ການນຳແຂວງຈຳປາສັກ ຊຶ່ງນຳໂດຍ ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະພັກແຂວງ ເຈົ້າແຂວງຈຳປາສັກ ໄດ້ເຄື່ອນໄຫວຢ້ຽມຢາມ ແລະ ພົບປະການນຳແຂວງເທື່ອທຽນເຫວ້ ສສ ຫວຽດນາມ ໃນວັນທີ 26 ກັນຍາ ນີ້, ໂດຍໄດ້ການຕ້ອນຮັບອັນອົບອຸ່ນຈາກ ທ່ານ ຟ້າມ ດຶກ ຕ້ຽນ, ຮອງເລຂາຜູ້ປະຈໍາການ ຄະນະພັກແຂວງເທື່ອທຽນເຫ້ວ ສສ ຫວຽດນາມພ້ອມດ້ວຍຄະນະນຳຂອງແຂວງ ເທື່ອທຽນເຫວ້.  ໃນການພົບປະນີ້, ຄະນະນໍາ ຜູ້ແທນຂອງສອງຝ່າຍໄດ້ມີຄຳເຫັນ ໂດຍໄດ້ແຈ້ງໃຫ້ຊາບສະພາບໂດຍ ລວມກ່ຽວກັບການພັດທະນາເສດຖະກິດ - ສັງຄົມ, ຕີລາຄາຄືນ ບັນດາໝາກຜົນການຮ່ວມມື ສອງຝ່າຍໃນໄລຍະຜ່ານມາ ພ້ອມກັນນັ້ນ ກໍໄດ້ແລກປ່ຽນບາງຄຳເຫັນສຳຄັນ ສຳລັບທິດທາງການຮ່ວມມື ລະຫວ່າງແຂວງຈຳປາສັກ ກັບ ແຂວງເທື່ອທຽນເຫວ້ ໄລຍະ 2022-2026 ຈະໄດ້ສືບຕໍ່ການຮວ່ມມືດ້ານການເມືອງ, ການສຶກສາ-ການກໍ່ສ້າງຊັບພະຍາກອນມະນຸດ ໂດຍແຂວງເທື່ອທຽນເຫ້ວແຂວງ ຈະສືບຕໍ່ອອກທຶນການສຶກສາ 15 ທຶນຕໍ່ປີ,

ດ້ານສາທາລະນະສຸກ ຄືໂຣງໝໍສູນກາງເຫ້ວຈະຊ່ວຍຝຶກອົບຮົມດ້ານວິຊາການ ໃຫ້ພະນັກງານສາທາລະນະສຸກແຂວງຈໍາປາສັກ, ການຮວ່ມມືທາງດ້ານເສດຖະກິດ ແມ່ນຈະໄດ້ສົ່ງເສີມດ້ານການຄົມມະນາຄົມ ບໍລິການຂົນສົ່ງໂລຈິສຕິກ, ທ່າກ່ຳປັ່ນນ້ຳເລິກ ແລະ ການຮ່ວມມືວຽກງານວັດທະນະທຳ ຕິດພັນກັບການທ່ອງທ່ຽວ ເປັນຕົ້ນ ເພື່ອໃຫ້ການຮ່ວມມືດັ່ງກ່າວ ໄດ້ຈັດຕັ້ງປະຕິບັດແຕກດອກອອກຜົນ ແລະ ມີປະສິດທິຜົນຍິ່ງໆຂຶ້ນ.  ໂອກາດດັ່ງກ່າວ, ທ່ານເຈົ້າແຂວງຈຳປາສັກ ໄດ້ສະແດງຄວາມຂອບໃຈ ຄະນະພັກ-ຄະນະນໍາແຂວງ ທີ່ໄດ້ຕ້ອນຮັບຢ່າງອົບອຸ່ນ ສະໜິດສະໜົມ ແລະ ຍັງຕີລາຄາສູງຕໍ່ການພົບປະເຮັດວຽກສອງຝ່າຍໃນຄັ້ງນີ້ ຊຶ່ງໄດ້ເປັນຂີດໝາຍອັນສຳຄັນ ແລະ ປະກອບສ່ວນເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະແຂວງຈຳປາສັກ ແລະ ແຂວງເທື່ອທຽນເຫວ້ ໃຫ້ນັບມື້ພັດທະນາຂຶ້ນກວ່າເກົ່າ. 

ໃນໂອກາດເຄື່ອນໄຫວ ຢ້ຽມຢາມແຂວງເທື່ອທຽນເຫວ້ ສສ ຫວຽດນາມ, ທ່ານເຈົ້າແຂວງຈຳປາສັກ ແລະ ຄະນະ ຍັງໄດ້ຢ້ຽມຢາມ ແລະ ແລກປ່ຽນບົດຮຽນ ຢູ່ໂຮງໝໍສູນກາງເຫ້ວ, ຢ້ຽມຢາມໂຮງງານ ຮຸ້ນສ່ວນສັດລ້ຽງ ຊີພີ ຫວຽດນາມ ( ບໍລິສັດ ຊີພີຫວຽດນາມ ) ຜູ້ປະກອບການອາຫານທີ່ໃຫ່ຍທີ່ສຸດໃນຫວຽດນາມ, ໂດຍການລົງທຶນຂອງວິສະຫະກິດຄົນໄທ ແລະ ຢ້ຽມຊົມ ໂຮງງານ ຜະລິດປຸ໋ຍ ເກ້ ເລີມ ອໍການິກ ທີ່ເນັ້ນການຜະລິດກະສິກໍາ ທີ່ເປັນມິດຕໍ່ສິ່ງແວດລ້ອມ ຕື່ມອີກ .