້ ໂດຍສະເພາະ ແມ່ນເຜີຍແຜ່ເນື້ອໃນຂອງລັດຖະບັນຍັດ ຂອງປະທານປະເທດ ວ່າດ້ວຍການໃຫ້ອະໄພຍະໂທດ ແລະ ບັນດານິຕິກຳທີ່ສຳຄັນ ຈຳນວນໜຶ່ງ, ພ້ອມກັນນັ້ນ ຈະໄດ້ຄົ້ນຄວ້າປຶກສາຫາລືກ່ຽວກັບ ການປັບປຸງກົງຈັກການຈັດຕັ້ງ ຂອງອົງການໄອຍະການປະຊາຊົນແຂວງ ຈຳປາສັກ ແລະ ບັນດາອົງການໄອຍະການປະຊາຊົນເຂດ ນຳອີກ.