ການນຳແຂວງຈຳປາສັກ ຊຶ່ງນຳໂດຍ ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະພັກແຂວງ ເຈົ້າແຂວງຈຳປາສັກ ໄດ້ເຄື່ອນໄຫວຢ້ຽມຢາມ ເຮັດວຽກ ທີ່ນະຄອນດານັງ ໃນວັນທີ 28 ກັນຍາ ນີ້, ໂດຍການຕ້ອນຮັບອັນອົບອຸ່ນຈາກ ທ່ານ ທ່ານ ເລ ຈຸງ ຈິງ ປະທານຄະນະກຳມະການປະຊາຊົນນະຄອນດານັງ ພ້ອມດ້ວຍຄະນະ.  ໃນໂອກາດດັ່ງກ່າວ, ກໍໄດ້ແຈ້ງໃຫ້ຊາບກ່ຽວກັບການພັດທະນາເສດຖະກິດ - ສັງຄົມຂອງນະຄອນ; ພ້ອມທັງຕີລາຄາສູງ ນ້ຳໃຈມິດຕະພາບທີ່ເປັນມູນເຊື້ອແບບພິເສດຫວຽດນາມ - ລາວ, ການພົວພັນມິດຕະພາບທີ່ເປັນມູນເຊື້ອລະຫວ່າງນະຄອນດານັງ ແລະ ແຂວງຈຳປາສັກ ທີ່ນັບມື້ນັບພັດທະນາ ແລະ ເຊື່ອໝັ້ນວ່າ ໃນໄລຍະຕໍ່ໜ້າທີ່ຈະມາເຖິງ, ບັນດາເນື້ອໃນທີ່ໄດ້ລົງນາມໃນບົດບັນທຶກຊ່ວຍຈຳກ່ຽວກັບການຮ່ວມມືໄລຍະ 2023-2027 ລະຫວ່າງ 2 ທ້ອງຖິ່ນຈະສືບຕໍ່ໄດ້ຮັບການຜັນຂະຫຍາຍຢ່າງມີປະສິດທິຜົນ, ພິເສດແມ່ນບັນດາເນື້ອໃນສຳຄັນເຊັ່ນ ການຮ່ວມມືດ້ານການສຶກສາ, ເພີ່ມທະວີການຮ່ວມມືດ້ານການຄ້າ-ການລົງທຶນ ແລະ ການບໍລິການ ການທ່ອງທ່ຽວ ແລະ ຫວັງວ່າ ໃນໄລຍະຈະມາເຖິງ, 2 ຝ່າຍຈະສືບຕໍ່ ບັນດາການເຄື່ອນໄຫວຮ່ວມມືຢ່າງມີປະສິດທິຜົນ, ເພື່ອຊຸກຍູ້ການພັດທະນາຮ່ວມຂອງແຕ່ລະທ້ອງຖິ່ນ ແລະ ສືບຕໍ່ປະກອບສ່ວນໃຫ້ແກ່ສາຍພົວພັນມິດຕະພາບແບບພິເສດ ຂອງສອງປະເທດ ຫວຽດນາມ - ລາວ. 

ໂອກາດດັ່ງກ່າວ, ທ່ານເຈົ້າແຂວງຈຳປາສັກ ໄດ້ສະແດງຄວາມຂອບໃຈຢ່າງຈິງໃຈ ແລະ ສະໜິດສະໜົມ ທີ່ໄດ້ຮັບກຽດ ໃນຕ້ອນຮັບ ດ້ວຍໄມຕີຈິດມິດຕະພາບອັນອົບອຸ່ນຈາກຄະນະພັກ, ຄະນະກໍາມະການປະຊາຊົນ ແລະ ປະຊາຊົນນະຄອນດານັງ, ພ້ອມກ່າວໃຫ້ຮູ້ວຽກງານຈຸດສຸມຂອງແຂວງ ເຊິ່ງໃນປະຈຸບັນ, ກຳລັງສຸມໃສ່ຊຸກຍູ້ການຄ້າການລົງທຶນຂອງຜູ້ປະກອບການທັງພາຍໃນ ແລະ ຕ່າງປະເທດ. ພ້ອມດຽວກັນນັ້ນ, ກໍ່ໄດ້ກ່າວໃຫ້ຮູ້ເຖິິງ ທ່າແຮງຂອງແຂວງ ໃນຂົງເຂດກະສິກຳ,ທ່ອງທ່ຽວ,ໂຣຈິດສະຕິກ ແລະ ພະລັງງານສະອາດ, ຊຸກຍູ້ສົ່ງເສີມວຽກງານຂົງເຂດ ເສດຖະກິດຫັນໄປສູ່ທັນສະໄໝ. ທ່ານ ອາລຸນໄຊ ສຸນນະລາດ ໄດ້ກ່າວຕື່ມອີກວ່າ, ເພື່ອປະຕິບັດຕາມການຮ່ວມມື ແລະ ເຈດຈຳນົງຂອງສອງພັກ ກໍ່ຄືສອງລັດ ລາວຫວຽດນາມ-ຫວຽດນາມລາວ, ສະເພາະ ແຂວງຈໍາປາສັກ ແລະ ນະຄອນດານັງ, ແຂວງຈໍາປາສັກ ຈະເອົາໃຈໃສ່ສ້າງທຸກກາລະໂອກາດໃນການໄປມາຫາສູ່ຂອງຄະນະຜູ້ແທນສອງຝ່າຍ ຈໍາປາສັກ-ດານັງ ເພື່ອຮັດແໜ້ນການຮ່ວມມື, ສົ່ງເສີມບັນດາໄວໜຸ່ມໄດ້ຮູ້ເຖິງຄວາມສາມັກຄີທີ່ເປັນມູນເຊື້ອ, ຫັວງວ່າ ນະຄອນດານັງຈະຊ່ວຍສືບຕໍ່ການຊ່ວຍເຫຼືອໃຫ້ທຶນການສຶກສາ,ຄວາມຮູ້ທາງບໍລິການ ການທ່ອງທ່ຽວ,ການແລກປ່ຽນວັດທະນະທໍາຂອງສອງຊາດ,ຊຸກຍູ້ການພົວພັນທາງເສດຖະກິດສອງຝ່າຍໃຫ້ສົມຄູ່ກັບການພົວພັນດ້ານການເມືອງ, ການເຄື່ອນໄຫວເຮັດວຽກ ທີ່ນະຄອນດານັງ ໃນຄັ້ງນີ້ ເປັນຂີດໝາຍອັນສໍາຄັນ ແລະ ປະກອບສ່ວນເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ໃຫ້ນັບມື້ພັດທະນາເຂົ້າສູ່ລວງເລິກ ແລະ ມີປະສິດທິຜົນຍິ່ງໆຂຶ້ນ.

ພິເສດໃນການພົບປະດັ່ງກ່າວກໍ່ໄດ້ມີການເຊັນບົດບັນທຶກສັນຍາຮ່ວມທຶນ ລະຫວ່າງ ບໍລິສັດເພັດສະຫວ່າງ ຮ່ວມພັດທະນາ ກາເຟ ຈໍາກັດຜູ້ດຽວ ແລະ ບໍລິສັດ DH999 TRADING AND SERVICE CO.LTD ເຊິ່ງໃຫ້ການລົງນາມໃນສັນຍາຮ່ວມທຶນ ໂດຍ ທ່ານ ສີສຸກ ວົງພັກດີ  ບໍລິສັດ ເພັດສະຫວ່າງ ຮ່ວມພັດທະນາ ກາເຟ ແລະ ທ່ານ TRAN DUY HUNG ຜູ້ອຳນວຍການບໍລິສັດ DH999 TRADING AND SERVICE CO.LTDF ຕົກລົງ ໃນການຮ່ວມມືເພື່ອດໍາເນີນທຸລະກິດກ່ຽວກັບການສ້າງຕັ້ງໂຮງງານ ຜະລິດນ້ຳໝາກໄມ້ ເພື່ອຈໍານ່າຍພາຍໃນ ສປປ ລາວ ແລະສົ່ງອອກໄປຕ່າງປະເທດ.  ແລະໃນໂອກາດດຽວກັນນັ້ນ, ພິທີມອບໃບຍ້ອງຍໍຂັ້ນແຂວງທີ່ມີຄຸນງາມຄວາມດີໃນການພົວພັນຮ່ວມມື ແລະ ຊ່ວຍເຫຼືອ ທຶນຮອນໃນການພັດທະນາແຂວງຈໍາປາສັກ ໃນໄລຍະທີ່ຜ່ານມາ,ໃຫ້ແກ່ ບຸກຄົນດີເດັ່ນຂອງນະຄອນດານັງ ແຫ່ງສາທາລະນະລັດ ສັງຄົມນິຍົມຫວຽດນາມ ເຊິ່ງເປັນກຽດມອບໂດຍ ທ່ານ ອາລຸນໄຊ ສຸນນະລາດ ກໍາມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ ຕາງໜ້າໃຫ້ແກ່ອົງຄະນະພັກ-ອົງການປົກຄອງແຂວງຈໍາປາສັກໃນໂອກາດສະເຫຼີມສະຫຼອງວັນສ້າງຕັ້ງສາຍພົວການທູດລາວ-ຫວຽດນາມຄົບຮອບ 60 ປີ ແລະ ວັນສົນທິສັນການຮ່ວມມືມິດຕະພາບຄົບຮອບ 45 ປີ.