ວັນທີ 28 ສິງຫາ 2024 ນີ້, ແຂວງຈໍາປາສັກ ແຫ່ງ ສປປ ລາວ ແລະ ແຂວງ ກວາງບິ່ງ ສສ ຫວຽດນາມ ໄດ້ຈັດກອງປະຊຸມພົບປະສອງຝ່າຍ, ໂດຍມີ ທ່ານ ອາລຸນໄຊ ສຸນນະລາດ ກຳມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ ແລະ ທ່ານ ວູ້ ດ້າຍ ຖັງ, ກຳມະການຄະນະບໍລິຫານງານສູນກາງພັກ, ເລຂາຄະນະພັກແຂວງ, ຫົວໜ້າຄະນະຜູ້ແທນສະມາຊິກສະພາແຫ່ງຊາດແຂວງກວ້າງ ບິ່ງ ທັງເປັນຫົວໜ້າຄະນະ.  ໃນການພົບປະຄັ້ງນີ້, ທັງສອງຝ່າຍໄດ້ລາຍງານສະພາຍ ເສດຖະກິດ-ສັງຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານກໍ່ສ້າງພັກ, ອົງການປົກຄອງ, ແນວໂຮມ ແລະ ອົງການຈັດຕັ້ງ ຂອງແຕ່ລະແຂວງ, ພ້ອມດຽວກັນນັ້ນກໍ່ໄດ້ຕີລາຄາສະພາບການ, ຜົນສຳເລັດໃນການປະຕິບັດເນື້ອໃນ ບົດບັນທຶກ ການພົບປະທີ່ໄດ້ລົງນາມໃນວັນທີ 26 ກັນຍາ 2022 ທີ່ນະຄອນດົ່ງເຫີ້ຍ, ແຂວງກວ້າງບິ່ງ ແຫ່ງ ສສ ຫວຽດນາມ ຜ່ານການແລກປ່ຽນ ສອງຄະນະຜູ້ແທນ, ພາຍໃຕ້ການນໍາພາ ຂອງອົງຄະນະພັກແຂວງ, ອົງການປົກຄອງ ຂອງສອງແຂວງ, ໃນເງື່ອນໄຂຕ້ອງໄດ້ປະເຊີນໜ້າກັບຫຼາຍບັນຫາທີ່ມີຄວາມຫຍຸ້ງຍາກ, ທ້າທາຍ, ແຕ່ສອງແຂວງກໍ່ສາມາດຍາດໄດ້ຮັບໝາກຜົນອັນສໍາຄັນໃນຂົງເຂດການເມືອງ, ເສດຖະກິດ, ວັດທະນະທໍາ-ສັງຄົມ, ປ້ອງກັນຊາດ, ປ້ອງກັນຄວາມສະຫງົບ, ການຕ່າງປະເທດ ແລະ ວຽກງານກໍ່ສ້າງພັກ.  ໃນກອງປະຊຸມ, ຄະນະຜູ້ແທນທັງສອງຝ່າຍ ໄດ້ ປຶກສາຫາລື ແລະ ເອກະພາບກັນ ໃນການລົງນາມບົດບັນທຶກການຮ່ວມມື ຕາມບັນດາເນື້ອໃນຄື: ສອງແຂວງເປັນເອກະພາບກັນ ແລກປ່ຽນຄະນະຜູ້ແທນຂັ້ນສູງໃນທຸກໆ ສອງປີ ເພື່ອຕີລາຄາໝາກຜົນການຮ່ວມມື ແລະ ລົງນາມເນື້ອໃນການຮ່ວມມືໃນຕໍ່ໜ້າ, ສືບຕໍ່ຊຸກຍູ້ໂຄສະນາ,  ສຶກສາອົບຮົມ ພະນັກງານ, ປະຊາຊົນ,  ພິເສດແມ່ນ ຄົນຮຸ່ນໃໝ່ ກ່ຽວກັບສາຍພົວພັນມິດຕະພາບທີ່ຍິ່ງໃຫ່ຍ ຄວາມສາມັກຄີພິເສດ ລະຫວ່າງ,  ສອງພັກ - ສອງລັດ, ປະຊາຊົນສອງຊາດລາວ - ຫວຽດນາມ ເວົ້າລວມ, ເວົ້າສະເພາະ ແຂວງຈໍາປາສັກ ແລະ ແຂວງກວ້າງບິ່ງ ຢ່າງຮອບດ້ານ ສູ່ລວງເລິກ. 

