ເພື່ອຜັນຂະຫຍາຍ ແລະ ຈັດຕັ້ງປະຕິບັດແນວທາງນະໂຍບາຍຂອງສູນກາງພັກ-ລັດຖະບານ ກ່ຽວກັບວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ວຽກງານ 3 ສ້າງ ໂດຍສະເພາະ ຄໍາສັ່ງແນະນໍາເລກທີ 03/ກມສພ, ວ່າດ້ວຍການສ້າງບ້ານ ເປັນຫົວໜ່ວຍພັດທະນາ, ສ້າງບ້ານໃຫຍ່ ກາຍເປັນຕົວເມືອງນ້ອຍໃນຊົນນະບົດ, ມະຕິ 03/ກມສພ ວ່າດ້ວຍການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານເປັນຫົວໜ່ວຍພັດທະນາ, ມະຕິເລກທີ 25/ກມສພ ແລະ ຄຳສັ່ງແນະນຳເລກທີ 34/ນຍ, ວ່າດ້ວຍວຽກງານ 3 ສ້າງ, ມະຕິເລກທີ 056/ກມສພ, ວ່າດ້ວຍການປັບປຸງລະບົບຮາກຖານການເມືອງ ຂອງລະບອບປະຊາທິປະໄຕປະຊາຊົນ ໃຫ້ເຂັ້ມແຂງ ແລະ ໜັກແໜ້ນ, ຄຳສັ່ງເລກທີ 097/ກມສພ, ວ່າດ້ວຍການເພີ່ມທະວີການນຳພາ-ຊີ້ນຳ ຕໍ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ແລະ ດຳລັດເລກທີ 348/ລບ, ວ່າດ້ວຍມາດຕະຖານພົ້ນທຸກ ແລະ ມາດຕະຖານການພັດທະນາ; ຄະນະປະຈຳພັກແຂວງຈໍາປາສັກ ໄດ້ຄົ້ນຄວ້າອອກມະຕິ ເລກທີ 417/ຄຈພຂ.ຈສ, ວ່າດ້ວຍການຮັບຮອງເອົາມາດຖານສ້າງຄອບຄົວ ແລະ ບ້ານພັດທະນາປະຊາຊົນຢູ່ດີກິນດີ, ຈຸດປະສົງເປົ້າໝາຍ ແມ່ນເລັ່ງໃສ່ຍົກລະດັບບ້ານພັດທະນາໃຫ້ມີການຂະຫຍາຍຕົວໄປສູ່ຄຸນນະພາບໃໝ່, ເພື່ອ​ເປັນ​ພື້ນຖານ​ໃຫ້​ແກ່​ການກຳນົດ​ເປົ້າ​ໝາຍ​ແກ້​ໄຂ​ຄວາມທຸກ​ຍາກ, ​ແນ​ໃສ່​ສ້າງ​ຄອບຄົວ ​ແລະ ບ້ານ​ພັດທະນາ, ​ເຮັດ​ໃຫ້​ຊີວິດ​ການ​ເປັນ​ຢູ່ທາງດ້ານ​ວັດຖຸ ​ແລະ ຈິດ​ໃຈ ຂອງ​ປະຊາຊົນ​ໄດ້​ຮັບ​ການ​ປົວ​ແປງ​ໃຫ້​ດີ​ຂຶ້ນ, ບັນຫາໃຈກາງຂອງການສ້າງບ້ານພັດທະນາປະຊາຊົນຢູ່ດີກິນດີປະ ກອບດ້ວຍ 6 ເນື້ອໃນ 9 ມາດຖານ ແລະ 25 ໃບຢັ້ງຢືນ ເນື້ອແທ້ຂອງການສ້າງບ້ານພັດທະນາ ປະຊາຊົນຢູ່ດີກິນດີ ແມ່ນການຍົກລະດັບຈາກບ້ານພັດທະນາທີ່ໄດ້ຮັບຮອງໃນຊຸມປີຜ່ານມາ ໄປສູ່ມາດ ຖານ, ເງື່ອນໄຂ ທີ່ມີຄວາມສົມບູນຂຶ້ນຕື່ມ.

