ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ໄດ້ຕ້ອນຮັບ ທ່ານ ນິສິດ ແກ້ວປັນຍາ ຮອງລັດຖະມົນຕີ ກະຊວງພາຍໃນ ພ້ອມດ້ວຍຄະນະ ເຂົ້າພົບປະ, ໃນວັນທີ 20 ກຸມພາ 2023 ນີ້ ທີ່ຫ້ອງວ່າການແຂວງ ຈຳປາສັກ. ໃນໂອກາດມາເຄື່ອນໄຫວຕິດຕາມຊຸກຍູ້ວຽກງານ ຢູ່ແຂວງຈໍາປາສັກ.  ໂອກາດນີ້, ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ໄດ້ສະແດງການຕ້ອນຮັບ ທ່ານຮອງລັດຖະມົນຕີກະຊວງພາຍໃນ ພ້ອມດ້ວຍຄະນະ ທີ່ໄດ້ມາເຄື່ອນໄຫວຊຸກຍູ້ວຽກງານຂະແໜງພາຍໃນຢູ່ແຂວງຈໍາປາສັກ ໃນເທື່ອນີ້. ພ້ອມນັ້ນ ທ່ານເຈົ້າແຂວງຈຳປາສັກ ໄດ້ຍົກໃຫ້ຮູ້ ຜ່ານມາ ແຂວງຈໍາປາສັກເຮົາໄດ້ເອົາໃຈໃສ່ ຜັນຂະຫຍາຍເນື້ອໃນຈິດໃຈວຽກງານ 3 ສ້າງ ເຂົ້າໃສ່ໃນວຽກງານວິຊາສະເພາະຂອງໃຜລາວ ຢ່າງເປັນຂະບວນການ ແລະ ມີຄວາມສອດຄ່ອງໃນວຽກງານການຈັດຕັ້ງປະຕິບັດວຽກງານ 3 ສ້າງ ຕິດພັນກັບຂະບວນການແຂ່ງຂັນ "ຮັກຊາດ ແລະ ພັດທະນາ", ໂດຍ ພະແນກພາຍໃນແຂວງ ໄດ້ເປັນເຈົ້າການໃນ ການປັບປຸງກົງຈັກການຈັດຕັ້ງ, ການໂຄສະນາເຜີຍແຜ່-ເຊື່ອມຊຶມບັນດານິຕິກໍາໃຫ້ແກ່ຄະນະພັກ, ອົງການປົກຄອງແຕ່ລະຂັ້ນ ຢ່າງກວ້າງຂວາງ.
ໂອກາດດຽວກັນນີ້, ທ່ານ ຮອງລັດຖະມົນຕີ ກະຊວງພາຍໃນ ໄດ້ສະແດງຄວາມຂອບໃຈຕໍ່ການຕ້ອນຮັບ ພ້ອມທັງ ແຈ້ງຈຸດປະສົງໃຫ້ຮູ້ວ່າ: ເພື່ອ ຮ່ວມເປັນປະທານກອງປະຊຸມລະດົມຄຳຄິດເຫັນໃສ່ຮ່າງດຳລັດວ່າດ້ວຍການຫັນຫົວໜ່ວຍວິຊາການເປັນເຈົ້າຕົນເອງ ແລະ ຮ່າງດຳລັດວ່າດ້ວຍພາລະກອນ , ພ້ອມທັງ ຊຸກຍູ້ ການຈັດຕັ້ງປະຕິບັດວຽກງານ ໂດຍສະເພາະ ຈະໄດ້ພົບປະໂອ້ລົມ- ປຶກສາຫາລື ວຽກງານຂອງຂະແໜງພາຍໃນ ແລະ ຕິດຕາມສະພາບການຈັດຕັ້ງປະຕິບັດວຽກງານບໍລິການ ຂອງພາກລັດ ທີ່ສູນບໍລິການຜ່ານປະຕູດຽວ ນຳອີກ.

ຂ່າວ: ນ ພູທິບສະຫວັນ