ສະຫາຍ ວິໄລວົງ ບຸດດາຄຳ ກໍາມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ ໄດ້ນຳພາຄະນະຜູ້ແທນ ແຂວງຈໍາປາສັກ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອານຢາງ ສສ ຫວຽດນາມ ໃນວັນທີ 25 ສິງຫາ ນີ້ ທີ່ແຂວງອານຢາງ ສສ ຫວຽດນາມ ເພື່ອສືບຕໍ່ ແລະ ເພີ່ມທະວີການຮ່ວມມືສອງຝ່າຍ ໂດຍການຕ້ອນຮັບຂອງ ສະຫາຍ ເລ້ ຮວາງ ກວາງ ກຳມະການສູນກາງພັກກອມມູນິດຫວຽດນາມ ເລຂາພັກແຂວງອານຢາງ ພ້ອມດ້ວຍຄະນະຜູ້ແທນຂອງແຂວງອານຢາງ ໃຫ້ການຕ້ອນຮັບ. ໃນການຢ້ຽມຢາມແຂວງອານຢາງ ເທື່ອນີ້, ກໍໄດ້ມີການພົບປະສອງຝ່າຍ ເພື່ອຕີລາຄາຄືນໝາກຜົນການຮ່ວມມືໄລຍະປີຜ່ານມາ, ເຖິງແມ່ນວ່າໃນຊຸມປີຜ່ານມາ ພະຍາດໂຄວິດ-19 ໄດ້ແຜ່ລະບາດຢ່າງ ກວ້າງຂວາງ, ສ້າງຜົນກະທົບອັນໃຫຍ່ຫຼວງໃຫ້ແກ່ການພັດທະນາເສດຖະກິດ-ສັງຄົມ ຂອງສອງແຂວງ, ແຕ່ບົນພື້ນຖານການພົວພັນຮ່ວມມື ໃຫ້ການສະໜັບສະໜູນ, ອຸ້ມຊູຊ່ວຍເຫຼືອຊຶ່ງກັນ ແລະ ກັນ ຈຶ່ງເຮັດໃຫ້ພວກເຮົາຜ່ານຜ່າ ແລະ ໄດ້ຮັບການພັດທະນາຢ່າງເລິກເຊິ່ງ ແລະ ເປັນຮູບປະທຳ.

ໃນກອງປະຊຸມພົບປະ ໄດ້ຮັບຟັງລາຍງານສະພາບເສດຖະກິດ-ສັງຄົມ ຂອງສອງແຂວງ ຈຳປາສັກ-ອານຢາງ ແລະ ໄດ້ມີການປຶກສາຫາລື ຄົ້ນຄວ້າ ເພື່ອກຳນົດທິດທາງການຮ່ວມມືໄລຍະສົກປີ 2022-2026. ສອງຝ່າຍໄດ້ເຫັນດີເປັນເອກະພາບກັນ ສືບຕໍ່ຜັນຂະຫຍາຍເນື້ອໃນ ບົດບັນທຶກການຮ່ວມມືດັ່ງນີ້: ການຮ່ວມມືທາງດ້ານການເມືອງ ສອງຝ່າຍເຫັນດີສືບຕໍ່ຮັກສາການຢ້ຽມຢາມ ແລກປ່ຽນຄະນະຜູ້ແທນຂັ້ນສູງ, ຂະແໜງການ, ອົງການຈັດຕັ້ງຕ່າງໆຂອງສອງແຂວງ ແນໃສ່ການຢ້ຽມຢາມທາງການ, ການພົບປະແລກປ່ຽນບົດຮຽນ, ເສີມຂະຫຍາຍຄວາມເຂົ້າໃຈ ຊຸກຍູ້ການຮ່ວມມືໃນແຕ່ລະຂົງເຂດ. ດ້ານການກໍ່ສ້າງຊັບພະຍາກອນມະນຸດ ເຫັນດີໃຫ້ການສະໜັບສະໜູນ ການສຶກສາໃຫ້ແກ່ແຂວງຈຳປາສັກ ຂັ້ນປະລິນຍາຕີ ແລະ ແຂວງຈຳປາສັກ ສືບຕໍ່ໃຫ້ການສະໜັບສະໜູນ: ມອບທຶນກໍ່ສ້າງພາສາລາວໃຫ້ແກ່ພະນັກງານ, ນັກສຶກສາ ຂອງແຂວງອານຢາງ. ການຮ່ວມມືລົງທຶນພັດທະນາເສດຖະກິດສອງຝ່າຍເປັນເອກະພາບກັນຄົ້ນຄວ້າ, ສ້າງແຜນການຮ່ວມມືພັດທະນາບັນດາການລົງທຶນ, ການຄ້າ-ການບໍລິການ ການທ່ອງທ່ຽວ, ກະສິກຳ ແລະ ຄົມມະນາຄົມຂົນສົ່ງ ຊຶ່ງໃນນັ້ນສຸມໃສ່ສ້າງເງື່ອນໄຂເອື້ອອຳນວຍໃຫ້ແກ່ບັນດານັກລົງທຶນ; ການຮ່ວມມືມິດຕະພາບ ແລະ ສະຫັວດດີການສັງຄົມ ເຫັນດີສືບຕໍ່ຈັດຕັ້ງຜັນຂະຫຍາຍ ບັນດາກິດຈະກຳແລກປ່ຽນທາງດ້ານສິລະປະວັດທະນະທຳ, ກິລາ, ກິດຈະກຳດ້ານມະນຸດສະທຳ, ຊ່ວຍເຫຼືອດ້ານສະຫວັດດີການສັງຄົມ ພ້ອມນັ້ນ, ຄະນະຜູ້ແທນສອງຝ່າຍ ຍັງຕົກລົງເຫັນດີ ທີ່ຈະສົ່ງເສີມການພົວພັນຮ່ວມມືມິດຕະພາບ ລະຫວ່າງ ສະພາປະຊາຊົນແຂວງອານຢາງ ແລະ ສະພາປະຊາຊົນແຂວງຈຳປາສັກ, ພິທີລົງນາມບົດບັນທຶກຊ່ວຍຈຳເທື່ອນີ້, ຕາງໜ້າອົງການປົກຄອງແຂວງຈຳປາສັກ ລົງນາມໂດຍ ທ່ານ ສົມບູນ ເຮືອງວົງສາ ຮອງເຈົ້າແຂວງ ຈຳປາສັກ ແລະ ຕາງໜ້າຄະນະກໍາມະການປະຊາຊົນແຂວງອານຢາງ ລົງນາມໂດຍ ທ່ານ ນາງ ຫງຽນ ທິ ມິງ ຖຸຍ ຮອງປະທານຄະນະກໍາມະການປະຊາຊົນແຂວງອານຢາງ, ໂດຍມີຜູ້ແທນຂອງສອງຝ່າຍ ເຂົ້າຮ່ວມເປັນສັກຂີພິຍານ ແລະ ໃນກອງປະຊຸມພົບປະ ແລະ ພິທີເຊັນບົດບັນທຶກມື້ນີ້, ແຂວງຈໍາປາສັກ ຍັງໄດ້ມອບໃບຍ້ອງຍໍຂັ້ນແຂວງໃຫ້ແກ່ ບຸກຄົນ ແລະ ກົມກອງ ຂອງແຂວງດັ່ງກ່າວ ທີ່ມີຜົນງານໃນການຮ່ວມມືສາຍພົວພັນມິດຕະພາບລະຫວ່າງແຂວງຈຳປາສັກ ກັບອົງການຈັດຕັ້ງຕ່າງໆ ຂອງ ສສ ຫວຽດນາມ.

(ຂ່າວ-ພາບ: ທັດຊະນະ)