ທ່ານ ວິໄລວົງ ບຸດດາຄໍາ ກຳມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ ກ່າວວ່າ: ເພື່ອບັນລຸຄາດໝາຍດັ່ງກ່າວ ໄດ້ສ້າງເປັນແຜນການອັນລະອຽດໃນແຕ່ລະດ້ານ, ສ້າງຄວາມຮັບຮູ້ເຂົ້າໃຈເປັນເອກະພາບພາຍໃນຄະນະພັກ-ອົງການປົກຄອງແຕ່ລະຂັ້ນ ພ້ອມທັງໄດ້ຫັນເອົາພະນັກງານລົງກໍ່ສ້າງຮາກຖານການເມືອງ ຈຳນວນ 1.158 ສະຫາຍ ຍິງ 83 ສະຫາຍ ຕາມທິດແຂວງລົງຊ່ວຍເມືອງ, ເມືອງລົງຊ່ວຍບ້ານ ໃນນັ້ນສະເພາະບ້ານເປົ້າໝາຍໃນແຜນສ້າງ ໄດ້ສຸມໃສ່ນຳພາຈັດຕັ້ງປະຕິບັດ ຕາມ 6 ເນື້ອໃນ 9 ມາດຖານ; ຜ່ານການຈັດຕັ້ງປະຕິບັດຕົວຈິງສາມາດຕີລາຄາໄດ້ຜົນສຳເລັດຢ່າງໜ້າເພິ່ງພໍໃຈໃນຫຼາຍດ້ານ ເຊັ່ນ: ປັບປຸງຄວາມເຂັ້ມແຂງການຈັດຕັ້ງໃນລະບົບການເມືອງຢູ່ຂັ້ນຮາກຖານ ໂດຍສຸມໃສ່ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕາມ 5 ເນື້ອໃນເປັນບັນຫາໃຈກາງ ຖືເອົາການປັບປຸງອົງການປົກຄອງບ້ານ ແລະ ອົງການຈັດຕັ້ງມະຫາຊົນ, ແນວລາວສ້າງຊາດ, ສະຫະພັນນັກຮົບເກົ່າ ໃຫ້ມີຄວາມສາມາດປະຕິບັດພາລະບົດບາດ, ສິດ, ໜ້າທີ່ຂອງຕົນ, ເປັນເຈົ້າການນຳພາປະຊາຊົນເຂົ້າຮ່ວມໃນການປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບການແກ້ໄຂຄວາມທຸກຍາກຂອງປະຊາຊົນຢູ່ຂັ້ນຮາກຖານ ມີຜົນສຳເລັດເປັນແຕ່ລະໄລຍະ ໃນນັ້ນ, ສ້າງໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນຈຳນວນ 949 ໜ່ວຍ ກວມ 98,55% ຂອງຈໍານວນໜ່ວຍພັກຢູ່ຂັ້ນບ້ານໃນທົ່ວແຂວງ; ສ້າງໜ່ວຍຊາວໜຸ່ມຂັ້ນບ້ານທີ່ໄດ້ຮັບນາມມະຍົດ 4 ບຸກ ມີ 576 ບ້ານ ກວມ 90%; ສ້າງໜ່ວຍແມ່ຍິງຂັ້ນບ້ານ 3 ດີ ໄດ້ 576 ບ້ານ ກວມ 90%; ສ້າງບ້ານສາມັກຄີປອງດອງໄດ້ 