ເຈົ້າແຂວງຈໍາປາສັກ ເຄື່ອນໄຫວຢ້ຽມຢາມ ວິທະຍາໄລເຕັກນິກວິຊາຊີບ
16/05/2025
ວັນທີ 15 ພຶດສະພາ 2025, ທ່ານ ອາລຸນໄຊ ສູນນະລາດ ເລຂາພັກແຂວງ ເຈົ້າແຂວງຈໍາປາສັກ ພ້ອມດ້ວຍການນໍາພະແນກການກົມກອງທີ່ກ່ຽວຂ້ອງຂອງແຂວງ ໄດ້ເຄື່ອນໄຫວຢ້ຽມຢາມ ວິທະຍາໄລເຕັກນິກວິຊາຊີບ ເຊິ່ງຖືກຕ້ອນຮັບຢ່າງອົບອຸ່ນ ຈາກ ທ່ານ ຄໍາຜ່ອນ ລາດຊະວົງສາ ຜູ້ອໍານວຍການວິທະຍາໄລເຕັກນິກ - ວິຊາຊີບ ຈໍາປາສັກ ພ້ອມດ້ວຍຄະນະພັກ - ຄະນະອໍານວຍການ, ພະນັກງານ, ຄູ - ອາຈານ ພາຍໃນວິທະຍາໄລດັ່ງກ່າວ ເຂົ້າຮ່ວມ. ການເຄື່ອນໄຫວຢ້ຽມຢາມ ວິທະຍາໄລເຕັກນິກວິຊາຊີບແຂວງຈໍາປາສັກ ຄັ້ງນີ້, ເຈົ້າແຂວງຈໍາປາສັກ ພ້ອມຄະນະ ໄດ້ເຄື່ອນໄຫວຢ້ຽມຢາມເບິ່ງການຈັດຕັ້ງປະຕິບັດ ການຮຽນ - ການສອນ ແຕ່ລະສາຂາວິຊາຂອງວິທະຍາໄລ ແລະ ໄດ້ຮັບຟັງການລາຍງານໂດຍຫຍໍ້ ກ່ຽວກັບການເຄື່ອນໄຫວຂອງວິທະຍາໄລ ຕື່ມອີກ.
ຈາກນັ້ນ, ທ່ານ ອາລຸນໄຊ ສູນນະລາດ ເລຂາພັກແຂວງ ເຈົ້າແຂວງຈໍາປາສັກ ກໍມີຄໍາເຫັນ, ບາງຕອນທ່ານກ່າວວ່າ: ການມາເຄື່ອນໄຫວຢ້ຽມຢາມ ວິທະຍາໄລເຕັກນິກວິຊາຊີບ ຈໍາປາສັກ ຄັ້ງນີ້ ກໍເພື່ອຕິດຕາມເບິ່ງການຈັດຕັ້ງປະຕິບັດວຽກງານຮອບດ້ານ, ເບິ່ງຄວາມອາດສາມາດໃນການສົ່ງເສີມການກໍ່ສ້າງຊັບພະຍາກອນມະນຸດ ເວົ້າລວມ, ເວົ້າສະເພາະ ແມ່ນການສ້າງວິຊາຊີບ, ສ້າງສີມືແຮງງານ ໃຫ້ສາມາດສົ່ງອອກບໍລິການຮັບໃຊ້ສັງຄົມ ແລະ ປະຊາຊົນ; ເອົາໃຈໃສ່ສຶກສາຄົ້ນຄວ້າການພົວພັນປະສານສົມທົບຜູ້ຜະລິດ ແລະ ຜູ້ຊົມໃຊ້ ຕາມທິດ ເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ (ສອຈ). ນອກຈາກການປະຕິບັດຫຼັກສູດການຮຽນ - ການສອນແລ້ວ ໃຫ້ເອົາໃຈໃສ່ພັດທະນາຕາມທ່າແຮງຂອງວິທະຍາໄລ ໂດຍສະເພາະການບໍລິການອາຫານ, ເຄື່ອງດື່ມ ແລະ ກາເຟ ເຮັດໃຫ້ສັງຮັບຮູ້ ແລະ ມາໃຊ້ບໍລິການຢ່າງກວ້າງຂວາງ.
ຮັກສາຄວາມສາມັກຄີພາຍໃນຄະນະພັກ - ຄະນະນໍາ ໃຫ້ເປັນປຶກແຜ່ນແໜ້ນໜາ; ເຮັດໜ້າທີ່ການນໍາພາດ້ານການເມືອງແນວຄິດ, ເອົາໃຈໃສ່ໂຄສະນາເຜີຍໃຫ້ສັງຄົມຮັບຮູ້ສິ່ງທີ່ວິທະຍາໄລສາມາດຜະລິດໄດ້ ແລະ ສິ່ງທີ່ວິທະຍາໄລຕ້ອງການ; ປັບປຸງລະບົບການຈັດຕັ້ງ ໃຫ້ສົມຄູ່ກັນ ລະຫວ່າງວຽກພັກ ແລະ ວຽກລັດ, ມີຂໍ້ຄົງຄ້າງດ້ານໃດ ກໍປັບປຸງດ້ານນັ້ນ, ຍັງບໍ່ພໍດ້ານໃດ ກໍປັບປຸງຍົກລະດັບດ້ານນັ້ນ; ຍົກສູງວຽກງານວິຊາສະເພາະ ໃຫ້ຕິດພັນກັບຄວາມຕ້ອງການຕົວຈິງຂອງຕະຫຼາດ ກໍຄືຜູ້ຊົມໃຊ້, ນັກຮຽນທີ່ຮຽນຈົບແລ້ວ ໃຫ້ສາມາດມີວິຊາຊີບ, ມີວຽກເຮັດງານທໍາ ເພື່ອເຮັດໃຫ້ນັກຮຽນມີຄວາມສົນໃຈ ແລະ ເຂົ້າຮ່ວມສຶກສາຮໍ່າຮຽນນັບມື້ເພີ່ມຂຶ້ນ.
