ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ພ້ອມຄະນະ ໄດ້ຕ້ອນຮັບ ທ່ານ ລິນຄໍາ ດວງສະຫວັນ ລັດຖະມົນຕີ ກະຊວງກະສິກໍາ ແລະ ປ່າໄມ້ ພ້ອມຄະນະ ທີ່ມາເຄື່ອນໄຫວຢ້ຽມຢາມ ເຮັດວຽກຢູ່ແຂວງຈໍາປາສັກ, ທີ່ຫ້ອງວ່າການແຂວງ ໃນວັນທີ 11 ພະຈິກ.  ໂອກາດນີ້, ທ່ານ ອາລຸນໄຊ ສູນນະລາດ ໄດ້ລາຍງານສະພາບການລວມຂອງແຂວງ ກ່ຽວກັບວຽກງານຈຸດສຸມ ໂດຍສະເພາະແມ່ນວຽກງານກະສິກໍາຂອງແຂວງ, ການຜະລິດສິນຄ້າກະສິກໍາທີ່ເພີ່ມຂຶ້ນ ການປະຕິບັດວຽກງານເຄັ່ງຮ້ອນ ຕິດຕາມ ແກ້ໄຂບັນຫາການບຸກລຸກພື້ນທີ່ປ່າໄມ້, ການແກ້ໄຂເສດຖະກິດ ເລັງໃສ່ການປະຕິບັດແຜນເສດຖະກິດເອກະລາດ ເປັນເຈົ້າຕົນເອງ ຊຸກຍູ້ການຜະລິດກະສິກຳປຸງແຕ່ງ, ສຸມໃສ່ການຫັນເປັນທັນສະໄໝ ໂດຍສະເພາະໃນຂະແໜງການເງິນ, ການຄ້າ, ການເກັບຄ່າບໍລິການ ແລະ ຄ່າທໍານຽມຕ່າງໆ ໂດຍຜ່ານລະບົບທະນາຄານ, ການຄ້າ - ການລົງທຶນ, ການບໍລິການ, ແກ້ໄຂຂອດຂັ້ນທີ່ບໍ່ຈໍາເປັນ ເພື່ອສົ່ງເສີມການຜະລິດຂອງປະຊາຊົນ, ກຸ່ມສະຫະກອນ, ຄຸ້ມຄອງບັນດາຜູ້ປະກອບການນຳເຂົ້າ - ສົ່ງອອກສິນຄ້າ, ລາຍການສິນຄ້າ ນໍາເຂົ້າ - ສົ່ງອອກ, ສິນຄ້າກະສິກໍາທີ່ສາມາດຜະລິດໄດ້ກຸ້ມຕົນເອງ ເຮັດໃຫ້ລາຍຮັບຂອງແຂວງຢູ່ໃນອັດຕາທີ່ເພີ່ມຂຶ້ນ.  ໃນໂອກາດດັ່ງກ່າວ, ທ່ານ ລິນຄໍາ ດວງສະຫັວນ ກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບ ພ້ອມທັງກ່າວໃຫ້ຮູ້ເຖິງຈຸດປະສົງຂອງການເຄື່ອນໄຫວວຽກງານທີ່ແຂວງຈໍາປາສັກ ເພື່ອການຊຸກຍູ້ຂະບວນການຜະລິດກະສິກໍາ, ສຶບຕໍ່ການປະຕິບັດດໍາເນີນການນໍາໃຊ້ລະບົບຝົນຝອຍ ນໍາໃຊ້ນໍ້າໃຕ້ດິນ ສະໜອງໃຫ້ແກ່ເຂດການຜະລິດກະສິກໍາໂດຍສະເພາະພືດຜັກ ທີ່ເປັນສິນຄ້າ ຂອງປະຊາຊົນ, ພ້ອມນັ້ນສະເໜີຄະນະນໍາແຂວງ ສຶບຕໍ່ສົ່ງເສີມຊຸກຍູ້ ວຽກງານກະສິກໍາ ອັນເປັນທ່າແຮງພື້ນຖານຂອງແຂວງ ການຜະລິດ ເພື່ອຄໍ້າປະກັນສະບຽງອາຫານ ແລະ ເປັນສິນຄ້າ, ບັນຫາໂພຊະນາການອາຫານ, ການພັດທະນາຊົນນະບົດ ແກ້ໄຂຄວາມທຸກຍາກຂອງປະຊາຊົນ, ການຄຸ້ມຄອງປ່າໄມ້ແບບຍືນຍົງ.