608 ບ້ານ ກວມ 94,85%. ໄດ້ເອົາໃຈໃສ່ນໍາພາ-ຊີ້ນຳຕໍ່ການກໍ່ສ້າງ ແລະ ປັບປຸງການຈັດຕັ້ງການຜະລິດ ແລະ ການບໍລິການ ໂດຍສຸມໃສ່ຈັດຕັ້ງກຸ່ມການຜະລິດ, ສະຫະກອນການຜະລິດ ແລະ ການບໍລິການຢູ່ຂັ້ນບ້ານ ໄປຄຽງຄູ່ກັບການກໍ່ສ້າງພື້ນຖານໂຄງລ່າງທີ່ຈຳເປັນ ຕິດພັນກັບການຍູ້ແຮງການຜະລິດເປັນສິນຄ້າ, ການບໍລິການ ດ້ວຍການປຸກລະດົມບັນດາຫົວໜ່ວຍທຸລະກິດ, ຜູ້ປະກອບການທັງພາຍໃນ ແລະ ຕ່າງປະເທດ ສົມທົບກັບກຳລັງແຮງຂອງປະຊາຊົນ ຊຶ່ງເປັນການປະກອບສ່ວນເຂົ້າໃນການພັດທະນາບ້ານ; ໃນນັ້ນ, ໄດ້ສົ່ງເສີມ ແລະ ສ້າງເປັນກຸ່ມການຜະລິດ, ສະຫະກອນໄດ້ມີການຂະຫຍາຍຕົວເພີ່ມຂຶ້ນ, ໃນທົ່ວແຂວງສ້າງໄດ້ກຸ່ມການຜະລິດກະສິກຳ 186 ກຸ່ມ, ມີ 14 ສະຫະກອນ ແລະ ມີ 157 ຟາມ ອັນທີ່ພົ້ນເດັ່ນແມ່ນກຸ່ມຜະລິດເຂົ້າເປັນສິນຄ້າ ບ້ານປາໂມກ, ກຸ່ມຜະລິດກາເຟ ແລະ ພືດຜັກ ບ້ານກອງຕູ່ນ, ກຸ່ມ​ຜະລິດ​ຕະພັນ​ປາ​ແດກ ​ບ້ານ​ໂນນ​ສະຫວ່າງ ນະຄອນປາກເຊ, ສະຫະກອນຜະລິດກາເຟພູພຽງບໍລິເວນ, ສະຫະກອນສິນເຊື່ອເງິນຝາກປະຢັດ ກະດັນຮຸ່ງເຮືອງ, ສະຫະກອນສິນເຊື່ອເງິນຝາກປະຢັດ ບ້ານໜອງໄຮໂຄກ ​ແລະ ສ້າງ​ໄດ້ຜະລິດຕະພັນສິນຄ້າ​ໂອດັອບ ​ຈຳນວນ 32 ຫົວ​ໜ່ວຍ, 96 ຜະລິດ​ຕະພັນ ລວມມູນ​ຄ່າ​ຜະລິດ​ຕະພັນ​ທັງ​ໝົດ 30 ຕື້ກວ່າກີບ, ມູນ​ຄ່າ​ການຈຳໜ່າຍ 39 ຕື້ກວ່າກີບ; ທົ່ວແຂວງມີກອງທຶນພັດທະນາບ້ານ ທັງໝົດ 474 ກອງທຶນ, ມີສະມາຊິກທັງໝົດ 48.340 ຄົນ, ມີທຶນໝູນວຽນທັງໝົດ 43 ຕື້ກວ່າກີບ; ໃນນັ້ນ, ໄດ້ຍົກລະດັບກອງທຶນທີ່ມີຄວາມເຂັ້ມແຂງເປັນສະຫະກອນສິນເຊື່ອເງິນຝາກປະຢັດຈຳນວນ 8 ແຫ່ງ ໃນ 5 ເມືອງ ທີ່ຂຶ້ນກັບການຄຸ້ມຄອງຂອງທະນາຄານແຫ່ງ ສປປ ລາວ ປະຈຳພາກໃຕ້.

