ທ່ານ ເພັດ ພົມພິພັກ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ລົງຊຸກຍູ້ການພັດທະນາກະສິກຳ ຕິດພັນກັບການມີສ່ວນຮ່ວມຂອງປະຊາຊົນ ທີ່ເຂດບ້ານ ແກ້ງເກ່ຍ-ຂັນລາຍ ເມືອງບາຈຽງຈະເລີນສຸກ ແຂວງຈຳປາສັກໃນວັນທີ 3 ສິງຫາ 2023 ຜ່ານມານີ້, ໂດຍມີ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ພ້ອມດ້ວຍ ການນຳພະແນກການ-ຂະແໜງການ ກ່ຽວຂ້ອງ ເຂົ້າຮ່ວມ. ທ່ານ ສົມລິດ ປັນທະບົວສີ ເຈົ້າເມືອງບາຈຽງຈະເລີນສຸກ ໄດ້ລາຍງານການຜັນຂະຫຍາຍ, ການຈັດຕັ້ງປະຕິບັດ ການພັດທະນາເສດຖະກິດ-ສັງຄົມ ໂດຍສະເພາະ ຄວາມຄືບໜ້າ ໃນການປະກອບສ່ວນທີ່ດິນ ເພື່ອພັດທະນາຂອງປະຊາຊົນ 2 ບ້ານຄື: ບ້ານແກ້ງເກ່ຍ ຄຸ້ມເພຍລາດ ແລະ ບ້ານຂັນລາຍ ໃນການສ້າງຕັ້ງໂຮງງານຜະລິດ, ປຸ້ງແຕ່ງ ແປ້ງມັນຕົ້ນ ຂອງ ບໍລິສັດ ເອເຊຍລົງທຶນ ພັດທະນາ ແລະ ກໍ່ສ້າງ ຈໍາກັດ ຜູ້ດຽວ ຫລື AIDC ຈຳນວຍ 80 ເຮັກຕາ, ໃນລາຄາຊົດເຊີຍ 150 ລ້ານກີບ/ເຮັກຕາ, ຜົນລະປູກ 30 ລ້ານກີບ/ເຮັກຕາ. ການເຄື່ອນໄຫວ ມາຮອດປັດຈຸບັນການຊົດເຊີຍ ປະຕິບັດໄດ້ ຈຳນວນ 10 ຄອບຄົວ, ເນື້ອທີ່ທັງໝົດ 13,5 ເຮັກຕາ. ພ້ອມນັ້ນ ຂະແໜງການກ່ຽວຂ້ອງ ໄດ້ຜ່ານນິຕິກຳ ແລະ ລາຍງານກ່ຽວກັບ ການຈັດຕັ້ງປະຕິບັດ ວຽກງານການຄຸ້ມຄອງປ່າຜະລິດ, ເພື່ອເພີ່ມທະວີຄວາມຮັບຜິດຊອບ ແລະ ເຂັ້ມງວດໃນການຄຸ້ມຄອງປົກປັກຮັກສາ ແລະ ພັດທະນາທີ່ດິນປ່າໄມ້ ໃນ 3 ປະເພດປ່າ ນຳອີກ. ໂອກາດນີ້, ທ່ານລັດຖະມົນຕີ ກະຊວງກະສິກໍາ ແລະ ປ່າໄມ້ ແລະ ທ່ານເຈົ້າແຂວງຈຳປາສັກ ກໍໄດ້ສະແດງຄວາມຊົມເຊີຍ ຕໍ່ການຕັດສິນໃຈສູງ ຂອງ ພໍ່-ແມ່ປະຊາຊົນ ທັງ 2 ບ້ານ ທີ່ໄດ້ປະກອບສ່ວນເຂົ້າໃນການພັດທະນາ, ຊົມເຊີຍການຈັດຕັ້ງ, ອົງການປົກຄອງ ທ້ອງຖິ່ນ ທີ່ໄດ້ຊຸກຍູ້ ສົ່ງເສີມໃຫ້ພໍ່ແມ່ປະຊາຊົນເຮັດການຜະລິດ ໂດຍສະເພາະ ແມ່ນການຜະລິດກະສິກຳ ເປັນສິນຄ້າສົ່ງອອກ ແລະ ຂໍໃຫ້ສືບຕໍ່ຍູ້ແຮງການຜະລິດ ໃຫ້ຫລາຍຂຶ້ນ. ພ້ອມກັນນັ້ນ, ກໍເນັ້ນໃຫ້ຂະແໜງການ- ພາກສ່ວນທີ່ກ່ຽວຂ້ອງ ຕ້ອງໄດ້ເພີ່ມທະວີຄວາມຮັບຜິດຊອບ ແລະ ເຂັ້ມງວດໃນການຄຸ້ມຄອງປົກປັກຮັກສາ ແລະ ພັດທະນາທີ່ດິນປ່າໄມ້ ໃນ 3 ປະເພດປ່າ, ການຈັດສັນເຂດຄຸ້ມຄອງ ແລະ ນຳໃຊ້ປ່າຜະລິດ ໃຫ້ມີປະສິດທິຜົນ ຕາມກົດໝາຍ ແລະ ລະບຽບການຕ່າງໆ ໃຫ້ ມີຄວາມຍືນຍົງ.