ເພີ່ມທະວີຊີ້ນຳບັນດາອົງການທີ່ກ່ຽວຂ້ອງ, ທ້ອງຖິ່ນ, ວິສາຫະກິດ ເພີ່ມທະວີການຮວ່ມມືໃນຂະແໜງເສດຖະກິດ, ການຈັດການໂຄສະນາ ຊຸກຍູ້, ສ້າງເງື່ອນໄຂໃຫ້ວິສາຫະກິດ, ນັກລົງທຶນຮວ່ມມືການລົງທຶນໃນ ບັນດາຂົງເຂດການຄ້າ, ການທ່ອງທ່ຽວ, ການບໍລິການ, ຄົມມະນາຄົມຂົນສົ່ງ, ການຜະລິດສິນຄ້າ ແລະ ອື່ນໆ ໃຫ້ສອດຄ່ອງກັບທ່າແຮງ ແລະ ຄວາມບົ່ມຊ້ອນຂອງແຕ່ລະແຂວງ, ສືບຕໍ່ປະສານສົມທົບໂຄສະນາ, ຊຸກຍູ້ການທ່ອງທ່ຽວ,ຄຸນນະພາບການບໍລິການ, ນໍາໃຊ້ ທ່າແຮງການທ່ອງທ່ຽວລະຫວ່າງສອງແຂວງ ຕິດພັນກັບ ການສ້າງກິດຈະກໍາ ງານວາງສະແດງສິນຄ້າ, ນິທັດສະການສິນຄ້າ ຊຸກຍູ້ການຄ້າລະຫວ່າງສອງແຂວງ, ສືບຕໍ່ ແລະ ຂຸດຄົ້ນຖ້ຽວຂົນສົ່ງໂດຍສານປາກເຊ-ດົ່ງເຫີ້ຍ ແລະ ດົ່ງເຫີ້ຍ-ປາກເຊ.  ເຊິ່ງທັງສອງແຂວງຕ້ອງໄດ້ເອົາໃຈໃສ່ ຊ່ວຍເຫຼືອເຊິ່ງກັນ ແລະ ກັນ ໃນເວລາປະສົບໄພພິບັດ, ພະຍາດລະບາດ ທີ່ເກີດຂື້ນຢູ່ໃນທ້ອງຖິ່ນຝ່າຍໃດຝ່າຍໜຶ່ງ, ແຕ່ລະປີ ແຂວງກ້ວາງບິ່ງ ຈະຊ່ວຍທຶນການສຶກສາ ເພື່ອກໍ່ສ້າງພະນັກງານ, ນັກຮຽນແຂວງຈຳປາສັກ 10 ທຶນ/ປີ ໃນລະດັບມະຫາວິທະຍາໄລ, ຊັ້ນສູງ, ບຳລຸງພາສາຫວຽດໃຫ້ພະນັກງານບັນດາພະແນກການ, ຂະແໜງການ ມາສຶກສາຢູ່ ທີ່ບັນດາສະຖາບັນການສຶກສາແຂວງກ້ວາງບິ່ງ ໂດຍມີທຶນນະໂຍບາຍຄ່າຮຽນ, ຄ່າຫໍພັກ, ຄ່າປະກັນສຸຂະພາບ, ຄ່າວີຊາ ແລະ ອັດຕາກິນຈຳນວນໜຶ່ງ ໃຫ້, ເຊີ່ງ ແຂວງຈຳປາສັກ ຈະຮັບເອົາພະນັກງານແຂວງກ້ວາງບິ່ງ ຈຳນວນ 2 ທຶນ/ປີ  ມາຮຽນພາສາລາວ ຢູ່ທີ່ມະຫາວິທະຍາໄລຈຳປາສັກ ໂດຍແມ່ນທຶນນະໂຍບາຍຄ່າຮຽນ, ຄ່າຫໍພັກ, ຄ່າປະກັນສຸຂະພາບ, ຄ່າວີຊາ ແລະ ອັດຕາກິນຈຳນວນໜຶ່ງ.  ໂອກາດດຽວກັນ,ທ່ານ ວູ້ ດ້າຍ ຖັງ ກໍຄື ຄະນະນໍາຂອງແຂວງກວ້າງບິ້ງ ສສ ຫວຽດນາມ ໄດ້ມອບເງິນຈໍານວນ 200 ລ້ານ ດົ້ງໃຫ້ແກ່ແຂວງຈໍາປາສັກ ເພື່ອຊຸກຍູ້ເຂົ້າໃນວຽກງານສະຫວັດດີການສັງຄົມຂອງແຂວງ ອີກດ້ວຍ.