ປັບປຸງກໍາລັງການຜະລິດຢູ່ຂັ້ນຮາກຖານໃຫ້ມີຄວາມເຂັ້ມແຂງໂດຍສຸມໃສ່ການຈັດຕັ້ງຝຶກອົບຮົມ, ສະໜອງຂໍ້ມູນຂ່າວສານ, ເຕັກນິກວິທະຍາສາດເຂົ້າໃນການຜະລິດ, ການປູກ, ການລ້ຽງ, ການປຸງແຕ່ງເປັນສິນຄ້າ ແລະ ການບໍລິການ. ພ້ອມນັ້ນ, ໄດ້ແຕ່ງຕັ້ງພະນັກງານວິຊາການລົງຊ່ວຍປະຊາຊົນ ນຳພາຈັດຕັ້ງປະຕິບັດຕົວຈິງ ໂດຍການນຳໃຊ້ທ່າແຮງດ້ານຊັບພະຍາກອນທຳມະຊາດກັບທີ່; ທົ່ວແຂວງມີສູນບໍລິການດ້ານເຕັກນິກກະສິກຳ ຈຳນວນ 8 ສູນ, 2 ສະຖາ​ນີ, ໃນປີ 2021 ທີ່ຜ່ານມາ ສາມາດຜະລິດເຂົ້າໄດ້ 444.768 ໂຕນ, ຜະລິດກາເຟໄດ້ 85.878 ໂຕນ, ຜົນຜະລິດຢາງພາລາ 53.901 ໂຕນ, ໝາກມ່ວງຫິມມະພານ 12.172 ໂຕນ, ໝາກອາໂວກາໂດ 1.911 ໂຕນ, ປູກພືດຜັກຕ່າງໆເປັນສິນຄ້າ ຜົນຜະລິດໄດ້ 1,5 ລ້ານໂຕນ, ການສະໜອງຊີ້ນ, ປາ, ອາຫານ ແລະ ອື່ນໆ ສະເລ່ຍໄດ້ 63,54 kg/ຄົນ, ບ້ານໄດ້ນໍາໃຊ້ໄຟຟ້າໃນລະບົບ 641 ບ້ານ ເທົ່າກັບ 100%, ລວມທົ່ວແຂວງມີໄຟຟ້າຊົມໃຊ້ 129.099 ຫຼັງຄາເຮືອນ ເທົ່າກັບ 92,92%, ມີເສັ້ນທາງທຽວໄດ້ 2 ລະດູຢ່າງສະດວກ 633 ບ້ານ (98,75%), ສາມາດນຳໃຊ້ລະບົບສື່ສານໂທລະຄົມມະນາຄົມໃນທົ່ວແຂວງ ກວມ 98%. ນໍາພາຈັດສັນຜັງບ້ານ ຕິດພັນກັບການຈັດສັນທີ່ດິນ 3 ປະເພດຄື: (ດິນປຸກສ້າງທີ່ຢູ່ອາໄສ, ດິນຜະລິດກະສິກຳ, ດິນສາທາລະນະປະໂຫຍດ) ເພື່ອຮອງຮັບໃນການພັັດທະນາບ້ານໄດ້ເປັນຢ່າງດີ. ພ້ອມນັ້ນ, ກໍໄດ້ເອົາໃຈໃສ່ຊຸກຍູ້ການປັບປຸງ, ກໍ່ສ້າງເຮືອນ ແລະ ທີ່ຢູ່ອາໄສຂອງປະຊາຊົນໃຫ້ມີຄວາມເປັນລະບຽບຮຽບຮ້ອຍ, ສະອາດສວຍງາມ ຮັກສາໄດ້ຄວາມເປັນເອກະລັກຂອງຊາດກໍຄືຂອງທ້ອງຖິ່ນ ຖືເປັນສຳຄັນຕໍ່ການຮັກສາຊັບພະຍາ ກອນທຳມະຊາດ ແລະ ສິ່ງແວດລ້ອມ ເຮັດໃຫ້ການພັດທະນາບ້ານໄປຕາມທິດສີຂຽວ ແລະ ຍືນຍົງ.

