ທ່ານ ອາລຸນໄຊ ສູນນະລາດ ເລຂາພັກແຂວງ ເຈົ້າແຂວງຈໍາປາສັກ, ພ້ອມດ້ວຍທ່ານ ສະນັ່ນ ສີພາພົມມະຈັນ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ແລະ ການນໍາຂອງແຂວງ ໄດ້ເຄື່ອນໄຫວຢ້ຽມຢາມກວດກາ ແລະ ຊຸກຍູ້ຊີ້ນໍາແຜນພັດທະນາເສດຖະກິດ-ສັງຄົມ ແລະ ວຽກງານຮອບດ້ານຂອງເມືອງສຸຂຸມາ, ການເຄື່ອນໄຫວຢ້ຽມຢາມດັ່ງກ່າວມີຂຶ້ນໃນວັນທີ 15 ພະຈິກ 2024 ໂດຍໃຫ້ກຽດຕ້ອນຮັບຂອງທ່ານ ສົມເພັດ ບຸດສະດີ ເຈົ້າເມືອງສຸຂຸມາ, ພ້ອມພະນັກງານນໍາພາຫຼັກແຫຼງຂອງເມືອງເຂົ້າຮ່ວມ.  ໂອກາດນີ້ທ່ານ ສົມເພັດ ບຸດສະດີ ເລຂາພັກເມືອງ ເຈົ້າເມືອງສຸຂຸມາ ໄດ້ລາຍງານການນໍາພາ-ຊີ້ນໍາກ່ຽວກັບການຈັດຕັ້ງປະຕິບັດວຽກງານຮອບດ້ານ ຂອງອົງການປົກຄອງເມືອງສຸຂຸມາໄລຍະ 09 ເດືອນ ປີ 2024 ໂດຍມີຫຼາຍດ້ານສາມາດຈັດຕັ້ງປະຕິບັດຢ່າງມີຜົນສໍາເລັດ ເປັນຕົ້ນ: ເປັນເຈົ້າການຊຸກຍູ້ວຽກງານເສກຖະກິດ ຕິດພັນກັບການປະຕິບັດວາລະແຫ່ງຊາດວ່າດ້ວຍການແກ້ໄຂຄວາມທຸກຍາກ ໂດຍເສດຖະກິດຂະຫຍາຍຕົວ 4.6 %, ການດຸ່ນດ່ຽງແຫຼ່ງທຶນເພື່ອການພັດທະນາເສດຖະກິດ-ສັງຄົມ ປະຕິບັດໄດ້ 141.10 ຕື້ກີບ ທຽບໃສ່ແຜນປີປະຕິບັດໄດ້ລື່ນແຜນ 3.75%, ໃນເມືອງມີຄອບຄົວພົ້ນທຸກ 8.409 ຄອບຄົວ, ຄອບຄົວທຸກຍາກ 1.146 ຄອບຄົວ, ຄອບຄົວພັດທະນາ 7.372 ຄອບຄົວ, ບ້ານພົ້ນທຸກ 55 ບ້ານ, ບ້ານທຸກຍາກ 01 ບ້ານ (ບ້ານແຊ).  ໂອກາດນີ້ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ກໍໄດ້ຕີລາຄາສູງຕໍ່ຜົນສໍາເລັດແຕ່ລະດ້ານໃນການຊີ້ນໍາ-ນໍາພາຂອງອົງຄະນະພັກ-ອົງການປົກຄອງເມືອງ, ພ້ອມເນັ້ນໜັກໃຫ້ອົກການປົກຄອງສືບຕໍ່ສ້າງຜົນງານ, ສ້າງຂະບວນການໃຫ້ເປັນຂະບວນຟົດຟື້ນເພື່ອກະກຽມໃຫ້ແກ່ກອງປະຊຸມໃຫຍ່ຂອງອົງຄະນະພັກເມືອງທີ່ຈະເປີດຂຶ້ນໃນມໍ່ໆນີ້, ພ້ອມເນັ້ນໜັກໃຫ້ເພີ່ມທະວີຄວາມສາມັກຄີ, ຄວາມເປັນເອກະພາບ, ຮັກສາໄດ້ຄວາມໝັ້ນຄົງ, ຄວາມເປັນລະບຽບຮຽບຮ້ອຍຕາມຊາຍແດນ ແລະ ສັງຄົມ, ມີການຫັນລົງກໍ່ສ້າງຮາກຖານການເມືອງເພື່ອຊຸກຍູ້ກໍາລັງແຮງຂອງປະຊາຊົນໃຫ້ໄດ້ຮັບການພັດທະນາດ້ານຊີວິດການເປັນຢູ່ດີຂຶ້ນເທື່ອລະກ້າວ, ປຸກລະດົມເຮັດໃຫ້ປະຊາຊົນ, ສັງຄົມຕື່ນຕົວປະກອບສ່ວນເຂົ້າໃນການພັດທະນາບ້ານ-ເມືອງເປັນຕົ້ນ: ການມີສ່ວນຮ່ວມໃນການກໍ່ສ້າງເສັ້ນທາງເຂົ້າບ້ານ, ການກໍ່ສ້າງຂົວ.  ໃນການເຄື່ອນໄຫວເຮັດວຽກຢູ່ເມືອງສຸຂຸມາຄັ້ງນີ້ໄດ້ໄປເບິ່ງສະຖານທີ່ຕ່າງໆເພື່ອມີທິດຊຸກຍູ້ໃນການພັດທະນາ ຄື: ສະຖານທີ່ທ່ອງທ່ຽວພະທາດສາມປາງ, ດ່ານປະເພນີຊ່ອງຕາອູ, ຢ້ຽມຢາມກອງຮ້ອຍຊາຍແດນ ຄໍ 524, ລົງເບິ່ງສະພາບເສັ້ນທາງເຂົ້າບ້ານທຸກຍາກ, ໂຄງການເສັ້ນາງ 14A, ຈຸດສຸມກໍ່ສ້າງຂົວບ້ານຫ້ວຍໃຜ່, ເຂື່ອນຝາຍກັ້ນນໍ້າເພື່ອພັດທະນາການທ່ອງທ່ຽວ.