ກອງປະຊຸມ ພົບປະແລກປ່ຽນບົດຮຽນ ວຽກງານເສນາທິການ ຮ່ວມລະຫວ່າງ ຫ້ອງວ່າການແຂວງຈໍາປາສັກ ກັບ ຫ້ອງວ່າການແຂວງສະຫວັນະເຂດ ຈັດຂຶ້ນໃນ ວັນທີ 10 ມີນາ 2023 ຜ່ານມາ ຢູ່ແຂວງຈຳປາສັກ ໂດຍການເປັນປະທານຮ່ວມຂອງ ທ່ານ ວັນນະໄຊ ຊາດຕະກຸນ ຫົວໜ້າຫ້ອງວ່າການແຂວງ ຈຳປສັກ ແລະ ທ່ານ ທອງໃສ ໄຊຍະວົງຄຳດີ ຫົວໜ້າຫ້ອງວ່າການແຂວງສະຫວັນະເຂດ, ມີ ຄະນະຫ້ອງວ່າການແຂວງ, ຫົວໜ້າ-ຮອງຫົວໜ້າຂະແໜງ ແລະ ພະນັກງານ-ລັດຖະກອນ ພາຍໃນຫ້ອງວ່າການຂອງ ສອງແຂວງ ເຂົ້າຮ່ວມ.

ການພົບປະໃນຄັ້ງນີ້, ແມ່ນເປັນການ ຮັດແໜ້ນຄວາມສາມັກຄີ ທັງເປັນການແລກປ່ຽນຖອດຖອນບົດຮຽນເຊິ່ງກັນ ແລະ ກັນ ໂດຍສະເພາະ ໃນ 3 ຫົວຂໍ້ຫລັກເປັນຕົ້ນ ການຈັດຕັ້ງປະຕິບັດວຽກງານເສນາທິການໃຫ້ການນຳແຂວງ, ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານ 3 ສ້າງ ເປັນວຽກບູລິມະສິດ ທີ່ສຳຄັນ ໂດຍໄດ້ກຳນົດເອົາວຽກນີ້ເປັນວຽກຍຸດທະສາດຍາວນານ ແລະ ຕໍ່ເນື່ອງ ແລະ ວຽກງານທີ່ຕິດພັນກັບການຊຸກຍູ້ສົ່ງເສີມ-ການຄຸ້ມຄອງການທ່ອງທ່ຽວ ຂອງສອງແຂວງ ໃນວຽກງານພັດທະນາເສດຖະ ກິດ-ສັງຄົມ ເພື່ອສ້າງລາຍຮັບໃຫ້ແກ່ແຂວງ ຊຸກຍູ້ສົ່ງເສີມ ການທ່ອງທ່ຽວຕາມຈຸດພິເສດ ແລະ ທ່າແຮງຂອງແຂວງ ເປັນຕົ້ນ ການທ່ອງທ່ຽວແບບອະນຸລັກທຳມະຊາດ, ວັດທະນະທຳ, ປະຫວັດສາດ, ກະສິກຳ ແລະ ຮູບແບບອື່ນໆ. ນອກຈາກນັ້ນ, ສອງແຂວງ ຍັງໄດ້ມີຄຳເຫັນແລກປ່ຽນບັນຫາ ທີ່ຕິດພັນກັບວຽກງານການຈັດຕັ້ງ ແລະ ພະນັກງານ, ວຽກຄຸ້ມຄອງບໍລິຫານ, ພິທີການ ແລະ ການເງິນ. ທັງນີ້, ກໍເພື່ອຮັບປະກັນ ການເປັນເສນາທິການທີ່ດີ, ປະສານງານທີ່ດີ ແລະ ບໍລິການຮັບໃຊ້ທີ່ດີ.

 

ຂ່າວ: ທັດຊະນະ