ປັບປຸງພື້ນຖານໂຄງລ່າງການສຶກສາ ຕິດພັນກັບການຈັດຕັ້ງປະຕິບັດຄາດໝາຍດ້ານການສຶກສາ ໃນ 15 ຄາດໝາຍ ບັນລຸໄດ້ 12 ຄາດໝາຍ ຊຶ່ງໄດ້ປະກາດຮັບຮອງເປັນແຂວງຈົບຊັ້ນມັດທະຍົມບໍາລຸງໃນປີ 2020. ໄປຄຽງຄູ່ກັບການພັດທະນາຍົກລະດັບຄຸນນະພາບການບໍລິການດ້ານສາທາລະນະສຸກ ມີຕາໜ່າງປົກຄຸມໃນທຸກກຸ່ມບ້ານ ສາມາດບັນລຸຄາດໝາຍສາທາລະນະສຸກໄດ້ 10 ຕົວຊີ້ວັດ (ໃນ 11 ຕົວຊີ້ບອກ). ພ້ອມກັນນັ້ນກໍໄດ້ສຸມໃສ່ການສ້າງຄອບຄົວ ແລະ ບ້ານວັດທະນະທຳ ມາຮອດປັດຈຸບັນສາມາດປະກາດຮັບຮອງຄອບຄົວວັດທະນະທຳໄດ້ 108.134 ຄອບຄົວ ແລະ ບ້ານວັດທະນະທໍາໄດ້ 601 ບ້ານ ເທົ່າກັບ 94% ຂອງຈໍານວນບ້ານທັງໝົດ. ໄປພ້ອມກັນນີ້ ແຂວງຍັງໄດ້ເອົາໃຈໃສ່ນໍາພາປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ໂດຍສຸມໃສ່ສຶກສາອົບຮົມໃຫ້ແກ່ຄະນະພັກ, ສະມາຊິກພັກ, ອົງການຈັດຕັ້ງຕ່າງໆຢູ່ຂັ້ນຮາກຖານ, ປະຊາຊົນໄດ້ມີຄວາມເປັນເຈົ້າການຕື່ນຕົວປະກອບສ່ວນເຂົ້າໃນວຽກງານດັ່ງກ່າວຢ່າງຕັ້ງໜ້າ ພ້ອມນັ້ນກໍໄດ້ສຸມໃສ່ປັບປຸງຄວາມເຂັ້ມແຂງຂອງກຳລັງກອງຫຼອນ, ປກສ ຢູ່ຂັ້ນຮາກຖານ ດ້ວຍການຝຶກອົບຮົມທາງດ້ານການເມືອງ, ການຫັດແອບດ້ານສິລະປະຍຸດ ຍຸດທະວິທີໃນທຸກໆປີຢ່າງເປັນລະບົບຕໍ່ເນື່ອງ; ໃນ 5 ປີຜ່ານມາປະຊາຊົນໄດ້ປະຕິບັດພັນທະຕໍ່ວຽກງານ ປກສ-ປກຊ ມູນຄ່າ 10 ຕື້ກວ່າກີບ; ພ້ອມນັ້ນ, ສາມາດສ້າງບ້ານປ້ອມໝັ້ນ ຈຳນວນ 289 ບ້ານ ແລະ ກຸ່ມບ້ານສູ້ຮົບຕິດລຽນ ຈຳນວນ 64 ກຸ່ມ, ສ້າງບ້ານປ້ອງກັນຊາດດີ ແລະ ສ້າງບ້ານປ້ອງກັນຄວາມສະຫງົບດີ ຈຳນວນ 586 ບ້ານ. ພ້ອມນັ້ນກໍໄດ້ສຸມໃສ່ແກ້ໄຂປະກົດການຫຍໍ້ທໍ້ທີ່ເກີດຂຶ້ນໃນສັງຄົມໃຫ້ຫຼຸດໜ້ອຍຖອຍລົງ ຈາກຂະບວນການດັ່ງກ່າວ ຈຶ່ງເຮັດໃຫ້ທົ່ວແຂວງມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ.

ໂດຍລວມແລ້ວຜ່ານການຈັດຕັ້ງປະຕິບັດກ່ຽວກັບການທົດລອງສ້າງບ້ານພັດທະນາປະຊາຊົນຢູ່ດີກິນດີ ໃນໄລຍະທີ່ຜ່ານມາ ຊຶ່ງທາງແຂວງພວກເຮົາ ໄດ້ຕັ້ງຄາດໝາຍມີຈຳນວນ 20 ບ້ານ, ຜ່ານການສ້າງ ແລະ ການປະເມີນຕົວຈິງສາມາດຮັບຮອງໄດ້ ຈຳນວນ 10 ບ້ານ; ໃນປັດຈຸບັນ ແຂວງຈຳປາສັກໄດ້ຢັ້ງຢືນ ແລະ ຮັບຮອງບ້ານພັດທະນາ ຈຳນວນ 576 ບ້ານ ກວມ 89,9% ຂອງຈໍານວນບ້ານທັງໝົດໃນທົ່ວແຂວງ; ສ້າງບ້ານໃຫຍ່ເປັນຕົວເມືອງນ້ອຍໄດ້ 25 ບ້ານ ພ້ອມດຽວກັນນັ້ນ, ໄດ້ກໍານົດເປັນຈຸດສຸມແຜນສ້າງບ້ານພັດທະນາປະຊາຊົນຢູ່ດີກິນດີ ຈຳນວນ 20 ບ້ານ.