ວັນທີ 20 ທັນວາ 2022 ນີ້, ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ໄດ້ຕ້ອນຮັບ ທ່ານ ປີເຕີ ເຮມ໋ອນ (Peter M.Haymond) ເອກອັກຄະລັດຖະທູດ ສະຫະລັດອາເມລິກາ ປະຈຳ ສປປ ລາວ ພ້ອມຄະນະ, ໃນໂອກາດມາເຄື່ອນໄຫວຢ້ຽມຢາມ ແຂວງຈຳປາສັກ.

ໂອກາດນີ້, ທ່ານຮອງເຈົ້າແຂວງຈຳປາສັກ ໄດ້ກ່າວຕ້ອນຮັບ ແລະ ລາຍງານສະພາບໂດຍລວມຂອງການພັດທະນາເສດຖະກິດສັງຄົມຢູ່ພາຍໃນແຂວງ ໂດຍສະເພາະການຄ້າ, ການລົງທຶນ, ການທ່ອງ ທ່ຽວ ແລະ ການຈັດຕັ້ງປະຕິບັດບັນດາໂຄງການ ທີ່ໄດ້ຮັບການສະໜັບສະໜູນຈາກ ສະຫະລັດອາເມລິ ກາ ເປັນຕົ້ນ ໂຄງການເກັບກູ້ລະເບີດທີ່ບໍ່ທັນແຕກ (NPA) ໂຄງການສ້າງຄວາມເຊື່ອມໂຍງເພື່ອຂະ ຫຍາຍເຄືອຄ່າຍກະສິກຳ (CLEAN Project), ໂຄງການຕໍ່ຕ້ານການຄ້າມະນຸດ (VFI) ແລະ ອື່ນໆ. ພ້ອມນັ້ນ, ທ່ານຮອງເຈົ້າແຂວງ ຍັງໃຫ້ຮູ້ກ່ຽວກັບພາບລວມຂອງການຊຸກຍູ້ໂຄງການເຂດພັດທະນາເສດ ຖະກິດໃໝ່ສີທັນດອນ ໂດຍແຂວງໄດ້ສຸມໃສ່ ຊຸກຍູ້ການພັດທະນາການທ່ອງທ່ຽວທີ່ທັນສະໄໝ ຕິດພັນກັບການອະນຸລັກທໍາມະຊາດ. ແລະ ໃນໂອກາດດຽວກັນ, ທ່ານ ປີເຕີ ເຮມ໋ອນ ໄດ້ກ່າວສະແດງຄວາມຂອບໃຈ ແລະ ຊົມເຊີຍ ຕໍ່ວິໄສທັດຂອງການພັດທະນາ ແຂວງຈຳປາສັກ ກໍຄື ແຜນຟື້ນຟູເສດຖະກິດພາຍຫລັງການລະບາດຂອງໂຄວິດ-19 ແລະ ລັດຖະບານ ອາເມລິກາ ແມ່ນໄດ້ມີແຜນທີ່ຈະສືບຕໍ່ຊຸກຍູ້ ບັນດາໂຄງການສະໜັບສະໜູນ ຕ່າງໆ ແລະ ຈະສຶກສາຄວາມເປັນໄປໄດ້ທີ່ຈະລົງທຶນກ່ຽວກັບພະລັງງານສີຂຽວ (ພະລັງງານສະອາດ) ຢູ່ສປປ ລາວ ໂດຍສະເພາະ ແຂວງຈຳປາສັກ. ພ້ອມນີ້, ທ່ານທູດ ຍັງໄດ້ໃຫ້ຄວາມສົນໃຈກ່ຽວກັບ ການພັດທະນາ ໂຄງການເຂດພັດທະນາເສດຖະກິດໃໝ່ສີທັນດອນ ທີ່ແຂວງຈຳປາສັກ ນຳອີກ.

ຂ່າວ-ພາບ: ນາງ ພູທິບສະຫັວນ